గోళ్ళు సంరక్షణ..ఆరోగ్యం..అందం...

Published: Thursday, February 16, 2012, 17:35 [IST]

సృష్టిలో ప్రతి మనిషి ఆరోగ్యంగా ఉన్నాడో లేదో అని తెలిపేది చేతి, కాళ్లకున్న గోళ్లదే కీలక పాత్రే...కాబట్టి వాటిని సంరక్షించుకోకుంటే... వాటి మధ్య పేరుకు పోయే మట్టి తదితరాల కారణంగా అనేక రోగాలు సంక్రమించే అవకాశం ఉంటుంది. కనుక ఎప్పటి కప్పుడు వేళ్లకు ఎలాంటి ఇబ్బంది కలిగించని విధంగా గోళ్ల ఎదుగుదలను కత్తిరిస్తూ ఉండాలి. ఫ్యాషన్‌ కోసం గోళ్లను పెంచేవారు వాటి సంరక్షణలో అనేక జాగ్రత్తలు పాటించాలి. గోళ్ల షేప్‌ మొదలు, శుభ్రత విషయంలో శ్రద్ధ కనబరచాలి. అప్పుడే ఆరోగ్యమైన గోళ్లు చేతులకు, కాళ్ళకు ఎంతో అందాన్నిస్తాయి. ఇక గోళ్లు అందంగా.. ఆరోగ్యంగా కనిపిం చాలంటే...నెయిల్‌ పాలీష్‌, పాలీష్‌ రిమూవర్లు, ఆర్టిఫీషియల్‌ నెయిల్స్‌ తో మరింత అందంగా కనిపిస్తాయి...

1. కొంతమందికి గోళ్లు ఉబ్బెత్తుగా ఉండి వాలినట్లుగా ఉంటాయి. ఇలాంటివారు గోళ్లను రెండు మిల్లీమీటర్ల పొడవుకంటే ఎక్కువగా పెంచకూడదు. లేకపోతే గోర్లు పొడవైనకొద్దీ కిందికి వాలిపోయి పక్షుల గోర్లమాదిరిగా మారిపోతాయి. మరికొందరికి గోళ్లు పైకి లేచినట్లుగా ఉంటాయి. ఇలాంటివారుకు కూడా ఎక్కువ పొడవుగా పెంచకూడదు. వేళ్లు సన్నగా బాగా పొడవుగా ఉన్నవారు కూడా గోళ్లను ఎక్కువ పొడవుగా పెంచకూడదు.
2. గోళ్లచుట్టూ ఉండే చర్మానికి క్యూటికురా ఆయిల్‌తో మసాజ్ చేస్తుంటే ఆరోగ్యంగా ఉంటాయి. గోరుమీద కూడా ఆయిల్ వేసి మర్దనా చేస్తే ఆరోగ్యంగా, అందంగా ఉంటాయి. నిమ్మముక్కతో రుద్దితే గోళ్లు మెరుస్తూ ఉంటాయి. గోళ్ళు బాగా ఆరోగ్యంగా పెరగాలంటే విటమిన్ సీ ఎక్కువగా ఉండే ఆహారాన్ని తీసుకోవాలి.
3. పాలీష్ చిక్కగా ఉండి, త్వరగా గట్టిపడటానికి పాలీష్‌ లలో 'ఫార్మాల్డిహైడ్‌' తప్పనిసరిగా వాడతారు. దీనివల్ల కొన్నిసార్లు అసలుకే మోసం వచ్చి గోరు ఊడిపోయే ప్రమాదం ఉంది. గోరుచుట్లు, గోరుపైని చర్మం వాచి నొప్పి, చీముకూడా పట్టొచ్చు. గోరు రూపమే మారిపోవచ్చు. మందంగా అవ్వచ్చు, లేదా పల్చబడిపోవచ్చు. ఎప్పుడన్నా ఒకసారి పాలీష్‌ వేసుకుంటే పెద్దగా నష్టం ఉండకపోవచ్చు. కానీ వరసగా వేసుకుంటుంటే ఈ రసాయనాలు గోరులో పేరుకుపోయి.. కొంత కాలానికి సమస్యలు మొదలయ్యే అవకాశం ఉంటుంది.
4. రెండోది- నెయిల్‌పాలీష్‌ వేసుకున్న వారు ఆ చేతితో ఏదో ఒక సమయంలో కళ్లు నులుముకోవటం, మెడ మీద గోకటం వంటివి చేస్తారు. దీంతో సున్నితమైన కంటి చర్మం దగ్గర, మెడ మీద రియాక్షన్లు వస్తాయి.
5. పాలీష్‌ రిమూవర్స్‌: దీనిలో ప్రధానంగా రంగును కరిగించే సాల్వెంట్‌ రసాయనం 'అసిటోన్‌' ఉంటుంది. దీనివల్ల గోరుచుట్టూతా ఎర్రగా వచ్చి దురదలూ, మచ్చలు, నీరు కారటం వంటి దుష్ప్రభావాలన్నీ ఉంటాయి. ఈ సమస్యలు అందరికీ రాకపోవచ్చు. కానీ అవి మొదలైనప్పుడు వెంటనే గుర్తించటం చాలా అవసరం.