పరిమళ భరితమైన శరీరం కోసం..వ్యక్తిగత పరిశుభ్రత

Body Care

oi-Saraswathi

By Sindhu

Published: Monday, January 30, 2012, 17:21 [IST]

శరీర పరిశుభ్రత విషయంలో చాలా జాగ్రత్తగా వుండాలి. లేకపోతే అనారోగ్యం మన వెంటే వుంటుంది. సహజంగా చాలా మంది అమ్మాయిలు ముఖాన్ని అందంగా తీర్చిదిద్దుకోవడం, వేసుకొనే బట్టల విషయంలో తీసుకున్నంత శ్రద్ధ శరీర శుభ్రత పట్ల తీసుకోరు. దీనివల్ల శరీరం నుంచి దుర్వాసన వస్తుంది. తినే ఆహారం, స్థూలకాయం, వేసుకొనే బట్టలు, ఉష్ణోగ్రత...శరీర దుర్గంధానికి ముఖ్య కారణాలు. కొన్ని చిన్న చిన్న జాగ్రత్తలు తీసుకోవడం ద్వారా దుర్వాసనకు దూరంగా ఉండవచ్చు. అదెలాగో చూద్దాం....
1. స్నానానికి పావుగంట ముందు ఏం చేయాలంటే..నిమ్మరసం, గ్లిజరిన్ సమపాళ్లలో తీసుకొని శరీరానికి రాసుకొని చూడండి తేటగా మారిన మేని కాంతి మీ సొంతమవుతుంది.
ప్రతిరోజూ యాంటీ బాక్టీరియా సబ్బుతో స్నానం చెయ్యాలి.
2. సిల్కు, పాలియస్టర్‌ వంటి బట్టల వాడకాన్ని తగ్గించాలి. ఇవి చెమటను పీల్చుకోవు. దానివల్ల శరీరం చెమట వాసన వచ్చే ప్రమాదముంది. కాబట్టి కాటన్‌ దుస్తులు ధరించవడం మంచిది. ముఖ్యంగా లోదుస్తులు కాటన్‌వే ఉపయోగించాలి.
3. బిగుతుగా ఉండే దుస్తుల కన్నా లూజుగా ఉండేవి వేసుకోవడం వల్ల గాలి ప్రసరించేందుకు ఆస్కారం ఉంటుంది.
4. డియోడరెంట్స్‌ ను ఉపయోగించేవారు కొంచెం ఖరీదు ఎక్కువైనా ఎక్కువసేపు తాజాగా ఉంచే వాటిని కొనుక్కోవాలి.
5. రోజుకు రెండు కప్పుల కాఫీ, టీ మాత్రమే తాగాలి. కాఫీలో ఉండే కెఫిన్‌ చెమటకు కారణమయ్యే గ్రంధులను ప్రేరేపిస్తుంది.
6. స్నానం చేసేటప్పుడు చివర రెండు మగ్గుల నీళ్ళలో ఒక టీస్పూన్‌ తేనె కలిపి శరీరాన్ని తడిపితే చాలా సేపు ఫ్రెష్‌ గా ఉంటారు.
7. పుదీనా ఆకులు వేసి కాచిన నీళ్ళతో స్నానం చేసినా ఫలితముంటుంది. తినే ఆహారంలో వెల్లులి, మసాలాలు తక్కువగా ఉండాలి. రోజుకు కనీసం ఐదు లీటర్ల నీటిని తాగాలి.
8. స్నానానికి ఎప్పుడూ కూడా చల్లని నీటినే వాడాలి. ఎందుకంటే చల్లని నీటిలో అమ్లజని ఎక్కువ కరిగి ఉంటుంది. చలికాలంలో మాత్రం గోరువెచ్చని నీటితో స్నానం చేయవలెను. స్నానపుగదికూడా శుభ్రంగా వుండాలి. స్నానం చేసేటప్పుడు మొదట సబ్బుతో ఒళ్ళు రుద్దుకోవలెను. ఆ తర్వాత తగినంత నీటిలో సబ్బు పూర్తిగా పోయేంత వరకు నీళ్ళు పోసుకోవలెను. సబ్బు పూర్తిగా శరీరం నుండి తొలగకపోయినచో సబ్బు చెమట గ్రంధులను మూసివేస్తుంది.
9. చవకబారు సబ్బులను వాడటం వల్ల అవి చర్మానికి హాని కల్గిస్తాయి. వాటిలో కాస్టిక్‌ సోడా ఎక్కువగా ఉంటుంది. బట్టల సబ్బులను ఒళ్ళు రుద్దుకోవడానికి వాడకూడదు. ఎందుకంటే బట్టల సబ్బులలో కూడా కాస్టిక్‌ సోడా ఎక్కువ పరిమాణంలో వుంటుంది. శరీరానికి స్నానపు సబ్బులను మాత్రమే వాడాలి.
10. వేపుళ్లు, ఉల్లిపాయలు, వెల్లుల్లి, మాంసం, కెఫిన్ ఉన్న పానీయాలను తగ్గించాలి.