కంటికి ఇంపైన ఇంటిగోడల అలంకరణ!

Decor

oi-Nageswara

By B N Sharma

Published: Wednesday, October 5, 2011, 11:40 [IST]

ఒక్క ఫొటో ఫ్రేమ్ కూడా గోడకు వేలాడని ఇల్లు చూశారా? బహుశ ఎక్కడా వుండి వుండదు. ఫొటోలు సాధారణ బొమ్మలకంటే కూడా ఎంతో అర్ధవంతంగా వుంటాయి. అవి ప్రతి కుటుంబంలోను చెరగని స్మృతులు. తెలిసో తెలియకో ప్రతి ఇంట్లోనూ కొన్ని ఫొటో ఫ్రేములు గోడలకు వేలాడదీస్తూనే వుంటాం. కనుక ఈ ఫొటో ఫ్రేములను ఒక పద్ధతిగా పెడితే ఇంటికి మరింత అలంకరణ చేసినట్లవుతుంది. కావలసినవన్నీ మీకు మీ ఫొటో ఆల్బంలో లేదా ఫేస్ బుక్ ఎకౌంట్ లో దొరుకుతూనే వుంటాయి. అదంతా ఉపయోగించి మీ ఇంటి గోడల అలంకరణ తక్కువ వ్యయంతో సృజనాత్మకంగా పూర్తి చేయండి.

ప్రతి ఇంటీరియర్ అలంకరణ వెనుక ఒక ప్రధాన భావన వుంటుంది. మీ ఫొటోగ్రాఫుల ఏర్పాటు ఒక కధలా వుండాలి. ఒక ఫొటోలో ఆనందదాయక కుటుంబాన్ని చూడాలనుకుంటే తల్లి, తండ్రి వీరితోపాటు అటు, ఇటు పిల్లలు వుండాలి. లేదంటే, కుటుంబ సభ్యలందరూ కలసిన ఫొటో వుండాలి వయసులను బట్టి ఏదో ఒక పద్ధతిలో వుండాలి. ఫొటోలు ఎలా పెట్టినా మీ ఏర్పాటు వెనుక ఒక లాజిక్ వుండాలి.

ఫ్రేములతో అలంకరణ చేసేటపుడు వివిధ సైజుల ఫొటోలు ఉపయోగించండి. ఒకే సైజు ఫొటోలు చూసేవారికి విసుగు పుట్టిస్తాయి. పైగా అన్ని గోడలకు ఒకే సైజు ఫొటోలు కూడా బాగుండవు. ఒక పెద్ద గోడకు చిన్నపాటి 6 x 6 అంగుళాల ఫొటో ఫ్రేము పెట్టలేరు. అదేవిధంగా ఒక పెద్ద ఫొటోను ఒక చిన్నగోడకు పెట్టటం కూడా అంత బాగుండదు. గుండ్రం, ఓవల్, చతురస్రం, దీర్ఘ చతురస్రం ఫొటోలు ఆసక్తికరంగా వుంటాయి. ఫ్రేము సైజును బట్టి మీ ఫొటో పెద్దది లేదా చిన్నది చేయవచ్చు. ఒక లేటెస్ట్ ఫొటో ముందుగా వుంచి, అదే వరుసలో గత చరిత్రను గుర్తు చేసే ఫొటోలు పెడితే ఆ వ్యక్తికి సంబంధించి ఒక స్టోరీలా వచ్చేస్తుంది. ప్రత్యేకించి మీ గ్రాండ్ పేరెంట్స్ వంటి వారికి ఈ ఏర్పాటు బాగుంటుంది. బెడ్ రూమ్ లోకి ప్రవేశించగానే అక్కడ గోడలకున్న బొమ్మలు అది ఎవరి గదో వెంటనే తెలియపరచాలి. ఆ గదిలో వుండే వారి బొమ్మలు అధికంగా వుండాలి. ఆ వ్యక్తి ఇతరులతో కలసి వివిధ సమయాలలో తీయుంచుకున్న ఫొటోలు సైతం పెట్టవచ్చు.

ఫొటో ఫ్రేములు పెట్టేటపుడు వాస్తు పరంగా కూడా జాగ్రత్త పడండి. ఆనందాలు చిందించే కుటుంబ సభ్యుల ఫొటో లివింగ్ రూమ్ లో వుండటం సరికాదంటారు. ఇంటికి వచ్చిన అతిధులకు మీ ఆనందాల హరివిల్లుపై చెడుకన్ను పడితే చెడు కలుగగలదని భావిస్తారు. అదే విధంగా ఈ రకమైన ఫొటో నైరుతిమూలగల మాస్టర్ బెడ్ రూమ్ లో నైరుతి దిశగా పెడితే కుటుంబ యజమానికి ఆనందాన్ని కలిగిస్తుంది. ఇటువంటి నియమాలు, మీకు తెలిసినట్లయితే, పాటించడం మంచిదే.