సహజ ఆహారాలతో డయాబెటీస్ త్వరగా తగ్గాలంటే!

By B N Sharma

Published: Friday, May 4, 2012, 9:49 [IST]

Bitter Gourd to Cure Diabetes Disease Fast!

మధుమేహ వ్యాధి లేదా డయాబెటీస్ నేటి జీవన విధానాల కారణంగా అతి త్వరగా వ్యాప్తి చెందుతోంది. తినేటటువంటి ఆహారాలలో సరైన పోషక విలువలు లేకపోవటం, సరైన శారీరక శ్రమ లేకపోవడం వంటివి ఈ త్వరిత షుగర్ వ్యాధి వ్యాప్తికి కారణాలుగా చెప్పవచ్చు. డయాబెటీస్ వ్యాధి నియంత్రణలో లేకుంటే ఎన్నో రకాల సమస్యలను రోగికి తెచ్చిపెడుతుంది. డయాబెటీస్ రోగి తన రక్తాన్ని కనీసం నెలకు ఒకసారైనా పరీక్షలు చేయించుకుంటూ దానిని అదుపులో వుంచుకోవాలి. రక్తంలో గ్లూకోజ్ అధికంగా వుండటం వలన, నియంత్రణ లేకుంటే, రక్తనాళాలలో అడ్డంకులు ఏర్పడి గుండె జబ్బులు వచ్చే ప్రమాదం కూడా వీరికి వుంటుంది. డయాబెటీస్ వ్యాధితోపాటు రక్తపోటు కూడా సాధారణంగా వీరికి వచ్చే అవకాశాలుంటాయి.

డయాబెటిక్ రోగంతో బాధపడే వారికి సహజ ఆహారాల పరిష్కారంగా కాకర కాయ రసం ఇస్తే ఆ జబ్బు అదుపులోవుంటుందని వైద్యులు చెపుతున్నారు. ఇందులో వ్యాధి నిరోధక గుణం ఉండటం మూలాన మధుమేహ రోగులకు ఈ రసం బాగా ఉపయోగపడుతుంది. దీనిని ప్రతి రోజు ఉదయంవేళ పరకడుపున సేవిస్తుంటే డయాబెటిక్ వ్యాధి అదుపులోవుంటుంది.

కాకర కాయ రసం ఎంతో చేదైనప్పటికి దానితో పాటుగా టమాటా లేక నిమ్మకాయ వంటివి కూడా కలిపి తాగితే, ఫలితం బాగానే వుంటుంది. కాకర కాయ రసాన్ని పర గడుపును ఉదయం వేళ తీసుకుంటే కూడా మంచిదే నంటారు. కాకర కాయ రసాన్ని తయారు చేసేందుకు కావలసిన పదార్థాలు: 3 లేదా 4 తాజా కాకర కాయలు, అరచెక్క నిమ్మకాయ, చిటికెడు ఉప్పు, ఒక గ్లాసు నీళ్ళు, రెండు టమాటాలు, చిన్న కీరకాయ ఒకటి.

ఈ రసాన్ని ఎలా తయారు చేసుకోవాలంటే...కాకర కాయ, టమోటా, కీరకాయ మూడింటిని శుభ్రంగా కడిగి చిన్న ముక్కలుగా కోయండి. ఇందులో ఒక గ్లాసు నీరు కలపండి. తెల్లటి గుడ్డలో ఈ మిశ్రమాన్ని వడగట్టండి. తర్వాత నిమ్మకాయ రసాన్ని పిండి ప్రతి రోజు ఉదయం వేళ పరకడుపున తాగండి. ఇలా ప్రతి రోజు తాగితే శరీరంలోని రక్తాన్ని శుద్ధి చేయడమే కాకుండా రక్త ప్రసరణలో కూడా ఈ రసం బాగా తోడ్పడుతుందని పరిశోధకులు చెపుతున్నారు.. దీంతోపాటు ఆహారపరంగా తగిన జాగ్రత్తలు తీసుకుంటూ, క్రమం తప్పని వ్యాయామాలు చేస్తే మధుమేహవ్యాధి అదుపులోవుంటుందంటున్నారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.