ఎండ దెబ్బకు చెక్: బార్లీ నీళ్లా? చెరకు రసమా? వేసవి వ్యర్థాలను తరిమికొట్టే బెస్ట్ డ్రింక్ ఏది?

వేసవి కాలంలో భానుడి భగభగలకు శరీరం లోపలి ఉష్ణోగ్రత అమాంతం పెరిగిపోతుంది. ఈ తీవ్రమైన ఎండల వల్ల శరీరం తరచుగా హీట్ స్ట్రెస్(వేడి వల్ల ఏర్పడే విషపదార్థాల చేరిక)కు గురవుతుంది. కణాలు అలిసిపోయి, డీహైడ్రేషన్ ఏర్పడి, మూత్రపిండాలపై విపరీతమైన భారం పడుతుంది. దీనివల్లే వేసవిలో నీరసం, తలనొప్పి, కడుపు ఉబ్బరం, ఎసిడిటీ వంటి సమస్యలు వేధిస్తుంటాయి. ఈ వేడిని తరిమికొట్టి శరీరాన్ని డిటాక్స్ చేయడానికి మనం ఎక్కువగా ఆశ్రయించే రెండు సహజసిద్ధమైన పానీయాలు బార్లీ నీరు, చెరకు రసం. అయితే శరీరాన్ని చల్లబరిచి, వేసవి వ్యర్థాలను బయటకు పంపడంలో ఏది నిజంగా మెరుగైనది?

అమృతం లాంటి బార్లీ నీరు..
మన అమ్మమ్మల కాలం నాటి అత్యుత్తమ సాంప్రదాయ పానీయం బార్లీ. బార్లీ గింజలను ఉడికించి, వడకట్టి తయారు చేసే ఈ నీరు శరీరంలోని వేడిని లాగేయడంలో అద్భుతంగా పనిచేస్తుంది. ఇందులో బీటా గ్లూకాన్ అనే పీచుపదార్థంతో పాటు, ఎన్నో యాంటీఆక్సిడెంట్లు ఉంటాయి.

ప్రయోజనాలు: ఇది మూత్ర విసర్జనను సాఫీగా జరిగేలా చేసి, మూత్రపిండాల ద్వారా వేసవి వ్యర్థాలను సురక్షితంగా బయటకు పంపుతుంది. ముఖ్యంగా వేసవిలో వచ్చే కడుపు మంటను, ఎసిడిటీని చల్లబరుస్తుంది. రక్తంలో షుగర్ స్థాయిలను ఒక్కసారిగా పెంచకుండానే శరీరాన్ని అద్భుతంగా హైడ్రేట్ చేస్తుంది. జర్నల్ ఆఫ్ ఫుడ్ కంపోజిషన్ అండ్ అనాలిసిస్ అధ్యయనం ప్రకారం బార్లీ నీటిలోని ఫినాలిక్ సమ్మేళనాలు ఎండ వల్ల వచ్చే ఆక్సీకరణ ఒత్తిడిని తగ్గించి కణాలకు రక్షణ కల్పిస్తాయి.

తక్షణ శక్తినిచ్చే చెరకు రసం..
వేసవిలో రోడ్డు పక్కన కనిపించే చెరకు రసం బండి చూడగానే ప్రాణం లేచి వస్తుంది. తీయటి రుచితో పాటు, తక్షణమే చల్లదనాన్ని ఇచ్చే గుణం దీని సొంతం.

ప్రయోజనాలు: ఇందులో సహజ చక్కెరలు, పొటాషియం, మెగ్నీషియం లాంటి ఎలక్ట్రోలైట్స్ పుష్కలంగా ఉంటాయి. ఎండ దెబ్బ నుండి కాపాడటంలో, వడదెబ్బకు గురైనప్పుడు తక్షణ శక్తిని ఇవ్వడంలో ఇది ఎంతో మేలు చేస్తుంది. అంతేకాదు కాలేయ పనితీరును మెరుగుపరచడంలో (బిలిరుబిన్ తగ్గించడం) చెరకు రసం అద్భుతంగా పనిచేస్తుందని ఆయుర్వేదం చెబుతోంది. ఇది స్వచ్ఛమైన రసం కాబట్టి ఇందులో కార్బోహైడ్రేట్లు, చక్కెరలు ఎక్కువగా ఉంటాయి. డయాబెటిస్ లేదా అధిక బరువు సమస్య ఉన్నవారు దీనికి దూరంగా ఉండటమే మంచిది.

నిపుణులు ఏమంటున్నారు?
మన శరీరాన్ని శుభ్రం చేయడానికి ఏ పానీయానికీ మాయాశక్తులు లేవు. మన కాలేయం, మూత్రపిండాలే ఆ పని చేస్తాయి. వాటి పనితీరును మెరుగుపరచడానికి మాత్రమే ద్రవాలు ఉపయోగపడతాయి. కాబట్టి మన అవయవాలపై భారం పడకుండా హైడ్రేట్ చేసుకోవడమే అసలైన లక్ష్యం.

మీరు దేనిని ఎంచుకోవాలి?
ఈ రెండింటి ఎంపిక మీ శారీరక అవసరాలపై ఆధారపడి ఉంటుంది.

-మీరు బరువు తగ్గాలనుకునే వారైనా, డయాబెటిస్ ఉన్నవారైనా, తరచుగా ఎసిడిటీతో బాధపడేవారైనా ఏమాత్రం ఆలోచించకుండా బార్లీ నీటిని ఎంచుకోండి.

-ఎండలో బాగా ప్రయాణించి లేదా తీవ్రమైన వ్యాయామం చేసి అలిసిపోయిన వారికి, తక్షణమే ఎలక్ట్రోలైట్స్, శక్తి కావాలనుకుంటే చెరకు రసం బెస్ట్ ఆప్షన్.

-వేసవిలో ప్రతిరోజూ తాగడానికి, శరీరాన్ని చల్లబరచడానికి బార్లీ నీరు అత్యుత్తమమైనది. ఇది సురక్షితమైనది, అన్ని రకాల ఆరోగ్య సమస్యలు ఉన్నవారికి అనువైనది. ఇక మీకు తక్షణ శక్తి కావాలనుకున్నప్పుడు అప్పుడప్పుడు ఓ గ్లాసు చెరకు రసాన్ని ఆస్వాదించండి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.