పీచులా పలుచగా ఉండే జుట్టు ఒత్తుగా పెరిగే చిట్కా...

Hair Care

oi-Saraswathi

By Sindhu

Published: Thursday, March 1, 2012, 16:52 [IST]

సహజంగా మనకున్న అందంలో జుట్టు కూడా ఒకటి. ఒత్తుగా జుట్టు, చక్కటి తలకట్టు ఉంటే ముఖానికి మరింత అందం చేకూరుతుంది. అందుకే జుట్టు రాలిపోతుందంటే మన అందంలో ఏదో చేజారి పోతున్నంత ఆందోళన..దాన్ని ఎలాగైనా కాపాడుకోవాలన్న తాపత్రయం. వెంట్రుకులు. అందానికే కాదు మనిషి ఆరోగ్యానికి చిహ్నం. అందుకే వాటి అంత ప్రాదాన్యత ఇస్తాం. తలపై వెంట్రుకలు నిరంతరాయంగా పుట్టి...పెరిగి..రాలిపోతుంటాయి. తలను సూర్యకాంతి, దుమ్ము, దూళి నుండి కాపాడడానికే తలపై వెంట్రుకలు ఉంటాయి. కాబట్టి తలవెంట్రుకలు దట్టంగా పెంచుకోవడానికి..రాలకుండా నివారించడానికి చిన్నపాటి జాగ్రత్తలు అవసరం..

1. ఎక్కువగా జుట్టు రాలుతోందా ఒక ఉల్లిపాయను మెత్తగా పేస్టులా చేసుకోవాలి. దానికి చెంచాడు తేనె కలపాలి. తలకు పట్టించి గంట తర్వాత చల్లని నీటితో కడిగేయాలి.
2. ఒక కప్పు దంపుడు బియ్యానికి మూడు కప్పుల నీళ్లు పోసి ఉడికించాలి.అన్నం ఉడికిన తర్వాత బియ్యాన్ని విడిగా తీయగా వచ్చిన గంజిని చల్లారబెట్టాలి. ఈ గంజిని ఆరంగ ఆరంగా కనీసం మూడుసార్లు జుట్టుకు పట్టించాలి. తర్వాత చల్లని నీటితో శిరోజాలను శుభ్రపరుచుకోవాలి. ఇది జొన్న పీచులా పలుచగా ఉండే జుట్టును ఒత్తుగా చేస్తుంది.
3. ఒక్కోసారి తలంతా దురద పుడుతుంది. అలాగని ఊరికే గోకుతుంటే మాడు పుండు పడుతుంది తప్ప దురద మానదు. ఇందుకు బీట్ రూట్ రసం మంచి చికిత్స. తాజా బీట్ రూట్‌ ముక్కలను మిక్సీలో వేసి చిక్కటి రసం తీయాలి. దీనిని నేరుగా తలకు పట్టించాలి. అరగంట తర్వాత గోరువెచ్చని నీటితో తలస్నానం చేస్తే జుట్టు పట్టులా మెరుస్తుంది.
4. గాలి తగిలేలా మూడు రోజులు నిల్వ ఉంచిన పెరుగును తలకి మర్దన చేసి తలస్నానం చేస్తే చుండ్రు పోతుంది.
5. తల స్నానానికి ముందు తలకు నూనె పెట్టుకుని, మృదువైన షాంపూ తో తలస్నానం చేయండి. జుట్టు పొడిబారటం తగ్గుతుంది.
6. తలకు గోరింటాకు పెట్టుకునే ముందుదానిలో కొద్దిగా బీట్ రూట్ రసాన్ని కలిపితే జుట్టుకు మంచి మెరుపుతో పాటు రాగిరంగు ఛాయ వస్తుంది.
7. పొడిజుట్టుకి కొబ్బరినూనె, కొబ్బరిపాలు, పెరుగు సమభాగంలో తీసుకొని, గుడ్డులోని తెల్లసొన చేర్చి బాగా కలపాలి. ఈ మిశ్రమాన్ని కుదుళ్ళకు ఇంకేలా పట్టించాలి. 20 నిమిషాల తర్వాత కడగేయాలి.