మోచేతులు నల్లగా, గరుకుగా మారి ఇబ్బంది పెడుతున్నాయా ?

నిమ్మరసం

నిమ్మరసంలో ఉండే సిట్రస్ నలుపు దనం పోగొట్టడానికి బాగా ఉపయోగపడుతుంది. రోజూ స్నానానికి ముందు నిమ్మరసం రాసి, పది నిమిషాలు అలానే వదిలేసి.. తర్వాత కడిగేసుకుంటే మంచి ఫలితం ఉంటుంది.

కొబ్బరినూనె

కొబ్బరినూనె చర్మం మృదువుగా మారడానికి సహాయపడుతుంది. కాబట్టి టీ స్పూన్ కొబ్బరి నూనె, అర టీ స్పూన్ నిమ్మరసం కలిపి మోచేతులు, మోకాళ్లపై మర్ధనా చేయాలి. ఇలా క్రమం తప్పకుండా చేస్తే మోచేతులు శరీర ఛాయలోకి మారిపోతాయి.

ఆలివ్ ఆయిల్

రెండు టీ స్పూన్ల ఆలివ్ ఆయిల్, టీ స్పూన్ పంచదార కలిపి మోకాళ్లకు, మోచేతులకు రాసి బాగా రుద్దాలి. ఇలా చేయడం వల్ల నలుపు, గరుకుదనం తగ్గిపోతాయి.

బాదం

రెండు టీ స్పూన్ల పెరుగులో కొద్దిగా బాదం పొడి కలిపి మోచేతులపై మసాజ్ చేయాలి. కాసేపటి తర్వాత శుభ్రం చేసుకుంటే మంచి ఫలితం ఉంటుంది.

పాల మీగడ

పాల మీగడ సహజ మాయిశ్చరైజర్ లా పనిచేస్తుంది. దీనివల్ల చర్మం స్మూత్ గా మారుతుంది. కాబట్టి పాల మీగడలో చిటికెడు పసుపు కలిపి నల్లగా ఉన్న ప్రాంతంలో రాసి శుభ్రం చేసుకోవాలి. కొద్దిరోజుల్లో తేడా కనిపిస్తుంది.

టమోటా

టొమాటో రసాన్ని తీసి తేనె లేదా కొబ్బరి నూనెతో కలిపి మోకాళ్లకు, మోచేతులకు రాసి.. బాగా మసాజ్ చేయాలి. 15 నిమిషాల తర్వాత క్లీన్ చేసుకోవాలి. ఈ చిట్కాతో నలుపుదనం త్వరగా పోతుంది.

నువ్వుల నూనె

నువ్వుల నూనెలో చర్మాన్ని మృదువుగా ఉంచే సుగుణాలు పుష్కలంగా ఉన్నాయి. వారానికోసారి స్నానానికి నువ్వుల నూనె ఉపయోగించడం వల్ల చర్మానికి కావల్సిన ఫ్యాటీ యాసిడ్స్ అంది, మృదువుగా అవుతుంది. స్నానానికి ముందు నువ్వుల నూనెతో మర్దనా చేయడం లేదా స్నానపు నీటిలో నువ్వుల నూనె వేయడం వల్ల ఫలితం ఉంటుంది.

ప్యాక్

స్పూన్ కలబంద గుజ్జు, స్పూన్ పెసర పిండి, చిటికెడు పసుపు, కొద్దిగా నిమ్మరసం, కొంచెం రోజ్ వాటర్ తీసుకుని అన్నింటినీ బాగా కలపాలి. ఈ పేస్ట్ ని నల్లగా ఉన్న మోచేతులకు అప్లై చేయాలి. నలభై రోజులు క్రమం తప్పకుండా చేస్తే నల్లబడిన చర్మం మామూలు రంగులోకి వస్తుంది.

దోసకాయ

టీ స్పూన్ దోసకాయ రసం, టీ స్పూన్ నిమ్మరసం, చిటికెడు పసుపు కలపాలి. ఈ మిశ్రమాన్ని మోచేతులకు రాసి, ఇరవై నిముషాల తర్వాత శుభ్రపరుచుకోవాలి. వారానికి రెండు సార్లు ఈ విధంగా చేస్తూ ఉంటే మోచేతుల నలుపుదనం తగ్గుతుంది.

పాలు

పాలలో.. చర్మఛాయను పెంచే గుణం ఉంది. పావు కప్పు పాలల్లో చెంచా నిమ్మరసం, అరచెంచా పటిక కలిపి ఈ మిశ్రమాన్ని మోచేతులపై మర్దనా చేయాలి. క్రమం తప్పకుండా చేయడం వల్ల.. నలుపుతో పాటు గరుకుదనం తగ్గుతుంది.

ఇలా క్రమం తప్పకుండా ఈ చిన్నచిన్న చిట్కాలు ఉపయోగిస్తే.. మోచేతులు మృదువుగా మారడమే కాకుండా శరీరరంగులో కలిసిపోతాయి.