‘బీట్రూట్’తో నిత్య యువ్వనం మీ సొంతం...!!

Published: Monday, August 22, 2011, 11:07 [IST]

'' మహేశ్వరరావు, సావిత్రీ దంపతులు 50కి చేరువవుతున్నప్పటికి, వారిలో వయసు పైబడిన లక్షణాలు ఏమాత్రం కనబడటం లేదు. ఆ వీధింతా ఈ దంపతుల గురించే చర్చ. ఏ కార్యక్రమానికి హాజరైనా ఈ జంటే ప్రత్యేక ఆకర్షణ.. ఇంత చలాకీగా, చెక్కు చెదరని యువ్వనంతో మహేశ్వరరావు దంపతులు ఉండటాన్ని ఎదురింటి అన్నపూర్ణ ఈర్షించుకునేది, వారి ఆరోగ్య రహస్యాన్ని తెలుసుకోవాలన్న కుతూహలంతో ఆరా తీయడం మొదలెట్టింది. బయటపడ్డ నిజం అన్నపూర్ణను ఆశ్చర్యానికి గురి చేసింది. కేవలం 'బీట్రూట్ దుంప' వారిని అలా మార్చిదంటే అన్నపూర్ణకు నమ్మలేక పోయింది కాని అది నిజం..''

పది మందిలో మీరే ప్రత్యేక ఆకర్షణగా నిలవాలనుకుంటున్నారా..? వయసు పైబడుతున్నప్పటికి నవ యవ్వనంతో అదరగొట్టాలనుకుంటున్నారా..?, ఈ మార్పు కోసం మీరు ప్రత్యేకంగా ఏ పాట్లో.. ఫీట్లో చేయాల్సిన అవసరం లేదు.. అతిగా ఖర్చు పెట్టనవసరమూ లేదు.. మార్కెట్లో దొరికే 'బీట్రూట్' దుంప రసాన్ని రోజుకో గ్లాసు చొప్పున తాగితే చాలు తరగని సౌందర్యం మీ సొంతం..!! వయసుతో సంబంధం లేని చలాకీతనం మీలో జోష్‌ను పెంచుతుంది.

రక్తప్రసరణ సమగ్రంగా జిరిగేలా బీట్రూట్ రసం దోహదపడుతుందని పరిశోధకులు తేల్చి చెబుతున్నారు. వయసు పైబడుతున్నవారు, ఊపిరితిత్తులు మరియు హృద్రోగ సమస్యలతో బాధపడే వారు... ఈ రసాన్ని సేవిస్తే అన్ని విధాలా మంచిదట. బీట్రూట్ రసంలో నైట్రేట్ నిలువుల అధిక స్థాయిలో ఉంటాయట. ఈ నిల్వలు శరీరంలో రక్త ప్రసరణను మెరుగుపరచడం ద్వారా.. వయస్సు మీదపడుతున్నప్పటకి చలాకీదనం, అందం వంటి అంశాలు మీలో ఉల్లాసాన్ని, ఉత్తేజాన్ని రెట్టింపు చేస్తాయి.