గుండె ఆరోగ్యానికి తాజా పండ్లు, కూరలు!

Heart

oi-Nageswara

By B N Sharma

Published: Tuesday, April 3, 2012, 16:15 [IST]

నేటి రోజులలో గుండె సంబంధిత వ్యాధులు అధికమైపోయాయి. చిన్న వయసులోనే గుండె జబ్బులు రావటం, గుండెపోటు కారణంగా మరణాలు సంభవించటం జరుగుతోంది. శరీరంలో గుండె ఒక ప్రధాన భాగం. ఇది ఒక పెద్ద కండరం కాగా, ఇరవై నాల్గు గంటలూ పని చేస్తూనే వుంటుంది. శరీరంలోని వివిధ భాగాలకు రక్తప్రసరణ చేస్తుంది. గుండెకు సంబంధించిన రక్తనాళాలు ఏ మాత్రం ఆటంకం పొందినా గుండె జబ్బు వచ్చినట్లే. రక్తనాళాలలో ఎటువంటి అడ్డంకులు ఏర్పడకుండా మంచి ఆహారాలు, తగిన వ్యాయామం సహకరిస్తాయి. మరి గుండె ఆరోగ్యానికి ఏ రకమైన ఆహారాలు, జీవన విధానం ఆచరించాలనేది పరివీలించండి.

- ప్రతి రోజూ కనీసం ఐదు రకాల పండ్లు, కూరగాయలు తినండి.
- డైనింగ్ టేబుల్‌పై ఉప్పు లేకుండా చూసుకోండి. తినే సమయంలో అదనంగా ఉప్పు వేసుకునే అలవాటు మానండి. రోజులో ఒకటిన్నర స్పూన్అంటే షుమారుగా 2400 మి.గ్రా. ఉప్పు మాత్రమే తీసుకోండి.
- ఆల్కహాల్, తదితర మత్తు పానీయాలు తీసుకునే అలవాటు ఉంటే దానిని రెండు పెగ్గుల కంటే అధికంగా తీసుకోకండి.

- నడక గుండెకు మంచిది. రోజూ అరగంటపాటు క్రమం తప్పకుండా వేగంగా నడవడం అలవాటు చేసుకోండి.
- గుండె ఆరోగ్యంగా ఉండాలంటే మీ రోజువారీ చర్యలలో భాగంగా మెట్లు ఎక్కండి. మీరు పైకి ఎక్కితే మీ రక్తపోటు తగ్గుతుంది.
- పొగతాగే అలవాటు వుంటే వారు తక్షణమే ఈ అలవాటుకు స్వస్తి చెప్పాలి. రక్తనాళాలలో బ్లాక్స్ ఏర్పడే అవకాశాలను పొగతాగటం మరింత పెంచుతుంది.
- లిపిడ్ ప్రొఫైల్, బ్లడ్ షుగర్, బి.పి పరీక్షలను తరచుగా చెక్ చేయించుకోండి.

- కొవ్వు పదార్థాలు తక్కువగా ఉండే ఆహారాలను భుజించాలి.
- బరువును నియంత్రణలో ఉంచుకోండి. ఎత్తుకు తగిన బరువు ఉండేలా చూసుకోండి.
- సంవత్సరానికొకసారి పూర్తి ఆరోగ్య పరీక్షలు చేయించుకోండి.
- డయాబెటిస్ ఉంటే దానిని ఎల్లపుడూ నియంత్రణలో ఉంచుకోండి. వ్యాయామం చేయడం అత్యవసరమని గుర్తించండి. షుగర్ ఉన్న వారికి ప్రత్యేకించి మహిళలకు గుండె జబ్బులు వచ్చే అవకాశం ఎక్కువ అని గ్రహించండి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.