డిసెంబర్ 1నే ఎయిడ్స్ డే ఎందుకు? ప్రపంచాన్ని వణికించిన మొదటి కేసు ఎక్కడో తెలుసా?

ఏటా డిసెంబర్ 1వ తేదీ రాగానే మనందరికీ ప్రపంచ ఎయిడ్స్ దినోత్సవం గుర్తుకు వస్తుంది. ఎర్రటి రిబ్బన్ ధరించి, ర్యాలీలు తీయడం మనం చూస్తుంటాం. కానీ అసలు ఈ తేదీనే ఎందుకు ఎంచుకున్నారు? ఎయిడ్స్ అనే మహమ్మారి బారిన పడిన మొదటి వ్యక్తి ఎవరు? అన్న ప్రశ్నలు మీలో ఎప్పుడైనా మెదిలాయా?

ఈ రోజు.. కేవలం ఒక ప్రచారం మాత్రమే కాదు, ఈ వ్యాధితో పోరాడి ప్రాణాలు కోల్పోయిన వారికి నివాళి, ప్రస్తుతం పోరాడుతున్న వారికి కొండంత అండ. ఈ భయంకరమైన వ్యాధి గురించి సమాజంలో ఉన్న అపోహలను తొలగించి, అవగాహన పెంచే ప్రయత్నం.

ఈ సంవత్సరం లక్ష్యం
ప్రతి ఏటా ఒక కొత్త నినాదంతో ఐక్యరాజ్యసమితి ఎయిడ్స్ డే ని నిర్వహిస్తుంది. 2030 నాటికి ప్రపంచం నుండి ఎయిడ్స్‌ ను పూర్తిగా నిర్మూలించాలన్నది ప్రధాన లక్ష్యం. ఈ సంవత్సరం అంటే 2025 థీమ్.. అంతరాయాన్ని అధిగమించడం, ఎయిడ్స్ ప్రతిస్పందనను మార్చడం(Overcoming disruption, Transforming the AIDS response).

అంటే ఎయిడ్స్ నివారణలో ఉన్న అడ్డంకులను తొలగించి, సమాజంలోని ప్రతి ఒక్కరూ ఈ పోరాటంలో భాగస్వామ్యులయ్యేలా చేయడమే దీని ఉద్దేశ్యం.

డిసెంబర్ 1నే ఎందుకు?
1988వ సంవత్సరం నాటికి ప్రపంచవ్యాప్తంగా ఎయిడ్స్ ఉగ్రరూపం దాలుస్తోంది. ఆ సమయంలో ప్రజల్లో ఈ వ్యాధి పట్ల తీవ్రమైన భయం, అపోహలు ఉండేవి. ఆ అపోహలను తొలగించి ప్రజల్లో చైతన్యం నింపడానికి, HIV బాధితుల పట్ల ఐక్యతను చాటడానికి ఒక ప్రత్యేక రోజు అవసరమని ప్రపంచ ఆరోగ్య సంస్థ (WHO) భావించింది. అయితే డిసెంబర్ 1వ తేదీని ఎంచుకోవడానికి ఒక ఆసక్తికరమైన కారణం ఉంది.

సంవత్సరం చివరలో వచ్చే ఈ నెలలో ప్రజలు కొత్త సంవత్సరానికి సిద్ధమవుతూ, సామాజిక బాధ్యత పట్ల ఎక్కువ శ్రద్ధ వహిస్తారని, మీడియా దృష్టిని ఆకర్షించడానికి ఇదే సరైన సమయమని భావించి ఈ తేదీని ఖరారు చేశారు. అలా 1988లో మొట్టమొదటిసారిగా ప్రపంచ ఎయిడ్స్ దినోత్సవాన్ని జరుపుకున్నారు.

ఎయిడ్స్ బారిన పడిన తొలి వ్యక్తి ఎవరు?
ఎయిడ్స్ అనగానే మనకు ఇటీవలి కాలంలో వచ్చిన వ్యాధి అనిపిస్తుంది. కానీ దీని మూలాలు చాలా లోతుగా ఉన్నాయి. పరిశోధనల ప్రకారం, హెచ్ ఐవి (HIV)కి సంబంధించిన మొట్టమొదటి కేసు 1959లోనే వెలుగుచూసింది.

కాంగో దేశంలోని కిన్షాసా నగరానికి చెందిన ఒక వ్యక్తి నుండి సేకరించిన రక్త నమూనాను, దశాబ్దాల తర్వాత ఆధునిక పద్ధతుల్లో పరీక్షించగా అందులో హెచ్ఐవి ఆనవాళ్లు ఉన్నట్లు తేలింది. అంటే ప్రపంచానికి తెలియక ముందే ఈ వైరస్ నిశ్శబ్దంగా తన ఉనికిని చాటుకుంది.

వ్యాధి కంటే వివక్షే ప్రమాదకరం
నేటికీ ఎయిడ్స్ అంటే ఒక సామాజిక కళంకం అనే భావన పోలేదు. మందులు లేని కాలంలో ఎయిడ్స్ అంటే మరణశాసనం అని భయపడేవారు. కానీ నేడు వైద్యరంగం అద్భుతమైన ప్రగతి సాధించింది. సరైన సమయంలో హెచ్ఐవిని గుర్తించి, మందులు వాడితే బాధితులు కూడా సాధారణ వ్యక్తుల లాగానే ఆరోగ్యకరమైన, దీర్ఘకాలిక జీవితాన్ని గడపవచ్చు.

ఎయిడ్స్ అనేది ఒక నేరం కాదు, అది ఒక అనారోగ్యం మాత్రమే. బాధితులకు కావాల్సింది మన జాలి కాదు, మన స్నేహం,తోడ్పాటు. వారిని దూరంగా పెట్టడం కాదు, దగ్గరకు తీసుకోవడం మన బాధ్యత.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.