చర్మవ్యాధులతో బయటపడే డయాబెటీస్!

Diabetes

oi-Nageswara

By B N Sharma

Published: Wednesday, June 13, 2012, 9:39 [IST]

డయాబెటీస్ శరీరంలోని ప్రతి భాగంపై, ప్రతి అవయవంపై తన దుష్ప్రభావాన్ని చూపిస్తుంది. నిజం చెప్పాలంటే కంట్రోల్ లో లేని డయాబెటీస్ వ్యాధి మనిషి శరీరాన్ని శిధిలంగా మారుస్తుంది. డయాబెటిస్ తో బాధపడేవారిలో దాదాపు 70 శాతం మంది ఏదో ఒక సమయంలో చర్మ సమస్యలకు గురయినవారు గానే వుంటారు. ఈ చర్మ సంబంధిత సమస్యలకు చికిత్స చేసుకునే సందర్భంలోనే పలుమార్లు వీరికి డయాబెటీస్ ఉందన్న నిజం బయటపడిన సమయాలు కూడా లేకపోలేదు.

డయాబెటీస్ కారణంగా ఏర్పడే ఏ చర్మ సమస్య అయినా ముందు దశ లోనే గుర్తిస్తే, త్వరితంగా దానికి చికిత్స చేసి ఆ సమస్య నుండి రోగిని బయటపడవేసే అవకాశం ఉంది. కనుక షుగర్ బాధితులు, స్కిన్ విషయంలో ఎలాంటి జాగ్రత్తలు తీసుకోవాలి? అన్న వివరాలు మీకు తెలియజేస్తున్నాం.

- బ్లడ్ గ్లూకోజ్ అంటే రక్తంలో షుగర్ అధికంగా వున్న వారిలో స్కిన్ ఇన్ ఫెక్షన్స్ రావటానికి అవకాశాలు ఎక్కువ.
- మీ చర్మం ఎప్పుడూ పరిశుభ్రంగా ఉంచుకోవాలి. ముఖ్యంగా చర్మానికి చర్మం కలుసుకుని ఉండే చోట్ల, రాసుకుంటూ ఉండే ప్రదేశాలలో, ఎక్కువ పరిశుభ్రతను పాటించాలి. చంకలు, గజ్జలు, కాలి వేళ్ళ నడుమ, ఇలాంటి ప్రదేశాలలో పరిశుభ్రత ఎంతయినా అవసరం.
- ఎపుడూ బాగా వేడిగా ఉండే నీటితో స్నానం చేయకండి. గోరువచ్చని నీరు, లేదా చన్నీళ్ళు అత్యంత శ్రేయస్కరం గా తెలుసుకోండి.
- మీది పొడి చర్మం అయితే, మాయిశ్చరైజర్స్ వాడండి. అలాగే, డోవ్ వంటి మాయిశ్చరైజింగ్ సబ్బులు వాడవచ్చు. షుగర్ బాధితులు బేబీ సోప్స్ వాడటం వారి చర్మానికి ఎంతో మంచిదిగా చెప్పవచ్చు.
- చర్మం పైన ఏ గాయమైనా, అశ్రద్ధ చేయకుండా వెంటనే దానికి అవసరం అయిన చికత్స చేయండి.
-పలురకాల బాక్టీరియల్, ఫంగల్ ఇన్ ఫెక్షన్స్ షుగర్ రోగులను వేధించే అవకాశాలున్నాయి.
- కళ్ళపై కురుపులు రావటం, వంటిపై గడ్డలు లేవటం, చర్మంపై వెంట్రుకల మొదళ్ళలో ఇన్ ఫెక్షన్ చేరటం జరుగుతుంది.
- గోళ్ళు చుట్టూ చర్మంపై ఇన్ ఫెక్షన్ చేరే అవకాశాలు ఎక్కువ.
- చేతి వేళ్ళ మధ్య, కాలివేళ్ళ మధ్య, పెదవుల చివరలలో, గజ్జల్లో, చంకల్లో, జననాంగాల దగ్గర, మహిళలలో స్తనాల క్రింద భాగంలో, ఫంగల్ ఇన్ ఫెక్షన్స్ వచ్చే అవకాశాలున్నాయి. అశ్రద్ధ చేయకుండా వీటికి వెను వెంటనే తగు చికిత్స తీసుకోవాలి.
- చర్మం మీద బ్రౌన్ కలర్ మచ్చలు వస్తాయి. ముఖ్యంగా కాళ్ళ మీద వస్తూంటాయి. ఈ మచ్చలు దురద పెట్టవు. పుండ్లుగా మారవు. బాధించవు. దీనినే డయాబెటిక్ డెర్మోపతి అని వైద్య పరిభాషలో అంటారు. దీనికి చికిత్స అవసరం లేదు. ఇది భయపడాల్సిన సమస్య అంతకన్నా కాదు.

ఇవే కాక మరెన్నో చర్మ సంబంధిత సమస్యలు కూడా డయాబెటీస్ రోగులు పొందే అవకాశాలున్నాయి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.