ప్రెగ్నెన్సీ టైంలో శృంగారం చేస్తే.. నార్మల్ డెలివరీ అవుతుందా?

ప్రెగ్నెంట్ అయ్యాను అని తెలిసిన క్షణం నుంచి ప్రతి మహిళ మదిలో ఎన్నో ప్రశ్నలు, సందేహాలు మెదులుతుంటాయి. వాటిలో ముఖ్యమైన ఒకటి ఏంటంటే.. ప్రెగ్నెన్సీ టైంలో శారీరకంగా కలవడం సురక్షితమేనా? ముఖ్యంగా, ఇది సాధారణ ప్రసవానికి ఏమైనా సహాయపడుతుందా? ఈ ప్రశ్నకు నిపుణులు అవును, కాదు అని రెండు రకాలుగా సమాధానమిస్తారు. ఎందుకంటే ఇది పూర్తిగా గర్భిణీ స్త్రీ ఆరోగ్యం, ఆమె గర్భం స్వభావం,డాక్టర్ల సలహాపై ఆధారపడి ఉంటుంది.

ఆరోగ్యకరమైన గర్భధారణలో..ఎటువంటి తీవ్రమైన సమస్యలు లేనప్పుడు, శృంగారం పూర్తిగా సురక్షితమని డాక్టర్లు చెబుతున్నారు. ఇది దంపతుల మధ్య భావోద్వేగ బంధాన్ని పటిష్టం చేయడమే కాకుండా కొన్నిసార్లు శరీరాన్ని ప్రసవానికి సిద్ధం చేయడంలో అద్భుతంగా సహాయపడుతుంది.

సాధారణ ప్రసవానికి ఇది ఎలా తోడ్పడుతుంది?
గర్భధారణ సమయంలో సురక్షితమైన శారీరక కలయిక వల్ల సాధారణ ప్రసవానికి కొన్ని రకాలుగా మేలు జరుగుతుంది.

కటి కండరాలకు వ్యాయామం: శృంగారం సమయంలో కటి ప్రాంతంలోని కండరాలు, గర్భాశయం సహజంగానే చురుకుగా పనిచేస్తాయి. ఇది ఆ కండరాలను బలోపేతం చేసి, ప్రసవ సమయంలో బిడ్డ బయటకు రావడానికి అవసరమైన సంకోచ వ్యాకోచాలకు సహాయపడుతుంది. బలమైన కటి కండరాలు ప్రసవ ప్రక్రియను సులభతరం చేస్తాయి.

లవ్ హార్మోన్ విడుదల: శృంగారం, భావప్రాప్తి సమయంలో మన శరీరంలో ఆక్సిటోసిన్ అనే హార్మోన్ విడుదలవుతుంది. దీనిని లవ్ హార్మోన్ అని కూడా అంటారు. విశేషమేమిటంటే ఇదే హార్మోన్ ప్రసవ నొప్పులను ప్రేరేపించడానికి, గర్భాశయ ముఖద్వారాన్ని మృదువుగా చేయడానికి కూడా కారణమవుతుంది. ఇది సహజంగా ప్రసవాన్ని ప్రారంభించడంలో కీలక పాత్ర పోషిస్తుంది.

ఒత్తిడి నుండి ఉపశమనం: గర్భధారణ సమయంలో ఆందోళన, ఒత్తిడి సర్వసాధారణం. శారీరక కలయిక ఎండార్ఫిన్లను విడుదల చేసి, ఒత్తిడిని తగ్గిస్తుంది. ప్రశాంతమైన మనస్సు, శరీరం సుఖ ప్రసవానికి చాలా అవసరం.

ఎలాంటి పరిస్థితులలో దూరంగా ఉండాలి?

కొన్ని ప్రత్యేక పరిస్థితులలో శృంగారానికి దూరంగా ఉండమని డాక్టర్లు సలహా ఇస్తారు

గతంలో అబార్షన్ అయ్యి ఉండి లేదా నెలలు నిండకుండానే ప్రసవమయ్యే ప్రమాదం (ప్రీటర్మ్ లేబర్) ఉన్నప్పుడు.

జరాయువు (ప్లాసెంటా) గర్భాశయ ముఖద్వారానికి అడ్డంగా ఉన్నప్పుడు (ప్లాసెంటా ప్రీవియా).

కారణం లేకుండా రక్తస్రావం లేదా ఉమ్మనీరు లీక్ అవుతున్నప్పుడు.

సురక్షితమైన కలయిక కోసం కొన్ని చిట్కాలు
-గర్భం పెరిగేకొద్దీ పొట్టపై ఒత్తిడి పడని సౌకర్యవంతమైన భంగిమలను ఎంచుకోవాలి.
-అతివేగం, కఠినమైన పద్ధతులకు దూరంగా ఉండాలి.
-కలయిక సమయంలో లేదా తర్వాత నొప్పి, రక్తస్రావం లేదా ఏదైనా అసౌకర్యం అనిపిస్తే వెంటనే డాక్టర్ ను సంప్రదించాలి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.