అధిక సమయం కూర్చుని పని చేస్తే షుగర్ వ్యాధి!

Diabetes

oi-Nageswara

By B N Sharma

Published: Tuesday, April 17, 2012, 15:16 [IST]

కంప్యూటర్లు, ల్యాప్ టాప్ లు, ఇతర ఎలక్ట్రానిక్ పరికరాలతో పనిచేసేవారు, సాధారణంగా అధిక సమయం కూర్చునే గడుపుతారు. వీరికి శారీరక శ్రమ చాలా తక్కువగా వుంటుంది. రోజులో షుమారుగా 8 నుండి 10 గంటల సమయం వీరికి కూర్చొని పని చేయటంలోనే సరిపోతుంది. ఈ రకంగా రోజులో దీర్ఘకాలం కూర్చుని పనిచేసేవారికి అతి త్వరగా ఊబకాయం, దీనితో పాటు డయాబెటీస్ వచ్చే అవకాశం వుందంటున్నారు పోషకాహార నిపుణులు.
అంతేకాదు, ఇళ్లలోనూ, ఆఫీసుల్లోనూ ఎక్కువసేపు కూర్చుని పనిచేసేవారు మధుమేహంతో పాటు గుండెజబ్బుల బారినపడే ప్రమాదం ఎక్కువగా ఉంటుందని ఒక తాజా అధ్యయనంలో కూడా వెల్లడైంది. స్థూలకాయం, శారీరక శ్రమ లేకపోవడం లాంటివి షుగర్ వ్యాధి బారిన పడేందుకు ప్రధాన కారణాలని ఈ అధ్యయనం చెబుతోంది.

వీటన్నింటితోపాటు రోజువారీ శారీరక శ్రమలేని జీవన విధానం కూడా షుగర్ వ్యాధి పెరిగేందుకు కారణాలుగా ఉంటున్నాయని పరిశోధకులు ఒక నిర్ధారణకు వచ్చారు. ప్రతిరోజూ ఉదయం లేవగానే అరగంటపాటు వ్యాయామం చేసేవారు ఇకపై తమ ఆరోగ్యానికి ఏ ఢోకా ఉండదని అనుకుంటుంటారుగానీ... నిజానికి రోజంతా ఒళ్లు కదల్చకుండా కూర్చోవడం వల్ల కలిగే నష్టాన్ని ఈ అరగంట వ్యాయామాలు ఏమాత్రం భర్తీ చేయలేవని కూడా వారు చెబుతున్నారు.

గంటలతరబడీ అదేపనిగా కూర్చొని పని చేసుకుంటుండేవారు ఎక్కువసేపు కూర్చోకుండా... వీలైనప్పుడల్లా సీట్లోంచి లేచి, అటూ ఇటూ తిరగడం.. సెల్‌ఫోన్ మాట్లాడుతూ ఆఫీసు కారిడార్లలో పచార్లు చేయడం లాంటివి చేస్తే శారీరక కండరాలకు కదలికకలిగి అది చాలా ప్రయోజనం చేకూరుస్తుందని పరిశోధకులు చెబుతున్నారు.

ఇలా రోజూ ఆఫీసు పనిలోకూడా పచార్లు చేయడం వల్ల... ఉదయంపూట వ్యాయామాలకంటే మంచి ఫలితాలను పొందవచ్చునని పరిశోధకులు పేర్కొంటున్నారు. కాబట్టి... మితిమీరిన పనిభారంతో ఆఫీసుల్లోనూ, ఇళ్లలోనూ పనిచేసేవారు ఈ రీసెర్చిలో తెలిపినట్లుగా అవకాశం దొరికినపుడల్లా లేచి అటూ ఇటూ తిరగడం వల్ల షుగర్ వ్యాధి బారినుంచిమాత్రమే కాక, దాని కారణంగా వచ్చే గుండెజబ్బు వంటివాటినుండి కూడా తప్పించుకున్నవారవుతారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.