అసలుసిసలైన ఇంటికి అభిరుచితో పాటు అలంకరణ అవసరం...

Published: Thursday, May 3, 2012, 16:54 [IST]

సాధారనంగా మనం ఎవరింటికైనా వెళ్లినపుడు ఆ ఇల్లును చూడగానే ఆ ఇంటి గృహిణి అలవాట్లు, క్రమశిక్షణ తెలుసుకోవచ్చు. ఇల్లు పిల్లల ఆటలతో, ఆట బొమ్మలు, క్యారం బోర్డుతో మిగిలిన వస్తువులు చిందర వందరగా వుంటే ఇంట్లో కాలుపెట్టలేము. మొజాయిక్ ఫ్లోరింగ్ వుండి ఇల్లు నీటితో, మరకలతో వుంటే ఎక్కడ జారిపోతామో అనే భయంతో కాలిలో కాలువేసి జాగ్రత్తగా అడుగుపెట్టాలి. అసలు గృహిణి బాధ్యతలు ఎన్నో వున్నాయి. ఇంకొకరు తనను వేలెత్తి చూపుతారేమో అన్న అనుమానాలు వదిలిపెట్టి ఇంటిని ఒక పద్ధతిలో అమర్చుకుని నిర్వహించాలి.

వాటితో పాటు ఇంటికి ఆహ్లాదకరమైన రంగులు, పుష్కలమైన గాలీ వెలుతురు, అందాలొలికే ఫర్నీచర్ తో ఎక్కడి వస్తువులక్కడ అమర్చడంతో ఆ ఇంటి సౌందర్యం సొంత చేసుకుంటుంది. ముఖ్యగా పరిశుభ్రత. కాలికి దుమ్ము కణ తగలకుండా మూలలతో సహా ఎక్కడా బూజు పట్టకుండా, బల్లులు, సాలీడులు లాంటి జీవాలు దర్శనమివ్వకుండా వావ్ అపించేటట్లు సర్ధుకుంటే ఆ ఇంటికి వందకి వందశాతం మార్కులు వేయ్యెచ్చు.

వంటిల్లు... సర్వ సామాన్యంగా ఇల్లాళ్ళు ఎక్కువసేపు గడిపేది ఇక్కడే. ఉదయం కాఫీతో ప్రారంభమైతే రాత్రి పెరుగు తోడేసేందుకు పాలు కాచడం వరకూ అంతా అక్కడేగా! వంటిల్లు ఎంత పొందిగ్గా, శుభ్రంగా వుంటే మనకు అంత సుఖంగా, శాంతంగా వుంటుంది. ఉప్పు, పప్పు, పంచదార, టీపొడి డబ్బాలను ఎప్పటికప్పుడు శుభ్రంగా, వరుసక్రమంలో సర్దుకోగల్గితే చూడ సొంపుగా వుండి అవసరమైనవి సులభంగా దొరుకుతాయి. ఏవీ పుచ్చిపోవు, పాడైపోవు. అల్మారాలను డెటాల్‌ కలిపిన నీళ్ళతో తరచు తుడిస్తిే బొద్దింకలు కాదుగదా, బాక్టీరియా క్రిములు కూడా మన ఇంటివైపు తొంగిచూడవు.

హాలు విశాలంగా వుంటే దానికి తగ్గ పెద్ద పెద్ద సోఫాసెట్లను ఎంచుకోవాలి. లేనిపక్షంలో స్థలం ఆక్రమించని, సుఖంగా ఆసీనం కాగలిగే సోఫాలను కొనుక్కోవడం ఉత్తమం. నడుం నొప్పి గట్రా రాకుండా సౌఖ్యంగా కూర్చోగల్గడం ఎంత ముఖ్యమో, వాటివల్ల ఇల్లు శోభించడం కూడా అంతే ముఖ్యం. టీపాయ్‌ ఏదో ఒకటి అని సరిపెట్టుకోకుండా సోఫా లేదా కేన్‌ కుర్చీలకు అనుకూలమైన దాన్ని ఎన్నుకున్నట్లయితే వన్నె పెరుగుతుందంటారు ఇంటీరియర్‌ డిజైనర్లు. టీపాయ్‌మీద పాత పేపర్లను పచడడం చాలామందికి అలవాటు. దీనివల్ల ఇంటి అందం తగ్గుతుందని గుర్తుంచుకుని, వాటిని లోపల వరుసగా భద్రపరిస్తే సరి. ఇల్లు కొత్త పెళ్ళికూతురిలానూ వుంటుంది, అవసరమైన పాత పేపర్‌ తేలిగ్గానూ దొరుకుతుంది.

ఇక పడకగదుల్లో వీలైతే రోజూ లేదంటే వారానికి రెండుసార్లయినా దుప్పట్లు మార్చి ఉతికించుకుంటే మనసు, శరీరం కూడా సేదతీరతాయి. బెడ్‌షీట్లు, కప్పుకునే దుప్పట్లకు ఆకర్షణీయమైన రంగులు, డిజైన్లు వుండేలా ఎంచుకోవడం మన చేతిలో పనేకదా! ఇందులో మన అభిరుచి ప్రతిఫలిస్తుంది. ఖరీదెంత అనేదానికంటే కూడా ఎంత అందమైనవి అనేదానికే మెజారిటీ ఓటేస్తారు. మన అభిరుచి గొప్పగా వుండాలేకానీ తక్కువ ధరతో కూడా ఆకట్టుకునే వస్తువులు, దుస్తులను ఎంచుకోవచ్చు.