దీపావళికి లైట్ల అలంకరణ ఎలా?

ఎలక్ట్రానిక్ లైట్ల అలంకరణ వలన ప్రయోజనాలు పరిశీలిస్తే....
మొదటగా, అలంకరణ చేయటం చాలా తేలిక. స్విచ్ వేయటం వరకే చాలు. వాటికి నూనె పోయనక్కర లేదు. ఆరిపోతాయనే భయం లేదు. వాటిలో మంట వుండదు కనుక కొంతమేరకు సురక్షితం కూడాను. దీపావళి కొత్త దుస్తులు మంటకు అంటుకుంటాయన్న భయం లేదు. గతంలోని నూనె ప్రమిదలకంటే కూడా వివిధ డిజైన్లలో ఎలక్ట్రానిక్ దీపాలు వస్తున్నాయి. కనుక ఈ లాభాలన్నీ పరిశీలిస్తే, ఇక పండుగకు లైట్లు ఎపుడు పెట్టేద్దామా అని కూడా మీకు అనిపించవచ్చు. ఆ అలంకరణకు అవసరమైన కొన్ని సూచనలు చూడండి. మార్కెట్ లో ఎలక్ట్రానిక్ బల్బుల తోరణాలు రెడిగా లభ్యమవుతాయి. ఇంటి బయట పెట్టటానికి ఈ లైటింగ్ బాగుంటుంది.

ఇపుడు ఈ లైట్ల తోరణాలలో ఆరి వెలిగేవి, నిరంతరం వెలిగేవిగా వుండే బల్బులు వివిధ రంగులలో వస్తున్నాయి. బల్బులు పైకి కనపడకుండా ట్యూబులలో వుండే విధంగా వస్తున్నాయి. అటువంటివి కొనుగోలు చేస్తే ఇంటి బయట వాటిని ఏ ఆకారంలో కావాలంటే ఆ ఆకారానికి అలంకరణ చేసుకోవచ్చు. డిస్కో ఎఫెక్టులనిచ్చే లైట్లు కూడా వస్తున్నాయి. సాంప్రదాయక లాంతర్లలో ఎలక్ట్రిక్ బల్బులు పెట్టి కూడా కొత్తగా తయారు చేస్తున్నారు. ఎక్కడ కావాలంటే అక్కడ ఇవి కొనుగోలుకు లభిస్తున్నాయి.

కొత్తగా వస్తున్న పేపర్ లాంతర్లు చాలా ఆకర్షణీయంగా వుంటున్నాయి. తోరణాలమధ్య అక్కడక్కడా లాంతర్లు పెడితే అలంకరణ చాలా బాగుంటుంది. మరింత ఆకర్షణ కొరకు ఎలక్ట్రానిక్ బల్బులపై మనకు నచ్చిన రంగు పేపర్లను కూడా చుట్టవచ్చు. కనుక ఆధునిక లైటింగ్ అలంకరణలు మీ ఇంటి ముంగిట చేసి హైటెక్ అనిపించుకోండి.