ప్రతిరోజూ నాలుగు చెంచాల కొబ్బరినూనెతో....!

కొబ్బరి చెట్టును జీవితమంతా పనికి వచ్చే చెట్టు అంటారు. మన దేశంలో శతాబ్దాలపాటు కొబ్బరి సంబంధిత పదార్ధాలను తినేటందుకు, వివిధ ఔషధాల తయారీకి వినియోగించటం అందరకూ తెలిసిందే. కొబ్బరినూనె వంటలకు, వంటికి ఎంతో మంచిదని అందరికి సాధారణంగా తెలిసిందే. ఇదే విషయం ఆయుర్వేదం లో కూడా పేర్కొన్నారు. శరీరంపై ఏర్పడే పుండ్లు, గడ్డలు లేదా ఇతర వైరల్ ఇన్ ఫెక్షన్స్ లో కూడా కొబ్బరి నూనె వాడతారు.

కొబ్బరినూనె ప్రతిరోజూ వాడితే చర్మం చక్కటి తేమ కలిగి నిగ నిగ లాడుతుందని చర్మ నిపుణులు చెపుతున్నారు. అయితే, కొబ్బరినూనెలో శాచ్చ్యురేటెడ్ కొవ్వులు అధికంగా వుండటంతో కొబ్బరినూనె ఆహారంగా వాడటం శ్రేయస్కరం కాదంటున్నారు పోషకాహార నిపుణులు. కనుక ఆహారంగా కాకపోయినా దీనిని ప్రతిరోజూ చర్మానికి, జుత్తుకు పట్టిస్తే మహిళల సౌందర్యం రెట్టిపు అవటంలో కొబ్బరినూనె ఎంతో సహకరిస్తుందనటంలో సందేహం లేదు.