అలసిన కళ్ళు కోసం

Published: Friday, January 13, 2012, 17:14 [IST]

How to keep your eyes Healthy and Fresh..?

ప్రస్తుత జీవన శైలిలో అందరూ బిజీబిజీగా జీవితం గడుపుతుంటారు. అరోగ్యం, ఆహారం పట్ల కూడా తగిన జాగ్రత్త తీసుకోకుండా నిత్యం ఒత్తిడితో పనిచేస్తుంటారు ఆఫీసులో బోలెడంత పని, ఇంటికి వచ్చిన తరువాత ఫ్రెండ్స్‌ తో ఛాటింగ్.. అదేపనిగా కంప్యూటర్ ముందు గంటలతరబడీ గడిపేయటం నేటి ఆధునిక జీవనశైలిలో భాగం. అలాగే విశ్రాంతి తీసుకుంటున్నామని చెబుతూనే అనేక గంటలపాటు టీవీని చూడటం కూడా అలాంటివాటిలో ఒకటి.

టీవీల ముందు, కంప్యూటర్లముందు గంటలతరబడీ గడపటంవల్ల క్రమంగా కంటికి సంబంధించిన సమస్యలబారిన పడతారు. సరైన నిద్రలేని కారణంగా కళ్లకింద నల్లటి చారలు, కంటిచూపు మందగించటం, కళ్లలో మంటలు, కళ్లలోంచి నీరు కారటం.. లాంటివన్నీ క్రమంగా ఒకదాని తరువాత ఒకటిగా వేధిస్తాయి. ఇలాంటి సమస్యల పాలవకుండా.. చిన్న చిన్న జాగ్రత్తలు తీసుకున్నట్లయితే కళ్ల ఆరోగ్యాన్ని కాపాడుకోవటమే గాకుండా, మిలమిలా మెరిసే అందమైన కళ్లను ఆరోగ్యంగా ఉంచుకోవచ్చు.

1. ఉదయం పూట రెండు బాదం పప్పులను కొంచెం పాలలో నానపెట్టాలి. రాత్రి వాటిని మెత్తగా చేసుకుని ఆ పేస్ట్‌ను కళ్ళచుట్టూ రాస్తే బ్లాక్ సర్కిల్స్ పూర్తిగా మాయమైతాయి.
2. ఎండవేడిని తట్టుకునేందుకు వాడే సన్‌ స్క్రీన్ లోషన్లు వంటి వాటిని బయటికి వెళ్ళేటప్పుడే కాకుండా ఇంట్లో ఉన్నప్పుడు కూడా వాడండి.
3. ఎప్పుడూ ఏదో ఒక వస్తువును తీక్షణంగా రెప్పవేయకుండా చూస్తూ కళ్ళపై ఒత్తిడి తీసుకురాకండి.
4. కళ్లకు విశ్రాంతినివ్వాలంటే.. ప్రతి రెండు గంటలకోసారి చేస్తున్న పనికి కాస్త బ్రేక్‌ ఇవ్వాలి. ఒకటి రెండు నిమిషాలు కళ్లు మూసుకుని, ఆ తరువాత చూపుడు వేలుని రెండు కళ్లమధ్య ఉంచి, కాసేపు తదేకంగా ఆ వేలుని చూడాలి. ఆపై వేలుని కళ్లకు మరీ దగ్గరగా, కాసేపు దూరంగా ఉంచి… కళ్లను పైకి, కిందకు, కుడి ఎడమలకు, గుండ్రంగా తిప్పుతూ చూడాలి. ఇది కళ్లకు చక్కటి వ్యాయామంగా పనిచేసి అలసటను దూరం చేస్తుంది. కళ్లకు సాంత్వన లభిస్తుంది.
5. కళ్ళ కిందభాగం ఉబ్బినట్టు ఉంటే రెండు టీ బ్యాగులను వేడినీటిలో కొంచెం సేపు నాంచి ఆ తర్వాత వాటిని కళ్ల మీద 20 నిమిషాలపాటు పెట్టుకోవాలి.