వేసవిలో చీకాకు పెట్టే చెమట...నివారణోపాయాలు...

Published: Saturday, March 17, 2012, 13:14 [IST]

వేసవి వచ్చేసింది. ఎండలు మండుతున్నాయి. బయట వెళ్ళాలంటేనే భయం..భయం.. వేసవిలో వేడితాపానికి చర్మం కమలిపోవడం, చర్మం పగుళ్ళు, వడదెబ్బ, చెమరకాయలు, స్కిన్ అలర్జీ రకరకాలుగా ఇబ్బంది పడుతుంటారు. వేసవి కాలంలో చెమట ఎక్కువగా పట్టడం సర్వసాధారణం. ఇది ప్రతి ఒక్కరిలోనూ ఉంటుంది. టెన్షన్‌ పడినపుడు... భయపడినపుడు.. బాగా ఆడినపుడు... ఎక్కువగా పని చేసినపుడు చెమట అధికగా పడుతుంది. దీనికి చర్మంలో ఉండే స్వేదగ్రంథులు ఉండటమే. చెమట దుర్వాసనతో నలుగురిలో తిరగాలంటేనే చాలా ఇబ్బందిగా ఉంటుంది. అలాంటి దుర్వాసనను పోగొట్టుకునేందుకు పలువురు పలురకాల పద్దతులను పాటిస్తుంటారు.

మనిషి శరీరంలో వేడి, ఒత్తిడి అధికంగా ఉన్నప్పుడు చెమట ఎక్కువగా ఉత్పత్తి కావడం సహజం. అది ఆవిరి అయ్యే ప్రక్రియలో భాగంగా శరీరాన్ని చల్లబరుస్తుంది. అంటే వేడిగా ఉన్న శరీరాన్ని చల్లబరిచేందుకు చెమట పట్టడం సహజం. చెమట అధికంగా పట్టేవారు కొన్ని జాగ్రత్తలు పాటిస్తే కొంతమేరకు ఉపశమనం పొందవచ్చు.

1. ముఖ్యంగా చెమట ఎక్కువగా పట్టేవారు రోజూ రెండుసార్లు స్నానం చేస్తే మంచిది. శరీర శుభ్రతపై ప్రత్యేక శ్రద్ద కనబరచండి
2. అలాగే, తేమ కలిగిన సబ్బులకు బదులు సాధారణ సబ్బులు వినియోగించడం మంచిది. వేపతో తయారు చేసిన సబ్బులను వినియోగిస్తే శరీరం నుంచి వచ్చే చెమట దుర్వాసన మటుమాయమౌతుంది.
3. పరిశుభ్రమైన దుస్తులు, కాటన్ దుస్తులు ధరించడం వల్ల కొంత మేరకు చెమటను నివారించవచ్చు. ఉతకని దుస్తులను అల్మారాలో ఉంచితే మరింత దుర్గంధం వ్యాపిస్తుంది. దీంతో బ్యాక్టీరియా మరింతగా రెచ్చిపోయి విపరీతమైన దుర్గంధాన్ని పుట్టిస్తుంది.
4. ఒక్క రోజు వాడిన బట్టలను అల్మారాలో పెట్టకండి.. ముఖ్యంగా మీరు ధరించే దుస్తుల్లో సింథటిక్ వస్త్రాలు లేకుండా జాగ్రత్తలు తీసుకోవాలి.
5. ఆహారం విషయంలో నూనె పదార్థాలు, వేపుళ్లు, కారం మసాలాలు వీలైనంతగా తగ్గించాలి. తేలికగా జీర్ణమయ్యే ఆహారాన్ని తీసుకోవాలి. సాధ్యమైనంత వరకు నాన్‌ వెజ్‌ తినకపోవడమే ఆరోగ్యకరం. పీచుపదార్థాలు ఎక్కువగా ఉన్న ఆహారం తీసుకోవాలి. మసాలా దినుసులతో కూడిన ఆహారం లేకుండా చూసుకోవాలి.
6. వేసవితాపాన్ని తగ్గించడం లోనూ, దప్పికను తీర్చడంలోనూ మజ్జిగ ఎంతో ఉపయోగ పడుతుంది. ప్రతిరోజూ గ్లాసెడు మజ్జిగ తాగడం ఆరోగ్యానికి ఎంతో మేలు చేస్తుంది. అలాగే వేసవి వాతావరణానికి తగ్గ పండ్లను తినాలి. ఇటువంటి జాగ్రత్తలతో వేసవితాపం నుండి బయట పడవచ్చు...