మీ పెదవులు ఇలా ఉంటే..గుండు జబ్బుల సంకేతమే!

అందమైన, ఆరోగ్యకరమైన పెదవులు మన ఆకర్షణను రెట్టింపు చేస్తాయి. అయితే పెదవులు కేవలం అందానికే కాదు, మన శారీరక ఆరోగ్యానికి, ముఖ్యంగా మన గుండె పనితీరుకు అద్దంలా పని చేస్తాయని మీకు తెలుసా?

మన పెదవుల రంగు, వాటిలో వచ్చే మార్పులు గుండె జబ్బులను ముందే పసిగట్టడానికి సహాయపడతాయి. గుండె పనితీరులో లోపాలు తలెత్తినప్పుడు, అవి పెదవుల ద్వారా కొన్ని హెచ్చరికలు జారీ చేస్తాయి. ఆ సంకేతాలు ఏమిటి? వాటిని ఎలా గుర్తించాలి?

పెదవులు నీలం లేదా ఊదా రంగులోకి మారడం
మీ పెదవులు సహజమైన గులాబీ రంగులో కాకుండా నీలం లేదా ఊదా రంగులోకి మారుతున్నాయా? ఇది అత్యంత ప్రమాదకరమైన సంకేతం. వైద్య పరిభాషలో దీనిని సైనోసిస్ అంటారు. అంటే రక్తంలో ఆక్సిజన్ స్థాయిలు పడిపోయాయని అర్థం.

గుండె రక్తాన్ని సరిగ్గా పంప్ చేయలేనప్పుడు శరీరానికి ఆక్సిజన్ అందదు. మీకు శ్వాస తీసుకోవడంలో ఇబ్బంది, విపరీతమైన అలసట, లేదా తల తిరగడం వంటి సమస్యలతో పాటు పెదవుల రంగు మారితే వెంటనే కార్డియాలజిస్ట్‌ ను సంప్రదించాలి. ఇది గుండె వైఫల్యానికి దారితీసే అవకాశం ఉందని నిపుణులు చెబుతున్నారు.

పాలిపోయిన పెదవులు
పెదవులు తమ సహజ రంగును కోల్పోయి, తెల్లగా లేదా పాలిపోయినట్లు కనిపిస్తే అది రక్తహీనతను సూచిస్తుంది. అయితే గుండె సంబంధిత సమస్యల వల్ల రక్త ప్రసరణ మందగించినప్పుడు కూడా ఇలా జరుగుతుంది.

పెదవులు పాలిపోవడంతో పాటు మీ చేతులు, కాళ్ళు ఎప్పుడూ చల్లగా ఉంటుంటే..గుండె నుండి రక్తం శరీర భాగాలకు సరిగ్గా సరఫరా కావడం లేదని అర్థం చేసుకోవాలి.

తగ్గని పొడిబారిన పెదవులు
చలికాలంలో పెదవులు పగలడం సహజం. కానీ మీరు రోజుకు తగినంత నీళ్లు తాగుతూ, లిప్ బామ్స్ వాడుతున్నప్పటికీ పెదవులు తరచుగా పొడిబారిపోతూ, పగులుతుంటే అనుమానించాల్సిందే.

శరీరంలో రక్త ప్రసరణ సరిగా లేనప్పుడు చర్మం తేమను కోల్పోతుంది. దీనితో పాటు కాళ్ల వాపులు, తీవ్రమైన అలసట ఉంటే అది గుండె సమస్యలకు సంకేతం కావచ్చు.

అకారణంగా పెదవుల వాపు
ఏదైనా దెబ్బ తగిలితే వాపు రావడం వేరు. కానీ ఎటువంటి కారణం లేకుండా ఉదయం లేవగానే పెదవులు ఉబ్బినట్లు అనిపిస్తే జాగ్రత్తపడాలి. శరీరం ద్రవాలను సరిగ్గా బయటకు పంపలేనప్పుడు అవి కణజాలాల్లో నిలిచిపోతాయి. దీనిని ఎడెమా అంటారు.

గుండె బలహీనపడినప్పుడు ఈ పరిస్థితి ఏర్పడుతుంది. పెదవులతో పాటు చీలమండలు, పొట్ట భాగంలో కూడా వాపు కనిపిస్తే ఆలస్యం చేయకుండా మెడికల్ టెస్టులు చేయించుకోవాలి.

పెదవుల తిమ్మిరి
ఇది చాలా అరుదైన, తీవ్రమైన లక్షణం. పెదవులు మొద్దుబారినట్లు లేదా తిమ్మిరిగా అనిపించడం సాధారణ విషయం కాదు. ఇది రక్తనాళాల్లో అడ్డంకులు లేదా నరాల బలహీనతను సూచిస్తుంది.

పెదవులతో పాటు ముఖం ఒక వైపు తిమ్మిరిగా అనిపిస్తే అది గుండెపోటు లేదా పక్షవాతానికి ముందస్తు హెచ్చరిక కావచ్చు.

మానిపోని పుండ్లు
పెదవుల మీద లేదా నోటి మూలల్లో పుండ్లు ఏర్పడి, రెండు వారాలు దాటినా మానకపోతే అది కేవలం చర్మ సమస్య కాదు. రక్త ప్రసరణ సరిగా లేనప్పుడు శరీరంలో గాయాలు త్వరగా మానవు. ఇది బలహీనమైన రోగనిరోధక శక్తిని, అంతర్లీనంగా ఉన్న గుండె సంబంధిత సమస్యలను సూచిస్తుంది.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.