చలికాలపు హెల్త్ టానిక్..ఉసిరి లడ్డు ప్రయోజనాలు తెలిస్తే వదిలిపెట్టరు

శీతాకాలం వచ్చిందంటే చాలు చలితో పాటు అనేక రకాల ఆరోగ్య సమస్యలు కూడా మనల్ని పలకరిస్తాయి. జలుబు, దగ్గు, గొంతు నొప్పి, వైరల్ ఫీవర్లు ఈ సీజన్‌ లో సర్వసాధారణం. అందుకే ఈ సమయంలో మన శరీరాన్ని లోపలి నుండి వెచ్చగా ఉంచే రోగనిరోధక శక్తిని పెంచే ఆహారాలను తీసుకోవడం చాలా ముఖ్యం.

ప్రకృతి మనకు ప్రసాదించిన అద్భుతమైన వరాలలో ఉసిరి ఒకటి. దీనిని ఆయుర్వేదంలో దివ్యౌషధంగా పరిగణిస్తారు. ఉసిరిలో విటమిన్ సి, ఐరన్, ఫైబర్, యాంటీ ఆక్సిడెంట్లు పుష్కలంగా ఉంటాయి. అయితే ఉసిరికాయ రుచి వగరుగా, పుల్లగా ఉండటం వల్ల చాలామంది ముఖ్యంగా పిల్లలు దీనిని నేరుగా తినడానికి ఇష్టపడరు. అలాంటి వారి కోసమే ఈ అద్భుతమైన పరిష్కారం..ఉసిరి లడ్డు. ఉసిరి లడ్డు కేవలం స్వీట్ మాత్రమే కాదు, ఇదొక హెల్త్ టానిక్. చలికాలంలో ఉసిరి లడ్డు తినడం వల్ల కలిగే ప్రయోజనాలు,ఎలా తయారుచేసుకోవాలో ఇక్కడ చూడండి.

ఉసిరి లడ్డు తినడం వల్ల ప్రయోజనాలు

రోగనిరోధక శక్తికి బూస్టర్
ఉసిరిలో నారింజ పండు కంటే రెట్టింపు విటమిన్ సి ఉంటుంది. ఇది తెల్ల రక్త కణాలను పెంచి, బ్యాక్టీరియా, వైరస్‌ లతో పోరాడే శక్తిని శరీరానికి అందిస్తుంది. తరచుగా వచ్చే జలుబు, దగ్గు నుండి ఇది రక్షణ కల్పిస్తుంది.

జీర్ణక్రియ మెరుగుదల
శీతాకాలంలో జీర్ణశక్తి మందగించడం సహజం. ఉసిరిలో ఉండే పీచు పదార్థం ఆహారం సులభంగా జీర్ణమయ్యేలా చేస్తుంది. ఇది మలబద్ధకం, గ్యాస్, అసిడిటీ వంటి సమస్యలను తగ్గించడంలో సహాయపడుతుంది.

రక్తహీనతకు చెక్
ఇందులో ఐరన్ కంటెంట్ ఎక్కువగా ఉంటుంది. ఇది రక్తంలోని హిమోగ్లోబిన్ శాతాన్ని పెంచడానికి సహాయపడుతుంది. రక్తహీనతతో బాధపడేవారు రోజూ ఒక లడ్డు తినడం వల్ల మంచి ఫలితం ఉంటుంది.

చర్మానికి, జుట్టుకు మేలు
ఉసిరి రక్తాన్ని శుద్ధి చేస్తుంది. దీనివల్ల చర్మంపై మొటిమలు తగ్గి, ముఖం కాంతివంతంగా మారుతుంది. అలాగే జుట్టు రాలడాన్ని తగ్గించి, కుదుళ్లను బలపరుస్తుంది.

డీటాక్సిఫికేషన్
మన శరీరంలో పేరుకుపోయిన విష పదార్థాలను బయటకు పంపడంలో ఉసిరి కీలక పాత్ర పోషిస్తుంది. ఇది కాలేయ పనితీరును మెరుగుపరుస్తుంది.

ఉసిరి లడ్డు తయారీ విధానం

-ముందుగా ఉసిరికాయలను ఆవిరిపై ఉడికించి లేదా నీటిలో మెత్తగా ఉడికించుకోవాలి.

-ఉడికించిన ఉసిరి నుండి గింజలను తీసివేసి, గుజ్జును మెత్తగా చేసుకోవాలి.

-ఒక పాన్‌ లో నెయ్యి వేడి చేసి, అందులో ఉసిరి గుజ్జు, తురిమిన బెల్లం వేసి సన్నని మంటపై ఉడికించాలి.

-మిశ్రమం చిక్కబడుతున్నప్పుడు అందులో డ్రై ఫ్రూట్స్, యాలకుల పొడి, చిటికెడు శొంఠి పొడి వేసి కలపాలి.

-మిశ్రమం దగ్గర పడ్డాక స్టవ్ ఆఫ్ చేసి, చల్లారనివ్వాలి. గోరువెచ్చగా ఉన్నప్పుడే చేతికి నెయ్యి రాసుకుని చిన్న లడ్డులా చుట్టుకోవాలి. వీటిని గాలి చొరబడని డబ్బాలో నిల్వ చేసుకోవచ్చు.

ఎంత మోతాదులో తీసుకోవాలి?
ఏదైనా అమృతం లాంటిదైనా అతిగా తీసుకుంటే అనర్థమే. ఉసిరి లడ్డులు రోజుకు 1 నుండి 2 చిన్న సైజువి తినడం ఆరోగ్యానికి మంచిది. అంతకంటే ఎక్కువ తింటే ఎసిడిటీ లేదా కడుపులో ఇబ్బంది కలగవచ్చు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.