‘మంచి మొగుడొస్తాడని’..!!

ఆషాడంతో మొదలుపెట్టి రంజాన్, వినాయకచవితి, దసరా, దీపావళి, అట్లతద్ది, క్రిస్మస్, సంక్రాంతి అంటూ ప్రతి పండుగకూ అరచేతి గోరింటను ఒకప్పుడు పల్లెపడుచులు పండించేవారు. కాలానుగుణంగా కొత్త రూపును సంతరించుకన్న 'గోరింటాకు' నేడు హెన్నా, మెహందీగా మారి ఆధునిక యుగంలో కొత్త ఫ్యాషన్ గా మారింది.

'' మందారంలో పూస్తే.. మంచి మొగుడొస్తాడని, గన్నేరులా పూస్తే.. కలవాడొస్తాడని, సింధూరంలా పూస్తే .. అందాల చందమామా దిగివస్తాడని '', ఆశలను, నమ్మకాలను గోరింటాకు పండిస్తుంది. మన తెలుగింట అమ్మాయులు గోరింటాకు బాగా పండాలని వారి వారి ఇష్ట దైవాలను కోరుకుని, పెద్దవారి దగ్గర ఆశీర్వచనాలు తీసుకుంటారు. ఉత్తర భారతీయులు పెళ్లి వేడుకల్లో మెహందీని పెట్టకుని బాగా పండాలని దైవాన్ని ప్రార్ధిస్తారు.

ముఖ్యంగా తెలుగునాట జరిగే వివాహ శుభకార్యాల్లో పెళ్లికూతూరుకు గోరింటాకు పెట్టడాన్ని పెద్ద వేడుకగా చేసే ఆచారం నేటికి కొనసాగుతుంది. కాలక్రమేణ ఈ సంస్కృతి అన్ని ప్రాంతాలకు పాకింది. డిజైన్లు వేసేందుకు బ్యూటీ పార్లర్లూ వెలిశాయి. కొత్తగా మెహందీ డిజైనర్లు పుట్టుకొచ్చారు. ఆసక్తిగా నేర్చుకున్న ఈ కళ ప్రస్తుతం కొంత మందికి ఉపాధి కల్పిస్తుంది. ముఖ్యంగా కళాశాల అమ్మాయులు మెహందీ పెట్టుకోవటం పట్ల ఆసక్తి కనబరుస్తున్నారు. పట్టణాల్లోని ప్రధాన బజారుల్లో మెహందీ డిజైన్లు పెట్టే అమ్మాయులు, అబ్బాయిలు కనబడుతున్నారు. ఇండియన్, అరబిక్ ప్యాక్ లలో డిజైన్లు వేస్తున్నారు. ప్యాక్ ను బట్టి ధరను వసూలు చేస్తున్నారు.