Breakup: బ్రేకప్ తర్వాత కోలుకోవడానికి ఎందుకంత సమయం పడుతోంది?

బ్రేకప్ అంత సులభం కాదు

ఓ వ్యక్తితో విడిపోవడం ఎప్పటికీ సులభమైన విషయం కాదని మనస్తత్వ నిపుణులు చెబుతున్నారు. విడిపోయిన తర్వాత సాధారణ స్థితికి రావడానికి కొన్ని సార్లు ఎక్కువ రోజులు పడుతుంది. బ్రేకప్‌ లు డిప్రెషన్‌కు ప్రమాద కారకం. ఒక అధ్యయనం ప్రకారం, మానసిక రుగ్మతల చరిత్ర లేకుండా, మీ భాగస్వామితో శృంగార సంబంధాన్ని విచ్ఛిన్నం చేయడం లాంటి ఒత్తిడితో కూడిన జీవిత సంఘటనలు వ్యక్తులలో నిరాశ వంటి స్థితికి దారితీస్తాయి. కొంత మంది బ్రేకప్ ను చాలా ఈజీగా తీసుకుంటారు. ఆ మానసిక వేదన నుండి త్వరగా కోలుకుంటారు. చాలా తక్కువ సమయంలోనే సాధారణ స్థితికి వచ్చేస్తారు.లేదా విడిపోయిన తర్వాత వారి ఒత్తిడిని ఎలా ఎదుర్కోవాలో త్వరగా నేర్చేసుకుంటారు. కానీ, కొంత మంది వ్యక్తులు నెలలు లేదా సంవత్సరాల తర్వాత కూడా ఆ ఒత్తిడిని అనుభవిస్తుంటారు. వారిని ఎప్పుడు కదిపినా ఆ భావన వారి ముఖంలో స్పష్టంగా కనిపిస్తుంది.

మనస్తత్వ శాస్త్రం ప్రకారం విడిపోయిన తర్వాత కొందరు త్వరగా కోలుకోకపోవడానికి కొన్ని కారణాలు:

1. జీవిత సంతృప్తి తగ్గిపోవడం

జీవిత సంతృప్తి అనేది ఒకరి జీవితం పట్ల సానుకూల దృక్పథాన్ని కలిగి ఉండటం. ఇది సాధారణంగా ఆర్థిక స్థితి, విద్యా స్థాయి, నివసించే ప్రదేశం, వృత్ తిపరమైన అనుభవం మరియు సంతృప్తికరమైన భావోద్వేగ సంబంధం వంటి అనేక అంశాలకు సంబంధించి లెక్కించబడుతుంది. ఒక అధ్యయనం బ్రేకప్ అయితే.. ముఖ్యంగా అవివాహిత సంబంధాలలో బ్రేకప్ అయితే, జీవిత సంతృప్తి తగ్గిపోతుంది. అది మానసిక క్షోభను పెంచుతుంది. ఇలాంటి వారిని విడిపోయిన తర్వాత నయం చేయడం కష్టం అవుతుంది.

2. ఒంటరిగా ఉండటం

విడిపోయిన తర్వాత కొందరు ఒంటరిగా ఉండటానికి ఇష్టపడతారు. ఇలా ఒంటరిగా ఉండటం వల్ల తమ బాధను దూరం చేస్తుందని నమ్ముతారు. ఒత్తిడిని ఎదుర్కోవచ్చని భావిస్తుంటారు. అయితే, ఈ ప్రక్రియలో కొందరు వ్యక్తులు ఒంటరిగా జీవించడం అలవాటు చేసుకుంటారు. వారి సోషల్ నెట్‌వర్క్‌లను కోల్పోతారు. సామాజిక ఒంటరితనం జీవన నాణ్యతను తగ్గిస్తుంది. నిరాశ వంటి దీర్ఘకాలిక వ్యాధులను ప్రేరేపించడంతో పాటు అన్ని కారణాల మరణాల ప్రమాదాన్ని పెంచుతుంది. దీంతో ఒత్తిడి నుండి వారిని బయటకు తీసుకురావడం కష్టమవుతుంది.

