Karan Torani: సెక్స్ వర్కర్ల లైఫ్ థీమ్‌తో ఫ్యాషన్ క్యాంపెయిన్

రంగు రంగుల దుస్తులు, డిజైనర్ వేర్స్, అప్సరసల్లాంటి అమ్మాయిలు, హ్యాండ్సమ్ గా ఉండే అబ్బాయిలు ర్యాంప్ పై అలా నడుస్తూ ఫ్యాషన్ వేర్‌ను ప్రదర్శిస్తుంటారు. వాటినే మనం ఫ్యాషన్ వీక్‌, ఫ్యాషన్ షో, ఫ్యాషన్ ఈవెంట్ అంటూ పిలుస్తుంటాం. డిజైనర్లు తమ సృజనాత్మకత వాడి తీర్చిదిద్దిన ఔట్‌ఫిట్‌లను ఫ్యాషన్ ఈవెంట్లలో ప్రదర్శిస్తుంటారు.

దిల్లీకి చెందిన సెలబ్రిటీ ఫ్యాషన్ డిజైనర్ కరణ్ తొరానీ తను డిజైన్ చేసిన దుస్తులను ప్రదర్శించడానికి కొత్త మార్గాన్ని ఎంచుకున్నాడు. అందరిలా ఫ్యాషన్ ఈవెంట్లలో కాకుండా నడి రోడ్డుపై తను తీర్చిదిద్దిన ఔట్‌ఫిట్‌లను ప్రదర్శించాడు.

అయితే కరణ్ తొరానీ చేసిన ఈ పని ఇప్పుడు సోషల్ మీడియాలో వైరల్ గా మారింది. అలాగే కొందరు కరణ్ తొరానీ క్రియేటివిటీని మెచ్చుకుంటే, మరికొందరు మాత్రం తిట్టిపోస్తున్నారు.

కరణ్ తొరానీ కొన్ని చీరలను డిజైన్ చేశాడు. వాటి ప్రమోషన్ కోసం తాను ఈ కొత్త మార్గాన్ని ఎంచుకున్నాడు. సెక్స్ వర్కర్ల జీవితాన్ని థీమ్ గా తీసుకున్నాడు. దానికి 'చాందినీ రాతేన్' అనే పేరు కూడా పెట్టాడు. తను కొత్తగా డిజైన్ చేసిన చీరలతో ప్రచార వీడియోలు రూపొందించి వాటిని సోషల్ మీడియాలో పెట్టాడు.

రాత్రి వేళ సెక్స్ వర్కర్లు ఎలా తయారవుతారు, ఎలా చీరలు ధరించి అందాలు ఆరబోస్తారు, రాత్రి వేళ వారి హావభావాలు ఇలా అన్నింటిని తను షూట్ చేశాడు. ఈ ప్రమోషన్ వీడియోలో బాలీవుడ్ నటి తాన్య మానిక్తలా నటించడం విశేషం.

కరణ్ తొరానీ షేర్ చేసిన ప్రమోషన్ వీడియోపై నెటిజన్లు మిశ్రమంగా స్పందిస్తున్నారు. రంగురంగుల దుస్తులు, వేలాది ఖరీదైన చీరల కోసం సెక్స్ వర్కర్ల జీవితాన్ని వాడుకోవడాన్ని తప్పుబడుతూ కామెంట్లు పెడుతున్నారు. వ్యభిచారంలోని భయంకరమైన నిజాలను అందం పేరుతో కడిగివేసే ప్రయత్నమే ఇదంటూ కామెంట్ చేశాడు ఓ యూజర్.

ధనికులు మాత్రమే కొనగలిగే దుస్తులను డిజైన్ చేసి వాటిని అమ్ముకునేందుకు సెక్స్ వర్కర్ల జీవితాల ఆధారణంగా ప్రకటనలు చేయడం నీచమైన చర్య అంటూ మరో నెటిజన్ కామెంట్ చేశాడు.

కరణ్ తొరానీ ఆలోచన బాగుందని, కొత్తగా ఉందని మరికొందరు పాజిటివ్‌గా స్పందిస్తున్నారు. సెక్స్ వర్కర్ల జీవితాల ఆధారంగా ప్రకటన రూపొందించడం మంచి ఆలోచన మరొకరు కామెంట్ చేశారు.

అయితే దిల్లీకి చెందిన కరణ్ తొరానీ బాలీవుడ్ స్టార్స్ దీపికా పదుకొణే, మాధురీ దీక్షిత్, కియారా అద్వాణీ వంటి వారికి వ్యక్తిగత ఫ్యాషన్ డిజైనర్ గా పని చేశాడు. గతంలో కరణ్ తొరానీ మిథ్య పేరుతో సెవెన్ సిన్స్ థీమ్‌తో డిజైన్ చేసిన ఔట్‌ఫిట్‌లకు మంచి పేరొచ్చింది.