కేన్ ఫర్నిచర్ సొగసులు చూడతరమా?

Decor

oi-Nageswara

By B N Sharma

Published: Thursday, September 29, 2011, 12:45 [IST]

సాధారణంగా కేన్ ఫర్నిచర్ ను పెద్ద పెద్ద బంగళాలలో బయట పచ్చటి లాన్ లలో వేస్తూ వుండటం చూస్తాం. బహుశ, అందరూ అందుకనే ఇవి చాలా ఖరీదైనవని భావిస్తారు. కేన్ ఫర్నిచర్ బాగుంటుంది. కాని అది అధిక వ్యయంతో కూడినది కానే కాదు. ఈ రోజుల్లో ప్రతి వారూ తమ ఇండ్లలో లెదర్ లేదా వుడెన్ ఫర్నిచర్లకు ప్రాధాన్యతనిస్తున్నారు. సాంప్రదాయక అలంకరణలో భాగంగా బీరు ఇంటిని తీర్చి దిద్దాలనుకుంటే కేన్ ఫర్నిచర్ ఉత్తమమైనది. అందరికి మీ అభిరుచి డిఫరెంట్ గా కూడా కనపడుతుంది.

మీరు గనుక ఇంటిలో కేన్ ఫర్నచర్ అలంకరించాలనుకుంటే దానిని గూర్చి పూర్తిగా తెలుసుకోండి.
మొదటగా. కేన్ ఫర్నిచర్ అనేది గార్డెన్ లోనే వుండాలి...అనే భావనను తొలగించుకోండి. బహుశ, మీరు బీచ్ రిసార్టులకు వెళ్ళే వుంటారు. ఆ రిసార్టులో అన్నీ కేన్ ఫర్నిచరే వుంటాయి. అక్కడ అవి బాగుంటే, మీ లివింగ్ రూమ్ లో ఎందుకు బాగుండవు? ఆలోచించండి. మీరు కొద్దిపాటి ఫర్నిచర్ తో కొత్తగా కాపరం పెట్టుకుంటుంటే, చక్కగా గుండ్రటి ఈ వెదురు ఫర్నిచర్ వాడండి. జాగా కలిసి వస్తుంది. వీటి డిజైన్లు చాలా సన్నంగా వుంటాయి. సాధారణంగా ఏడు లేదా ఎనిమిది వేల రూపాయలలో పూర్తి సెట్ వచ్చేస్తుంది. అయితే, వీటిలో వేసే కుషన్లు మెత్తనైనవిగా చూడండి. వచ్చిన అతిధులకు అసౌకర్యం వుండరాదు. ఇంటిలో సీటింగ్ కెపాసిటీ పెంచటానికి కేన్ స్టూల్స్ బయట కూడా పడేసి వుంచండి. అనుకోకుండా అతిధులు అధికంగా వస్తే ఉపయోగపడతాయి. బీన్ బ్యాగ్స్ లేదా వుడెన్ బల్లల తో పోలిస్తే ఇవి చవక. ఒక్కొక్కటి రూ.500 లకే వచ్చేస్తాయి. కేన్ కుర్చీలతోపాటు గ్లాస్ టాప్ వున్న టేబుల్ కూడా వేయండి. డైనింగ్ రూమ్ లో చాలా బాగుంటాయి. ఇంటిలో అంతా కేన్ ఫర్నిచరే ఉపయోగిస్తూంటే, కొన్ని ల్యాంప్ షేడ్లు కూడా కేన్ తయారీ గలవి కొనండి. ఇవి వివిధ డిజైన్లలో వస్తున్నాయి. ఫర్నిచర్ తో కలిపి ఇవి బాగుంటాయి.

భారతదేశంలో మంచి కేన్ అస్సాం రాష్ట్రం నుండి వస్తుంది. కేన్ మెటీరియల్ తో పెన్ హోల్డర్స్ నుండి టెలిఫోన్ స్టాండ్ వరకు అన్ని పరికరాలు వస్తున్నాయి. అయితే, మార్కెట్ లో చవకగా దొరికే కేన్ మన్నికనీయదు. దాని జోలికి పోకండి. కేన్ ఫర్నిచర్ సహజ ప్రకృతి వాతావరణానికి సరిపడి వుంటుంది. చవకగా వచ్చే ఈ ఇంటి అలంకరణ చూడటానికి ఎంతో బాగుండటమే కాక మీ జేబుకు భారీగానూ వుండదు.