మీ కోసం ఎప్పుడెప్పుడా అన్న ఎదురుచూపులే !

Published: Tuesday, February 28, 2012, 14:20 [IST]

నేటి ట్రెండ్ లో పార్టీలు..ఫంక్షన్లు..వీకెండ్ సెలబ్రేషన్స్ సర్వసాధారణమైపోయాయి. పెళ్ళిళ్ళ సీజన్ అప్పుడే మొదలైంది..చాలా ఫంక్షన్లు..పెళ్లిళ్లు, గృహప్రవేశాలు, ఎంగేజ్‌ మెంట్ పార్టీలు ఇలా బోలెడు ఫంక్షన్లకు ఆహ్వానాలు ఈ మాసం అంతా అందుతుంటాయి. అందుకోసం కొన్ని ప్రాథమిక అంశాలను దృష్టిలో పెట్టుకుంటే పార్టీలో మీరు సంతోషంగా పాల్గొనడమే కాదు. ఎదుటివారి అభినందనలకు పాత్రులవుతారు. వారి దృష్టిలో ప్రత్యేక స్థానాన్ని పొందగలుగుతారు. మీ అలవాట్లు మీ ఉన్నత సంస్కారానికి, హుందాతనానికి అద్దం పడతాయి. ఆకట్టుకునే మీ ప్రవర్తన మూలంగా మిమ్మల్ని పార్టీకి ఆహ్వానించాలన్నా, మీరిచ్చే పార్టీలకు హాజరుకావాలన్నా అందరికీ ఆనందమే. ఎప్పుడెప్పుడా అన్న ఎదురుచూపులే ! కాబట్టి ఫంక్షన్‌ కు వెళ్లే సమయంలో కొన్ని సూత్రాలు పాటిస్తే వేడుకలో మీరే ప్రధాన ఆకర్షణ అవుతారు. లేకపోతే వెళ్లామా... వచ్చామా అన్న చందంగా మిగులుతుంది. ఫంక్షన్‌ లకు వెళ్లే సమయంలో ఎలా ఉండాలో తెలుసుకుందాము.

1. ఏ ఫక్షన్ కైనా వెళ్లేటప్పుడు ఆ ఫంక్షన్‌ లో మీరు ఎంత సేపు ఉండాల్సి వస్తుంది. మీరు వెళుతున్నది ఎలాంటి ఫంక్షన్ అనే విషయాన్ని గుర్తించుకోవాలి. ఎక్కువ సేపు ఉండాల్సిన ఫంక్షన్ అయితే స్పేర్ గా మరో జత బట్టలు పెట్టుకోవాలి. రోజంతా అదే డ్రెస్‌ తో ఉండే కంటే కాస్త సేదతీరి, డ్రెస్‌ మార్చుకుంటే ఫ్రెష్‌ గా కనిపిస్తారు.
2. ఫంక్షన్‌ లో మీ ఇంట్లో వాళ్లనే అంటిపెట్టుకొని ఉండకుండా కొత్తవారితో పరిచయాలు పెంచుకోండి. బంధుమిత్రులందరినీ ఆప్యాయంగా పలకరించండి. పరిచయాలు పెంచుకొనేందుకు, ఉన్న పరిచయాలను పటిష్టం చేసుకొనేందుకు అదో మంచి అవకాశం అని గ్రహించండి.
3. ఫంక్షన్లో అవసరమైన చోట చొరవ చూపండి. అనవసరంగా ప్రతి విషయంలో జోక్యం చేసుకోవడం వల్ల మీ గౌరవం పెరగక పోగా తగ్గుతుందని గ్రహించండి.
4. ఫంక్షన్‌ కు వెళ్లి మొక్కుబడిగా కొద్దిపేపు ఉండి వెళ్లిపోతారు కొందరు. ఆలా కాకుండా వేడుకలో ప్రధాన కార్యక్రమంలో పాల్గొన్నప్పుడు మిమ్మల్ని పిలిచిన వారికి, మీకూ సంతోషం మిగులుతుంది.
5. మీరు ఎంపిక చేసే బహుమతి వారు ఉపయోగించుకొనేదిగా ఉండేలా చూసుకోండి. ధర ఎక్కువా.. తక్కువా అని కాకుండా ఉపయోగం ఎంత అనే విషయాన్ని గమనించండి.
6. ఫంక్షన్లలో చాలా మంది కుటుంబ పెద్దలు కలుస్తారు. చాలామందిసీనియర్లు ఫంక్షన్లలలో మాత్రమే కలుస్తారు కాబట్టి వాళ్ల దగ్గరకు వెళ్లి ఆప్యాయంగా పలకరించండి.