చుండ్రు నివారణకు నేచర్ క్యూర్....

Published: Thursday, April 5, 2012, 16:46 [IST]

హార్మోన్ల సమతుల్యత దెబ్బతినటం వలన చర్మం ప్రభావితమై చుండ్రు ఏర్పడుతుంది. వెంట్రుకల కుదుళ్ళలో ఏర్పడే ఇన్‌ఫెక్షన్ వలన, కొవ్వు పదార్థాలు ఎక్కువగా తీసుకోవటం వలన శుభ్రంగా ఉంచుకోకపోవడం, కొందరిలో శరీరతత్వం వల్ల కూడా చుండ్రు పెరగడానికి దారితీస్తుంది. చుండ్రు అధికంగా ఉన్నప్పుడు జుట్టు రాలిపోవటం, విపరీతమైన దురద, జుట్టు పీక్కోవాలనిపించటం, మంట, చికాకు, వాటితోపాటు తలను దువ్వినప్పుడు తల నుండి తెల్లటి పొట్టు రావటం ముఖ్యంగా గమనించవచ్చు.

హార్మోన్లు సమతుల్యంగా ఉండటానికి పౌష్టికాహారం తీసుకోవాలి. ఎక్కువగా మొలకెత్తిన విత్తనాలు, పండ్లు, ఆకుకూరలు, కూరగాయాలు తీసుకోవాలి. తలకు వాడే షాంపు, నూనె, సబ్బులను ధర ఎక్కువైనా మన్నికైనవి ఎన్నుకోవాలి. షాంపు లేదా ఆయిల్‌ ను వెంట్రుకల కుదళ్లలో, వేళ్లతో నెమ్మదిగా ఎక్కువసేపు మర్దనం చేయడం వల్ల ఎక్కువ ప్రయోజనం పొందొచ్చు. బయటకు వెళ్లేటప్పుడు తలకు టోపీ ధరించడం మంచిది. కొవ్వు, నూనె సంబంధిత పదార్థాలు ఎక్కువగా తీసుకోరాదు. మానసిక ఒత్తిడి కూడా చుండ్రుపై ప్రభావం చూపుతుంది. చుండ్రు నివారించటానికి కొన్ని సులభమైర పద్దతులు.

నిమ్మకాయ: చుండ్రు అనగానే చాలామంది నిమ్మచెక్కతో బరాబరా జట్టుపై రాసి రుద్దేసి కడిగేస్తుంటారు. అలా కాకుండా తలస్నానం చేసిన తరువాత ఒక టీస్పూన్ తాజా నిమ్మరసాన్ని ఓ మగ్గు మంచినీటిలో కలిపి జుట్టు తడిసేలా కడిగితే సరిపోతుంది. ఇలా నెలకు ఒకసారి చేస్తే చుండ్రు మాయమవుతుంది.

వేపాకు: చుండ్రు నివారణకు ఒక మంచి దివ్వ ఔషదం. తలస్నానం చేసే రోజు కొన్ని వేపాకులు తీసుకొని ఒక గిన్నెడు నీళ్ళలో ఉడకబెట్టి బాగా మరిగిన నీళ్ళ రంగు మారుతుంది. మామూలుగా ప్రతి నిత్యం ఎలా తలస్నానం చేస్తారో అలాగే తలస్నానం చేసి, చివరగా మరిగిన వేపాకు నీళ్ళు కొద్దిగ చల్లరాక తల మీద పోసుకోవాలి. ఇలా వారానికి 2 సార్లు చేస్తే చాలు దీనివల్ల చుండ్రు తగ్గటమే కాకుండా జుట్టు పెరగుతుంది కూడా

మెంతులు: చుండ్రు నివారణకు మెంతులు కూడా మంచి ఔషధమే. మెంతులను రాత్రిపూట నానబెట్టి, మరుసటిరోజు మెత్తటి పేస్టులాగా చేయాలి. ఈ మిశ్రమాన్ని తలంతా, మాడుకు కూడా బాగా పట్టించి, అరగంటసేపు అలాగే ఉంచి.. ఆ తరువాత చల్లటి నీటితో కడిగేయాలి. ఇలా పదిహేను రోజులకు ఒకసారి చేసుకుంటే చుండ్రు తగ్గుతుంది, జట్టు పొడిబారకుండా ఉంటుంది.

పెసరపిండి: చుండ్రును తగ్గించటంలో మరో మహత్తరమైన ఔషధంగా పెసరపిండి ఉపయోగపడుతుంది. రెండు టీస్పూన్ల పెసరపిండిని అరకప్పు పెరుగులో కలిపి తలకు పట్టించాలి. అరగంట తరువాత మంచినీటితో కడిగేయాలి. ఇలా వారానికి రెండుస్రాలు చేసినట్లయితే చుండ్రు బాగా తగ్గిపోతుంది. జట్టు ఆరోగ్యంగా ఉంటుంది.

బీట్ రూట్: బీట్ రూట్ ను చిన్న చిన్న ముక్కలుగా చేసి నీళ్ళలో వేసి వేడిచేసి రాత్రి పడుకొనే ముందు తల మాడుకు బాగా మర్దన చేసి మరుసటి రోజు ఉదయాన్ని తలస్నానం చేస్తే చుండ్రు తగ్గి వెంట్రులకు పెరుగుతాయి.