చర్మ సౌందర్యంలో పెరటి మొక్కల ప్రాధాన్యత

Published: Saturday, June 16, 2012, 11:51 [IST]

పెరటిచెట్టు వైద్యానికి పనికిరాదు' అనే విషయం తరచు వింటుంటాం. అంటే చెట్టులో చేవలేదనీ, అది ఔషధం కాదనీ అర్థం కాదు. నిత్యం చూసే వస్తువుల మీద మనుషులకు నమ్మకం తక్కువగా ఉంటుంది. ఇది మనోతత్త్వశాస్త్ర సూత్రాలలో ఒకటి. మన పరిసరాలలో ప్రతిరోజూ అనేక రకాల మొక్కలు కనిపిస్తాయి. వాటిలో ఔషద విలువలు, సందర్య గుణాలు ఉన్నాయనే విషయం మనకు తెలియక వాటిని మనం అంతగా గుర్తించం. కానీ అవి ఆరోగ్యాన్ని...సౌదర్యాన్ని కాపాడుతాయని చాలా మందికి తెలియదు. మన సౌందర్యం పెంచేందుకు ఈ మొక్కల ఆకులు ఎంతగానో దోహద పడతాయి. వీటిలో ఉండే ఔషధ గుణాలు మనకెంతో మేలు చేస్తాయి. మేని ఛాయను మెరుగు పరిచేందుకు, శిరోజాలు నిగనిగలాడేందుకు ఇవి ఉపయోగపడతాయి. కాబట్టి మన పెరట్లోనే పెరిగే ఔషధ సౌందర్య గుణాలనిచ్చే మొక్కలు ఏంటో తెలుసుకుందాం.....

తులసి: పాడైన కణాలను తొలగించి, మన చర్మాన్ని కోమలంగా ఉండేలా తులసి ఆకుల రసం పనిచేస్తుంది. వీటిని క్రమం తప్పకుండా తింటే ముఖంపై మచ్చలు పోతాయి. నిత్యం కనీసం ఏడు తులసి ఆకులను తింటే శరీరానికి మంచిది. ఇక ఈ తులసిలో ఉన్న ఔషధగుణాలేంటంటే ఆకలి పుట్టడానికి, ఆహారం జీర్ణం కావడానికి ఉపయోగపడటమే కాకుండా దగ్గుని పోగింట్టి, కఫాన్ని హరిస్తుంది. ఇది ఒక క్రిమిహరం, దుర్గంధనాశకం.

పుదీనా: ఈ ఆకులను మెత్తగా నూరి ముఖంపై ‘ప్యాక్' వేసుకుంటే మొటిమల సమస్య పోతుంది. చర్మం కాంతివంతమవుతుంది. జిడ్డు చర్మంతో బాధపడేవారికి ఉపశమనం కలుగుతుంది. పుదీనాను పేస్ట్ లా చేసి ముఖానికి పట్టించి అరగంట తర్వాత చల్లటి నీటితో శుభ్రం చేస్తే చర్మం తాజాగా ఉండటమే కాకుండా చర్మం సంబంధిత అలర్జీలు సోకకుండా కాపాడుతుంది.

మెంతి: చర్మ సౌందర్యానికి, కురుల పోషణకు మెంతి ఆకులను వాడతారు. వీటి ఆకులను మెత్తగా రుబ్బి, కురులకు పట్టిస్తే చుండ్రు సమస్య తీరుతుంది. జట్టు రాలడం తగ్గుతుంది.. మెంతి ఆకుల రసంలో కొంది పసుపు, నిమ్మరసం కలిపి ముఖానికి , మెడకు అప్లై చేసి ఆరిన తర్వాత శుభ్ర పరచుకుంటే ముఖం కాంతి వంతంగా తయారవుతుంది.

గోరింటాకు: శిరోజాలకు చక్కని ‘కండిషనర్'గా గోరింటాకు పనిచేస్తుంది. వేడిని తగ్గించి, చర్మాన్ని చల్లబరిచే గుణం ఈ ఆకుల్లో ఉంది. గోరింటాకు మెత్తగా నూరి అరికాల్లలో కనుక రుద్దినట్లైతే శరీరంలోని వేడినింతటిని తగ్గించి, శరీరాన్ని చల్లబరుస్తుంది. గోరింటాకు పొడి తలకు పెట్టడం వల్ల కూడా కేశాలను ఆరోగ్యంగా ఉంచడంతో పాటు. తలను చల్లబరుస్తుంది.

మందార: వీటి ఆకులను మెత్తగా రుబ్బి కురులకు పట్టిస్తే మంచి నిగారింపు వస్తుంది. ఆకులను బాగా ఎండబెట్టి కొబ్బరినూనెలో వేయాలి. ఆ తర్వాత నూనెను తలకు రాసుకుంటే శిరోజాలు నల్లగా, వొత్తుగా పెరుగుతాయి. జట్టు రాలడం కూడా తగ్గుతుంది.

వేప: కాంతి తగ్గిన చర్మానికి, మొటిమలు తేలిన ముఖానికి ఈ ఆకుల ముద్దను రాస్తే మంచి ఫలితం ఉంటుంది. వేప ముద్దను జుట్టు కుదుళ్లకు, కేశాలకు పట్టిస్తే జుట్టు రాలడం తగ్గుతుంది. కురులు తళతళలాడతాయి.

నీలగిరి: నీటిలో ఈ ఆకులను వేసి మరగించాలి. అపుడు వెలువడే వేడిని ముఖానికి పట్టుకుంటే ఉపశమనం ఉంటుంది. ముఖం, చర్మం కాంతివంతమయ్యేలా ఈ ఆకులను వాడవచ్చు.

కరివేపాకు: కురులు వొత్తుగా పెరిగేందుకు, తళతళలాడేందుకు ఈ ఆకులతో ‘హెయిర్ ప్యాక్' వేసుకోవాలి. కేశాలు గట్టిపడతాయి.

కర్పూరం: ఈ ఆకుల్లో ‘యాంటిసెప్టిక్', ‘యాంటీ బాక్టీరియల్' లక్షణాలు అధికంగా ఉంటాయి. ముఖానికి వేసుకునే ‘ప్యాక్'లో రెండు చుక్కల కర్పూరం ఆకుల రసాన్ని కలిపితే మొటిమలు త్వరగా పోతాయి. చర్మం కోమలంగా తయారవుతుంది.