మీ చిన్నారి రూమ్ ఎలా అలంకరించాలి?

Decor

oi-Nageswara Sharma

By B N Sharma

Published: Tuesday, September 6, 2011, 10:55 [IST]

పిల్లల గదులను ఆకర్షణీయంగా చేయాలనుకుంటారు తల్లితండ్రులు. అందునా మొదటి సారి తల్లితండ్రులవుతున్నారంటే మరింత ఆనందంగా అన్ని ఏర్పాట్లు చేసి గదిని అలంకరించేందుకు ప్రయత్నం చేస్తారు. కొంతమంది పిల్లలకేమీ తెలియదని అలంకరణ అవసరం లేదని భావిస్తారు. కాని అది సరికాదు. బేబీ అన్ని విధాలా అభివృద్ధి చెందాలంటే మీరు బేబీ పట్ల అనుసరించే మార్గాలు సరైనవై వుండాలి. బేబీని చీకటి గదిలాంటి వాటిలో పెంచితే పెంపకం మంచి ఫలితాలనివ్వదు. అంతేకాదు బేబీని దృష్టిలో పెట్టుకొని సంతోషకరంగా చేసే పనులు మీకు కూడా మంచి ఆనందాన్నిస్తాయి.బేబీ గదిని ఎలా అలంకరించాలో చూద్దాం -

ప్రధానంగా బేబీకి ఊయల కావాలి. ఆకర్షణీయమైన, గట్టిగా వున్న ఊయల కొనండి. దానికి పై భాగంలో బొమ్మలు, రిబ్బన్లు, గిరగిర తిరిగే బొమ్మలు కట్టి చక్కటి ధ్వనులు వచ్చేట్లు చేయండి. ఈ చక్కటి తక్కువ స్ధాయిలోని ధ్వనులను వింటూ బేబీ నిద్ర పోయే అవకాశం వుంది. బేబీ గది గోడలు సగం వినీల్ ఫ్లోరింగ్ తో కప్పబడి వుండాలి. ఎందుకంటే బేబీ పెరిగి పెద్దవాడైనపుడు గోడల నిండా కొన్ని గీతలు, చిత్రాలు, అక్షరాలు వేసే అవకాశం వుంది. వాటిని మరల తుడిచేయవచ్చు. గదిని లైట్ కలర్లు వేసి అలంకరించండి. బేబీ కళ్ళకు బ్రైట్ గా కనపడి ఆహ్లాదం కలిగిస్తుంది. బేబీ బొమ్మలను కూడా వివిధ ర్యాక్స్ లో పెట్టి వారికి అవసరమైన రీతిలో వయస్సుకు తగ్గట్లు అందుబాటులో వుంచండి. బేబీ గుడ్డలను గదిలో చిందరవందరగా పారేయకుండా, ఒక క్లాత్ బ్యాగ్ ను వుంచి బేబీ నుండి తీసివేసిన గుడ్డలను అందులో పెట్టి తర్వాత వాషింగ్ కు పంపండి.

గదిలో లైటింగ్ బాగానే వుండాలి కాని, అది బేబీ కండ్లకు హాని కలిగించే విధంగా వుండరాదు. బేబీ చిన్ని కళ్ళను కాపాడటానికి ఆహ్లాదాన్నిచ్చే ట్యూబ్ లైట్ వెలుగు లేదా ఫ్లోరసెంట్ ల్యాంప్ లను గదిలో అమర్చండి. బేబీకి చేసే ఈ ఏర్పాట్ల వెనుక బేబీ భవిష్యత్తుకు ఉపయోగపడే చక్కటి భావనలున్నాయని సైంటిఫిక్ గా కూడా తేలింది.