వెదురు ఫర్నీచర్ తో ఇంటి ఆకర్షణ రెటింపు...

Decor

oi-Saraswathi

By Sindhu

Published: Saturday, February 18, 2012, 14:52 [IST]

బ్యాంబు (వెదురు) మానవులకు అనేక రకాలుగా ఉపయోగపడుతుంది. ఇల్లు కట్టుకోవడానికి, నిచ్చెనలు, బల్లలు, కుర్చీలు, బుట్టలు, తట్టులు...ఇలా రకరకాలుగా వెదురు గహోపకరణాలలో వినియోగిస్తున్నారు. కాగితం తయారీలో గుజ్జు చేయడానికి వెదురు వాడుతారు. వెదురు (బ్యాంబు) లేదా గడ అనే మొక్కలు మానవ గృహ అవసరాలు, నిర్మాణాలకు అత్యధికంగా వినియోగించు వృక్షజాతి. వెదురుతో తయారైన వస్తువుల పట్ల నేడు మహిళలు ఎంతో ఆసక్తి చూపిస్తున్నారు. ముఖ్యంగా శుభకార్యాలలో వీటిని ఎక్కువగా ఉపయోగిస్తున్నారు. వీటికి క్రమ,క్రమంగా ఆదరణ పెరుగుతుండడంతో వెదురు కళాకారులు మరింత ఆకర్షణీయంగా బుట్టలను తయారుచేస్తున్నారు.ప్రస్తుతం వెదురుతో చేసిన బుట్టలలో బహుమతులను అందించడం నగరాలలో ఫ్యాషన్‌గా మారింది.

ఇదివరకు వెదురును కేవలం హస్తకళా రూపాల తయారీలో మాత్రమే ఉపయోగించేవారు. కానీ ప్రస్తుతం ఇంటీరియర్ డెకరేషన్ కోసం వెదురు విస్తృతంగా వెలుగులోకి వచ్చింది. చాలాచోట్ల కలప, ప్లాస్టిక్‌లకు ప్రత్యామ్నాయంగా ఉపయోగపడుతున్న వెదురుతో చాపలు, రకరకాల బుట్టలు, ట్రేలు అల్లడమే మనకు తెలుసు.

అయితే... విశాలమైన గదుల్లో పార్టిషన్‌ లాగా కూడా అందంగా రూపొందించిన వెదురు తడికెలను ఉపయోగించవచ్చు. వెదురు ప్యానెల్స్‌ని పైకప్పుతో మొదలెట్టి గోడలమీద వాడవచ్చు. తలుపులు, ఫర్నీచరు, అల్మారాలు తయారు చేసుకోవచ్చు. ఇప్పుడు కొత్తగా కలప బదులుగా ఫ్లోరింగ్‌కు కూడా వెదురును వాడుతున్నారు. కిటికీలకు వెదురు బ్లెండ్స్ వేయించుకుంటే వెరైటీగా ఉంటుంది.

మహిళల అభిరుచులకు అనుగుణంగా వెదురు వస్తువులను తయారు చేస్తున్నారు. పూజా సామగ్రి తీసుకువెళ్లే బుట్టలతో పాటు వెదురు స్టూళ్లు, కుర్చీలు, టేబుళ్లు, సోఫా సెట్లకు నేడు మంచి డిమాండ్‌ ఉంది. వెదురు చౌక మాత్రమే కాదు. వస్తువుల మెయింటనెన్స్ చాలా తేలికే. తరచుగా తడి వస్త్రంతో తుడుచుకుంటే సరిపోతుంది. ఆరునెలలకొకసారి వార్నిష్ వేయిస్తే కొత్తగా మెరుస్తూ ఉంటాయి. పాడయిపోయిన వస్తువును మరో కొత్త వస్తువుగా మార్చుకోవచ్చు కూడా.

వెదురు ఫర్నీచర్ లామినేషన్ చేసి ఉంటుంది కాబట్టి త్వరగా గీతలు పడడం, పాడవడం జరగదు. వాడగా వాడగా కుర్చీల వంటివి కాళ్ల దగ్గర చీలీ పోయి పాడవుతాయి. అందువల్ల చీలిన చోట ప్లాస్టిక్ గట్టిగా బిగిస్తే చూడడానికి నీట్‌గా ఉంటాయి. చాలాకాలం మన్నుతాయి. అంతేకాదు పర్యావరణానికి హాని చేయకుండా ఇంటి అలంకరణ పూర్తిచేయవచ్చు.