వేస్తే తంటా...వేయకపోతే చింత...?

Make Up

oi-Saraswathi

By Sindhu

Published: Monday, July 9, 2012, 14:21 [IST]

సాధారణంగా టీనేజ్ కొచ్చే అమ్మాయిలంతా చాలా అందంగా.. ముద్దుగా ఉంటారనేది నిజం. అది అమ్మాయిలకు దేవుడిచ్చిన వరమనే చెప్పాలి. ఒక్క ప్రదేశమనే కాదు ప్రపంచం మొత్త ఈ టీనేజ్ లో ఉన్న ప్రతి ఒక్క అమ్మాయి తమతమ అందాన్ని.. సౌందర్యాన్ని కాపాడుకోవడానికి చాలా ఖర్చు చేస్తుంటారు. ముఖ్యంగా ఈ టీనేజ్ లో ఉన్న అమ్మాయిలు తమ సౌందర్యంపై ఎక్కువ శ్రద్ద తీసుకోవడమే కాకుండా, సౌందర్యం కోసం ఎంత ఖర్చైనా వెనకాడరు. అదే సమయంలో వారి సౌందర్యం కోసం చాలా చిట్కాలను బ్యూటీషియన్లు, ఫ్రెండ్స్, వెబ్ సైట్స్ , పేపర్స్ నుండి సేకరిస్తూ వాటితో ప్రయోగాలు చేస్తుంటారు. కాబట్టి టీనేజ్ గర్ల్స్ తీసుకోవాల్సిన కొన్ని ఖర్చులేనటువంటి చిట్కాలు ఎంటో చూద్దాం....

చర్మంపై ప్రత్యేక సంరక్షణ తీసుకోవడం: టీనేజ్ లో ఉన్న అమ్మాయిలు ఎంత అందంగా... ఆకర్షనీయంగా అలంకరించుకొంటారు అనడంలో సందేహం లేదు. అయితే ఆ అలంకరణకు సరైన ఉత్పత్తులను వాడకపోతే చర్మం దెబ్బతినే అవకాశం ఉంటుంది. కాబట్టి చర్మంలోని దుమ్ము, ధూళి, నూనె తొలగించడానికి రాత్రి సమయంలో ముఖాన్ని క్లెన్సర్ తో శుభ్రపరచుకోవాలి. రాత్రి సమయంలో మాయిశ్చరైజ్ చేయడం వల్ల కూడా చర్మం చాలా సున్నితంగా... మృదువుగా ఉండటానికి సహాయపడుతుంది.

మేకప్ ఎక్కువగా వేసుకోకూడదు: చాలా మంది టీనేజ్ అమ్మాయిలు మేకప్ వేసుకొనే విషయానిలో ఎక్కవ లేదా తక్కువ అనేది ఆలోచించరు. వారికి ఎలా నచ్చితే అలా వేసుకొని వెళుతుంటారు. అలాకాకుండా మేకప్ విషయంలో మెళుకువులు తెలుసుకొని వేసుకోవడం మంచిది. ముఖ్యంగా ముఖంలో అందంగా కనబడే కళ్ళు అలంకరణ విషయంలో ఐ షాడో, బ్లష్, వేసుకొనే వారు సాధారణంగా వేసుకుంటే సింపుల్ గా ఉంటుంది. చర్మం యొక్క ఛాయను బట్టి బుగ్గల మీద పింక్ బ్లష్ జోడిస్తే సరిపోతుంది. కళ్ళు పెద్దగా అందంగా కనిపించేందుకు కను రెప్పల మీద గోల్డ్ షాడో, డార్క్ మస్కారాను వేసుకోచ్చు. పెదాలకు లైట్ పింక్ లేదా న్యూడ్ లిప్ గ్లాస్ అప్లై చేస్తే లేత గులాబీల్లా ఉంటాయి.

కురులను ఆరోగ్యంగా ఉంచుకొనుట: టీనేజ్ గర్ల్స్ గుర్తుంచుకోవాల్సిన మరో ముఖ్య విషయం కేశాలను ఆరోగ్యంగా ఉంచుకోవడం. ప్రతి రెండు నెలలకు ఒకసారి హెయిర్ ను ట్రిమ్ చేయించుకోవడం వల్ల కేశాలకు చక్కటి ఆకృతి వస్తుంది. హెయిర్ కూడా మీడియంగా పొడవు ఉంటే మరింత అందంగా కనిపిస్తారు. ఒక వేళ జుట్టు పొడిబారి డ్యామేజ్ అయ్యినట్లైతే వారానికి ఒకసారి కండిషనర్ ను తప్పకుండా వాడాలి. ఖరీదైన కండీషనర్లు కొనకుండా ఆలివ్ ఆయిల్ అందుబాటులో వుంటే అది పెట్టుకొన్న సరిపోతుంది. మైక్రో వోవెన్ లో ముప్పై నిమిషాల పాటు ఒక కప్పు ఆలివ్ ఆయిల్ ను వేడిచేసి గోరు వెచ్చగా అయిన తర్వాత తలకు బాగా మసాజ్ చేసుకోవాలి. అరగంట తర్వాత మంచి షాంపూతో తలస్నానం చేస్తే నిగారింపైన మెరిసే జుట్టు సొంతం అవుతుంది.