బరువు తగ్గటానికి ఉపవాసం మంచిదేనా..?

Body Care

oi-Sivanjaneyulu

By Sivanjaneyulu Bommu

Published: Friday, November 18, 2011, 12:37 [IST]

స్థూలకాయమంటే ఏంటి..?, ఇది ఏ రకమైన వ్యాధి..?, ఏ వయసు వారికి వస్తుంది..?, అవగాహన లేమితో పలువురు అడుగుతున్న ప్రశ్నలివి. ఉండాల్సిన బరువు కన్నా ఎక్కువ బరువున్న వారిని స్థూలకాయులంటారు. మనిషి ఎత్తుని బట్టి బరవును లెక్కిస్తారు. శరీరం సంరక్షణలో భాగంగా ప్రతి ఒక్కరూ తమ బరువును ఎప్పటికప్పుడు పరీక్షించుకోవాలి.

డైటింగ్ పేరుతో మితిమీరి ఉపవాసముండటం లేనిపోని అనర్థాలకు దారితీరస్తుందని నిపుణులు హెచ్చరిస్తున్నారు. గ్యాస్ట్ర్రిక్ సమస్యలు తలెత్తే అవకాశముందని వీరు సూచిస్తున్నారు. బరువు తగ్గాలనుకునే వారు ఆహారం విషయంలో పూర్తి శ్రద్ధ వహించాలి.

బరువు తగ్గాలనుకునే వారు ప్రణాళికాబద్ధంగా ఆహారం తీసుకోవాలి. ప్రతి రెండు గంటలకు కొద్ది కొద్దిగా తింటుండాలి. తినే సందర్భాల్లో ఆహారాన్ని మింగేయకుండా ఎక్కువ సేపు నమలాలి. రాత్రిళ్లు 8గంటలలోపు భోజనం పూర్తి చేసి రెండు గంటల తరువాత నిద్రపోవటం అలవాటు చేసుకోవాలి.

కొంచెం కొంచెంగా ఎక్కువ సార్లు ఆహారం తీసుకోవడం వల్ల జీర్ణ ప్రక్రియ వేగవంతంగా జరగటంతో పాటు అధిక కొవ్వు నిల్వలు పేరుకోవు. అదే విధంగా అధిక మోతాదులో మంచినీరు తీసుకోవాలి. నీరు తాగేందుకు పగటిపూటే అధిక ప్రాధాన్యతనివ్వాలి.