వేసవితాపానికి జుట్టుకీ సన్ స్ర్కీన్ లోషన్....

Published: Thursday, February 16, 2012, 16:39 [IST]

ఎండా కాలం వచ్చేస్తుందంటే చాలు ఎండ ప్రభావం ఇటు చర్మం మీద..అటు వెంట్రుకల మీద పడుతుంది. వేసవిలో ఎండతాపానికి జుట్టు పొడిబారటం, నీర్జీవంగా మారటంతో పాటు జుట్టు చివర్లు చిట్లిపోతాయి. రాలిపోవటం, తలంతా జిడ్డుగా తయారవటంలాంటివి మామూలే. ఈ సమస్యల నుంచి బయటపడాలంటే కాస్త జాగ్రత్త వహించాలి. ముఖ్యంగా ఎండలకు చర్మాన్ని రక్షించుకునేందుకు సన్ స్క్రీన్ లోషన్స్ ఎలా వాడతామో, అలాగే జుట్టు సంరక్షణ కోసం ప్రొటెక్టిన్ సన్‌ స్క్రీన్ లోషన్స్, హోం మేడ్ మాస్క్స్ ఉపయోగించడం కూడా తప్పనిసరి.

1. పాత్రలో టేబుల్ స్పూన్ అవొకాడో గుజ్జు, టీ స్పూన్ తేనె, రెండు టీ స్పూన్ల ఆలివ్ ఆయిల్ వేసి అయిదు నిమిషాలపాటు బాగా కలపాలి. ఈ మిశ్రమాన్ని హెయిర్ బ్రష్ సహాయంతో తలకు పట్టించి అరగంట తరవాత షాంపూతో తల స్నానం చేయాలి. డ్రై హెయిర్ గల వారు 15 రోజులకి ఒకసారి ఈ మాస్క్ వేసుకుంటే నిర్జీవమైన జుట్టు నిగనిగలాడుతుంది.
2. చిట్లిపోయినట్లుగా ఉండే జుట్టు చివర్లను కత్తిరించాలి. అయితే పొడిబారి, బిరుసుగా ఉన్నట్లయితే పొట్టిగా కత్తిరించుకోవటం ఉత్తమం. ఎండనుంచి రక్షణ కోసం తలకు క్యాప్ లేదా స్కార్ప్ పెట్టుకోవటం మంచిదే అయినా, వాటిని మరీ బిగుతుగా కాకుండా కాస్త వదులుగా పెట్టుకోవాలి.
3. హెన్నా మిశ్రమంలో మందార ఆకులను పేస్ట్ చేసి కలిపి జుట్టుకు పట్టించి అరగంట తరవాత గోరువెచ్చని నీటితో కడిగేయాలి.
4. వేడి నీటితో తల స్నానం మానాలి. గోరువెచ్చని లేదా చల్లని నీటినే వాడటం శ్రేయస్కరం. వేసవిలో ఆల్కహాల్‌ ఉన్న హెయిర్‌ ప్రొడక్ట్స్‌ తలకు ఉపయోగించకూడదు. ఇవి జుట్టును పొడిబారేలా చేస్తాయి. ప్రతి రోజూ తలస్నానం చేయాలి. షాంపూతో కాకుండా ప్రకృతి సిద్ధమైన శీకాకాయ, కుంకుడుకాయలతో అయితే మరీ మంచిది.
5. కప్పు పెరుగులో రెండు కోడిగుడ్ల సొన కలపాలి. ఈ మిశ్రమాన్ని తలకు పట్టించి గంటన్నర తరవాత షాంపూతో తలస్నానం చేయాలి. పది రోజులకి ఒకసారి ఈ ప్యాక్ వేసుకుంటే నిగనిగలాడే జుట్టు సొంతం అవుతుంది.
6. జుట్టును ముడిలా పైకి కట్టుకోవడం వల్ల చిట్లి పోకుండా, పీచుగా తయారవకుండా కాపాడుకోవచ్చు. ఎక్కువ సమయం ఎండలో తిరగడం వల్ల జుట్టు పాడైపోతే సన్‌హెయిర్‌ రిపెయిర్‌ మాస్క్‌ వాడవచ్చు. తలకు మరింత వేడినిచ్చే హెయిర్‌ డ్రయర్స్‌ లేదా హెయిర్‌ కర్లర్స్‌ వాడడం మంచిది కాదు. ఒక వేళ తప్పని సరి వాడాల్సి వస్తే హెయిర్‌ కండి షన్‌ అప్లై చేసిన తరువాత వాడాలి.