ఎప్పటికి వెలిగే దీపాలు!

Decor

oi-Nageswara

By B N Sharma

Published: Monday, October 24, 2011, 9:38 [IST]

దీపావళి పండుగకు దీపాలను మట్టి ప్రమిదలలో వెలిగిస్తారు. ఈ ప్రమిదలను ఇంటిలోపల, ఇంటి బయటి ఆవరణలో ప్రతి మూల పెట్టి చీకటిని లేకుండా చేస్తారు. ఐశ్వర్య దేవత లక్ష్మీ దేవి ఇల్లు పరిశుభ్రంగా వుండి దీపాలను పెడితే ఆ ఇంటికి తప్పకుండా వస్తుందని హిందువులు విశ్వసిస్తారు. దీపాల అలంకరణకు గాను ఇపుడు వివిధ రకాల డిజైన్లలో తయారు చేసిన ప్రమిదలు వస్తున్నాయి. వాటికి మనకు నచ్చిన రంగులు వేసి అవి ఎప్పటికి ఉపయోగపడేలా అలంకరణ చేయవచ్చు. ఇంటి అలంకరణకు ఎంతో బాగుంటాయి. ఆధునిక దీపాల అలంకరణ ఎలా అన్నది పరిశీలిద్దాం.

1. ప్రమిదలకు రంగులు వేయండి. అవి వివిధ ఆకారాలలో వుండేలా చూస్తే మరింత బాగుంటుంది.
2. ప్రమిదలకు ఫ్యాబ్రిక్ లేదా ఎక్రిలిక్ పెయింట్ వేస్తే నూనె లేదా నీటిలో తడసినా పోదు.
3. ప్రమిదలను ఒక అరగంట నీటిలో నానపెట్టండి. ఆరిన తర్వాత రంగు వేయండి. ఎరుపు, ఆకుపచ్చ, పింక్, పసుపు, ఆరెంజ్ మొదలైన బాగా కనపడే రంగులు వేయండి.
4. ఒకే ప్రమిదకు రెండు రంగులు కూడా వేయవచ్చు.
5. రంగు వేయడానికి సన్నని లేదా మందపాటి కుంచెలు రెండూ ఉపయోగించి వివిధ డిజైన్లు వేయవచ్చు.
6. 3 లేదా 4 గంటల పాటు రంగు ఆరబెట్టండి.
7. అంచులకు బంగారు రంగు వేస్తే బాగుంటుంది. సన్నని కుంచె వాడి అంచులు గీయండి.
8. దీపాలకు రంగు రంగుల పూసలు, లేదా గాజు ముక్కలు అంటించండి. లేదా ఓం అక్షరాన్ని వ్రాసి దానిని మరింత ఆకర్షణీయం చేయండి.

ఈ ప్రమిదల అలంకరణ చేసి పండుగనాడు వాటిని వెలిగించి మీ ఇంటి అలంకరణ ఆకర్షణీయంగా వుండేలా చేసుకోండి.