ట్రెండ్ ను బట్టి మారుతున్న కేశ అలంకరణ.....

Published: Saturday, March 24, 2012, 15:12 [IST]

అతివల సింగారం కేశాభరణాలతోనే సంపూర్ణం. సిగ్గుపడుతూ నడిచేటప్పుడు వయ్యారాన్ని ఒలికించే వాలుజడ… కోపమొస్తే తాచుపాములా మెడను చుట్టే ఆ జడ గొప్పతనం అంతా ఇంతా కాదు. మరి అంత గొప్ప జడకి అలంకారం అంటే సామాన్యమా? ఒకప్పుడు జడలో సింగారించుకునేదుకు రాగిడీ, కొమ్మలూ రెండు జంటకవుల్లాంటివి నడినెత్తిమీద అలకరించుకునేవారు. వీటితో పాటు వాలు జడ మధ్యలో తుళుక్కున మెరిసే తిరుగుడు పువ్వూ, చామంతిపువ్వులు అలంకరిచుకునేవారు. చివరగా ఒయ్యారంగా కదిలే బంగారు కుప్పెలూ, మళ్ళీ పైకొస్తే పాపిట నుంచి నుదుటిమీదకి జారినట్లుండే పాపిటబిళ్లే, చెవుల మీదనుంచీ, చెంపలనుంచీ జుట్టులోకి వచ్చే మాటీలు, చెంప సరాలూ.. అబ్బ ఎన్ని అలంకారాలో …!

తర్వాత కలానుగుణంగా ట్రెండ్ మారే కొద్ది మినీ స్కర్టులూ, జీన్సూ, పోనీటెయిళ్లూ, బాబ్డ్ హెయిర్‌ల రాకతో జడ కాస్తా కటింగయిపోయింది. లూజ్ హెయిర్‌ గా స్టైల్‌పోతుంది. పాతవన్నీ మళ్ళీ వచ్చాయి. కారణం ఈనాటి అతివలలో సందర్భానుసారంగా మోజుతో అలంకరించుకుంటున్నారు. డ్రెస్సును బట్టి హెయిర్ స్టైల్. క్యాజువల్ డ్రెసెస్‌ లో జుట్టు పొట్టిగా ఉండాలి. ఫంక్షన్లకి మాత్రం వాలుజడే కావాలి.. అందుకే అమ్మాయిలు సవరాలు పెట్టుకొని అయినా సరే చూడముచ్చటగా జడలల్లుతున్నారు. వాటిని మళ్ళీ బంగారు జడలతోనూ బిగిస్తున్నారు. ఒకప్పుడు ఆర్డరిస్తేనే కానీ చేయని పసిడి జడలు నేడు రకరకాల డిజైన్లలో జ్యువెలరీ షాపుల్లో కొలువుదీరున్నాయి. బంగారం కొనే స్థోమత అందరికీ లేదు కాబట్టీ కృత్రిమ జ్యువెలరీలున్నాయి. వన్‌గ్రామ్ గోల్డ్ ఉండనే ఉంది. వీటిని మించి క్రిస్టల్ యాక్సెసరీలూ, మొత్తం జుట్టంతా సింగారమే.

కాస్త పెద్ద వయసొస్తేగానీ ముడి జోలికి పోని మగువలు ముప్ఫయ్యేళ్ళకే ముచ్చటపడి మరీ సిగ చుట్టేసేవారు. అయితే ఆ కొప్పుల్లో నాజూగ్గా ఓ గులాబీ పెట్టడంతోనే అలంకరణను సరిపెట్టేవారు. మరి ఇప్పుడో… ముడి ఫ్యాషన్ మాయలేదు. అలాగే ఉంది. ఈ తరం అతివలు మరీ యిష్టపడి ముడివేస్తున్నారు. పెళ్లికి జడ వేస్తే, రిసెప్షన్లకి ప్రత్యేక హెయిర్ స్టైల్స్‌తో మెరుస్తున్నారు.

ఇక బాబ్డ్ హెయిర్లకీ పోనీటెయిళ్ళకీ, పొట్టి జడలకూ బోలెడు యాక్ససరీలు.. హెయిర్ పిన్నులు, క్లిప్పులు, జడబిళ్ళలు.. వంటివన్నీ రంగు రంగుల రాళ్ళతో సిల్కు రిబ్బన్లతో చిత్రవిచిత్రమైన డిజైన్లలో తళుక్కుమంటున్నాయి. పూసలు, దంతం, చెక్కతో చేసినవీ వస్తున్నాయి. ఇలా సిగలో అలంకరించుకునే ఆభరణాలెన్నో ! సో… కొనాలేగానీ మనసు మెచ్చిన మగువల కోసం ట్రెండ్ కు తగ్గ కేశాభరణాలు ఎన్నో...