గోళ్ల ఆరోగ్యంగా ఉండేందుకు తగు జాగ్రత్తలు

Published: Tuesday, January 31, 2012, 15:28 [IST]

శరీరంలో ముఖం తర్వాత అందంగా కనిపించేది చేతులు, గోళ్లు. గోళ్లను అందంగా ఉంచుకోవడం ఒక కళ. ఇవ్వాళ ఉన్న నాగరిక సమాజంలో గోళ్లు పెంచుకోవడం, దుస్తులకు సరిపోయేలా మ్యాచింగ్‌ చూసుకుని గోళ్లరంగు వేసుకోవడం ఫ్యాషన్‌ గా మారింది. ముఖ్యంగా యుక్తవయసున్న అమ్మాయిల్లో ఇది ఎక్కువగా చూస్తూవుంటాం. నాజూగ్గా, సింపుల్‌ గా కనిపించే గోళ్లలోనూ ఆరోగ్యం దాగుందని వేరే చెప్పనవసరం లేదు. అందుకే గోళ్లను అప్పుడప్పుడూ పరిశీలించుకోవాలి. ఏమైనా తేడాలుంటే జాగ్రత్తపడాలి. అవసరాన్ని బట్టి వైద్యుని సంప్రదించడమూ ముఖ్యమే. అందాన్ని పెంచే గోళ్లను పదిలంగా కాపాడుకుంటే, అవి మన ఆరోగ్యాన్నీ అంతే పదిలపరుస్తాయి. అలాంటి గోళ్లు ఆరోగ్యంగా అందంగా కనిపించాలంటే...

1. చేతులు కడుక్కున్న తరువాత తడిలేకుండా తువ్వాలుతో తప్పకుండా తుడుచుకోవాలి. ప్రత్యేకంగా వంటింటిలో పనిచేసేటపుడు ఈ జాగ్రత్త చాలా అవసరం. రకరకాల వస్తువులు ముట్టుకున్నపుడు వెంటనే చేతులు కడుక్కోవాలి. తేమ కారణంగా గోళ్లలో వచ్చే మార్పులు, ఇన్ఫెక్షన్లు రాకుండా ఉండాలంటే ఇది అత్యవసరం.
2. కాలిగోళ్ల శుభ్రత చాలా అవసరం. మన ఆచారం ప్రకారం బయటినుండి ఇంట్లోకి వచ్చినపుడు కాళ్లు కడుక్కుంటాం. శుభ్రతపరంగా ఆలోచిస్తే ఇది చాలా అవసరం. మట్టివల్ల వచ్చే వ్యాధులనుండి కాపాడుకోవాలి.
3. పెరిగిన గోళ్లలో మురికి చేరినపుడు పిల్లల చేతులు కడుక్కోకుండా ఆహారం తీసుకోవడంవల్ల కడుపులో నులిపురుగులు చేరతాయి. కనుక ఎలా చూసుకున్నా శుభ్రత అవసరం.
4. మనం వేసుకునే చెప్పుల ఆకృతి సరిగా వుండాలి. షూవంటివి టైట్‌ గా ఉంటే గోళ్లు లోపల ఒత్తుకుని నొప్పి కలగొచ్చు.
5. గోళ్లు సరిగా కత్తిరించకపోవడంవల్ల కూడా సమస్య వస్తుంది. వేళ్ల చివర్లు డేమేజ్‌ కాకుండా వేళ్లు జాగ్రత్తగా కత్తిరించుకోవాలి.