అరచేతుల్లో అందాలు...మెహిందీ సొగసులు...

Make Up

oi-Saraswathi

By Sindhu

Published: Friday, June 8, 2012, 12:22 [IST]

మగువలంతా ఎంతో ముచ్చటపడి చేతులమీద, పాదాల మీద వేయించుకుని మురిసిపోయే మెహిందీ లేదా హెన్నాకి కొన్ని వందల యేళ్ల చరిత్ర ఉంది. క్రీస్తుపూర్వం 12వశతాబ్దంలో మొఘలుల కాలం నుంచి మెహిందీ అనబడే అలంకరణ ప్రక్రియ అమలులో ఉంది. ప్రాచీనకాలంలో అలంకరణతోపాటు గాయాలు మాన్పేందుకు కూడా మెహిందీని ఉపయోగించేవారని చరిత్ర చెబుతోంది. మెహందీని ఉపయోగించడం వల్ల వ్యాధులు మాయం అవుతాయని ఈజిప్షియన్లు నమ్మేవారు. ఇక భారతదేశంలో మెహిందీకి ఎంతో ప్రాధాన్యత ఉంది. మెహిందీ లేకుండా ఏ శుభకార్యమూ జరగదు. అయితే విదేశాల్లో అప్పట్లో చనిపోయినవారిని భద్రపరిచేందుకు ఈ మెహిందీని ఉపయోగించేవారంటే ఆశ్చర్యం కలగకమానదు. ఇంతటి చరిత్ర ఉన్న మెహందీ ఇప్పుడు యువతులకు ఉపాధిని కూడా కలిగిస్తోంది. ఎన్నో డిజైన్లు ఇప్పుడు మార్కెట్లో లభ్యం అవుతున్నాయి.

సౌందర్యాన్ని పెంచే సాధనం: మెహిందీ డిజైనులో ప్రాథమిక పరిజ్ఞానంతో పాటు కొద్దిగా సృజనాత్మకత ఉంటే చాలు..అలాంటి డిజైన్లను ఆవిష్కరించడం చాలా సులువు. తమకున్న అందానికి మరింత మెరుగులు దిద్దేందుకు మహిళలు మెహిందీని సాధనంగా ఉపయోగిస్తున్నారు. మగువల సుకుమారమైన అరచేతులు, పాదాల మీద వేసే మెహిందీ డిజైన్లు వారికి కొత్త అందాన్ని సంతరింపచేస్తున్నాయి. మహిళలు ముఖ్యంగా పెళ్లీడుకొచ్చిన అమ్మాయిలు తమ అందాన్ని మరింత పెంచుకునేందుకు మెహిందీని సాధనంగా ఉపయోగించుకుంటున్నారు. మెహిందీలో వివిధ పద్దతులున్నాయి. మెహిందీ ఎక్కడిదాకా పెట్టాలనకుంటున్నారో అక్కడిడాకా అడ్డగీత గీయాలి. ఆ గీత మధ్యభాగం నుంచి చూపుడు వేలుదాకా వేసుకోవాలి అంప్పడు అందంగా కనిపిస్తుంది. మెహిందీని మొదట అవుట్ లైన్ తో మొదలు పెట్టి నిలువుగీతలు అడ్డుగీతలు, పువ్వులు, అర్ధచంద్రాకారం లాంటి డిజైన్లతో తీర్చి దుద్దుకోవాలి.

పెళ్లిలో ప్రముఖ స్థానం: మన సాంప్రదాయంలో పెళ్లిలో మెహిందీకి ఎంతో ప్రాధాన్యత ఉంది మెహిందీ లేకుండా ఇప్పుడు పెళ్లిని ఊహించలేకపోతున్నాం. ఎందుకంటే పెళ్లికూతురి అందాన్ని మరింత పెంచి ఆకర్షనీయంగా మార్చే సాధనంగా మెహిందీకి ప్రత్యేకస్థానం ఉంది. పెళ్లికి రెండుమూడు రోజుల నుంచీ మెహిందీ వేసే డిజైనర్స్ కోసం వెతుకుతుంటారు. ఇప్పుడు మెహిందీ మేకప్ కోసం ఎక్కడికో వెళ్ళనవసరం లేదు. మన ముంగిటే మెహిందీ డిజైన్స్ అందుబాటులో ఉన్నాయి. ఎన్నో పుస్తకాలు మార్కెట్లో దొరుకుతున్నాయి. అంతే కాదు బ్యూటీ పార్లర్స్ నిర్వాహకులు వీటికోసం ప్రత్యేక ఏర్పాట్లు చేస్తున్నారు. ఇందుకు ప్రత్యేకంగా రుసుము వసూలు చేస్తున్నారు. అంతే కాదు బాగా మెహిందీ డిజైన్ చేస్తే ఆ డిజైనర్లకి మంచి మంచి బహుమతులు కూడా ఇస్తుంటారు. ఇప్పుడు పెళ్ళిళ్లతో పాటు పిల్లల బర్త్ డేపార్టీలు, అమ్మాయిలు మెచ్యూరిటీ పార్టీలు, ఇతర ఫంక్షన్స్లో మెహిందీని విరివిగా వాడుతున్నారు.

హెయిర్ కండిషనర్ గా: మెహిందీ కోసం ఉపయోగించే పౌడర్ ని వివిధ సౌందర్య సాధనాల్లో వాడుతుంటారు. మహిళలతో పాటు పురుషులు కూడా మెహిందీని హెయిర్ కండీషనర్ గా వాడతారు. మెహిందీతో వేసే డిజైన్స్ కలర్ ఫుల్ గా ఉండడం కోసం రంగుల్ని ఉపయోగిస్తుంటారు. అయితే రంగులు ఉపయోగించినవి కాకుండా సాధారణ హెన్నాని తలకు పట్టించడం వల్ల హెయిర్ కండిషనింగ్ జరిగి కురులు మరింత ఆకర్షణీయంగా పెరుగుతాయి.

ఈ విధంగా మెహిందీ అందాన్ని పెంచడంలో ప్రధాన పాత్ర పోషిస్తోంది. ఇప్పుడు అమ్మాయిలు మెహిందీలో వుస్తున్న కొత్త డిజైన్లను నేర్చుకుంటున్నారు. మార్కెట్లో లభించే వివిధ పుస్తకాల్ని చదివి వాటిని దగ్గరుంచుకుని వాటి ప్రకారం డిజైన్స్ వేసుకుంటూ తమ అందానికి మరింత మెరుగులు దిద్దుకుంటున్నారు.