వేసవి చర్మసంరక్షణలో పళ్లరసాలు..కొబ్బరి నీళ్ళు...

Skin Care

oi-Saraswathi

By Sindhu

Published: Tuesday, April 3, 2012, 11:55 [IST]

వేసవిలో ఎండ చురుకుదనం ఎక్కువగా వుంటుంది. మన శరీరం చలి కాలంలోలాగా ఎండ కాలంలో ఉండదు. కాబట్టి వేసవికి తగినటువంటి జాగ్రత్తలు తీసుకొంటే ఎండ నుండి బయటపడవచ్చు. ఇల్లు, ఆహారం, దుస్తులు, మేకప్‌ మొదలైన అన్ని విషయాల్లోనూ జాగ్రత్తలు తీసుకుంటే ఎండాకాలాన్ని క్షేమంగా గడిపేయవచ్చు. వేసవిలో చర్మం రంగు మారిపోయి ముఖం అందవిహీనంగా తయారవుతుంది. అలాగే ఎండలోకి వెళ్ళకపోయినా వేసవిలో డీ హైడ్రేషన్‌ వలన చర్మం పొడిబారి తన సహజ మృదుత్వాన్ని కోల్పోయి ముడతలు పడ్డట్లు తయారవుతుంది. అటువంటప్పుడు ఎండలో బయటికి వెళ్ళే సమయంలో ముఖం, చేతులు, మెడభాగం భాగాలకు సన్‌ స్క్రీన్ లోషన్ రాసుకోవాలి.ఈ ఎండల నుంచి చర్మాన్ని రక్షించుకోవాలంటే చర్మ సంరక్షణ జాగ్రత్తలేమిటో ఒకసారి తెలుసుకుందాం....

1. వెలుపల వాతావరణంలో గడపాల్సి వస్తే చర్మాన్ని సూర్యకిరణాలనుంచి రక్షించుకోవటం కోసం కలబంద రసాన్ని లేపనంగా పూసుకోవాలి.

2. వేసవిలో సబ్బుకు బదులు సున్ని పిండి వాడితే శ్రేయస్కరం. పల్లరసాలు, కొబ్బరి నీరు మొదలైనవి తరచు తాగడం వల్ల చర్మ సౌందర్యం ఆకర్షణీయంగా ఉంటుంది.

3. వేసవిలో చర్మంపై సౌందర్య సాధనాలను సాధ్యమైనంత వరకూ వాడకపోవడం మంచిది. ఇవి స్వేదాన్ని అడ్డుకుని మరింత చిరాకును కలిగిస్తాయి. చందనం మొదలైన
లేపనాలను పూసుకోవాలి. అలాగే కోపాన్ని, చిరాకును తగ్గించుకుని ప్రశాంతంగా గడపడం అలవర్చుకోవాలి.

4. వేసవిలో ఎండ వేడిమికి చర్మం కమిలిపోకుండా మృదువుగా నిగనిగలాడుతూ ఉండాలంటే మాయిశ్చరైజర్‌ వాడాలి.

5. వేసవిలో నిమ్మరసం ముఖానికి రాసుకుని ఓ అరగంట ఆగి గోరు వెచ్చని నీటితో కడిగితే ముఖం ఫ్రేష్‌ గా వుంటుంది.

6. వేసవిలో పెరుగు వాడటం చాలా మంచిది. చల్లదనం కలిగించడమే కాకుండా మంచి పౌష్టికాహారంగా కూడా పనిచేస్తుంది.

7. వేసవిలో ప్రతిరోజూ ఎనిమిది నుండి పది గ్లాసుల నీటిని తాగాలి.

8. వేసవితాపాన్ని, శ్రమని తగ్గించే వాటిల్లో స్నానం ఉత్తమమైనది. స్నానం ఎన్నిసార్లు చేయాలన్నది అన్నది మీరు ఉంటున్న పరిస్థితుల మీద ఆధారపడి ఉంటుంది. అవసరాన్ని బట్టి తలస్నానం రెండు లేదా మూడు రోజులకు ఒకసారి చేయవచ్చు. స్నానం చేసే నీటిలో కొన్ని చుక్కలు వెనిగర్‌ ను వేస్తే చెమట వాసన ఉండదు.

9. ఎక్కువగా ఎండలు ఉన్నప్పుడు సూర్యుడి కిరణాల వలన కళ్లకు హాని జరగకుండా చలువ కళ్లద్దాలను ధరిస్తే మంచిది.

10. వేసవి కాలంలో షూ ధరించకుండా కాళ్లను సాధ్యమైనంత ఎక్కువగా బహిర్గత పరిచే లాగా ఉంటే పాదాలకు గాలి తగిలి ఫంగస్‌ పెరగకుండా ఉంటుంది.