3. ఎమోషనల్ సపోర్ట్ లేకపోవడం

ఆరోగ్యకరమైన సంబంధంలో భాగస్వాములు తరచుగా ఒకరికొకరు మానసికంగా మద్దతునిస్తారు. సంబంధంలో విడిపోయినప్పుడు, ఒకప్పుడు సౌకర్యం, ప్రేమ మరియు భద్రతకు ప్రధాన వనరుగా ఉన్న వారికి మద్దతు ఇవ్వడానికి వారి భాగస్వామి అందుబాటులో లేకపోవడం వల్ల ఆ సపోర్ట్ లేదన్న భావన ఎక్కువ అవుతుంది. ఇది వారిని తీవ్రమైన మానసిక ఒత్తిడికి గురి చేస్తుంది. దీని వల్ల ఛాతీ నొప్పి, స్పృహ కోల్పోవడం, శ్వాస ఆడకపోవడం, వాంతులు వంటి లక్షణాలు కనిపిస్తాయి. మానసికంగా వారికి మద్దతు ఇవ్వడానికి ఇతర వ్యక్తులు ఉన్నప్పటికీ, వారు తమ మాజీ భాగస్వామి యొక్క ఎమోషనల్ సపోర్ట్ ను కోరుకునే అలవాటు నుండి బయటపడటం కష్టం.

4. చిన్ననాటి జ్ఞాపకాలు

చిన్నప్పుడు తల్లిదండ్రుల నుండి ప్రేమ, ఆప్యాయతలు పొందని వారు లేదా తల్లిదండ్రులతో పెద్దగా అటాచ్ మెంట్ లేని వారు ఇలా బ్రేకప్ సమయంలో తీవ్ర వేదనకు గురి అవుతుంటారు. ప్రేమ, ఆప్యాయత లాంటి అనుబంధం లేకపోవడంతో వాళ్లు ఒకరకమైన సంబంధాలను కోరుకుంటారు. ప్రతి వ్యక్తిలో వాటిని చూస్తుంటారు. ఇలాంటి వారు విడిపోయినప్పుడు వారిపై బ్రేకప్ ప్రభావం ఎక్కువగా ఉంటుంది. అది చిన్ననాటి చెడు జ్ఞాపకాలను మళ్లీ గుర్తు చేస్తుంది. దీని వల్ల మనోవేదన మరింత ఎక్కువగా ఉంటుంది. ఇలాంటి వారిని నయం చేయడం కష్టమని అంటారు మనస్తత్వ నిపుణులు.

5. గుర్తింపుకు సవాలు

మీ స్వీయ-అవగాహన తరచుగా సంబంధంలో మారుతుంది. ఒంటరి వ్యక్తి నుండి వేరొకరితో కలిసి జీవించడానికి చురుకుగా ప్రణాళికలు వేసుకునే వ్యక్తిగా మారడం అనేది ఒక ముఖ్యమైన జీవిత మార్పు. ఒక రిలేషన్‌షిప్‌లో ఉండటం వల్ల మన జీవితంలో కొంత భాగాన్ని ఎవరితోనైనా పంచుకోవచ్చు. అంటే కలిసి కొత్త విషయాలను అనుభవించడం, ఇలాంటి అభిరుచులను పెంపొందించుకోవడం, జోకులు వ్యక్తుల గురించి అభిప్రాయాలు లాంటివి పార్ట్ నర్ తో కలిసి ఏర్పరచుకుంటారు. బ్రేకప్‌ వల్ల గతంలో కలిసి ఏర్పరచుకున్న అనుభూతులను అసహ్యించుకోవడం మొదలు పెడతారు. దాని వల్ల స్వీయ అనుభవాలు కూడా ప్రభావితం అవుతుంటాయి. గతంలో మీకు నచ్చినది.. వారికీ నచ్చితే..దానిని మీరు దూరం చేసుకుంటారు.

చివరగా

సంబంధాలు ఎప్పుడూ సులభం కాదు. అనుభవం కష్టంగా మరియు బాధాకరంగా ఉన్నప్పటికీ ప్రజలు రిలేషన్స్ ఏర్పరచుకుంటారు. బ్రేకప్‌లు మన గురించి కొత్త విషయాలను కనుగొనడానికి, వ్యక్తిగతంగా గణనీయమైన వృద్ధిని సాధించడానికి ఉపయోగపడతాయి. మనం నిజంగా కోరుకునే సంబంధం గురించి లోతైన అవగాహనను అందించడానికి సమయాన్ని ఇస్తాయి. కాబట్టి మీరు భాగస్వామితో విడిపోయినప్పుడు, మీ జీవితం అక్కడే ఆగిపోతుందని అనుకోవద్దు. ఇంకా చూడాల్సినవి, చేయాల్సినవి చాలా ఉన్నాయని గుర్తించాలి. బ్రేకప్ తర్వాత ఒత్తిడి తీవ్రంగా ఉంటే వైద్యులను సంప్రదించాలి.