ఇంటి అందం..హుందాతనం..సౌకర్యవంతాన్నిచ్చే సోఫాలు....

Decor

oi-Saraswathi

By Sindhu

Published: Tuesday, April 10, 2012, 13:17 [IST]

అందంగా నిర్మించుకొన్న ప్రతి ఇంట్లో హాల్లో..డ్రాయింగ్ రూముల్లో సోఫాలు తప్పనిసరిఅయింది. ఇంటికి కావాల్పిన ఫర్నీచర్ కొనేటప్పుడు కొన్ని మెళుకువులను పాటించి తీసుకోవాలి. ఇంటీరియర్‌లో రంగులకెంత ప్రాధాన్యమందో, ఫర్నీచర్‌కూ అంతే ప్రాముఖ్యం ఉంది. అందంగా రంగులు అద్దితే సరిపోదు. దానికి అనువైన ఫర్నీచరూ ఉండాలి. లేకపోతే ఇల్లంతా బోసిపోయినట్లుంటుంది. ఇంటికి కావాల్సిన ఫర్నీచరు కొనేటప్పుడు చాలామంది చేసే పొరపాటు ఏంటంటే.. వస్తువుల పైపై మెరుగులను చూసి కొనేయడం. మనం డబ్బు పెట్టి కొనే వస్తువు అందం ఎంత ముఖ్యమని భావిస్తామో, వాటి నాణ్యత కూడా అంతే ముఖ్యం అన్న విషయాన్ని ఆయా సందర్భాల్లో మర్చిపోతుంటారు. అందుకే వాటి ఎంపికలో కొన్ని జాగ్రత్తలు తీసుకోవాలి. ఈ ఫర్నీచర్‌లో ముఖ్యమైనవి సోఫాలే. వాటి సెలక్షన్ ఎలాగుండాలి..నాణ్యమైనవా లేదా అని తెలుసుకోవాలంటే ఏం చేయాలో చూద్దాం..

1. సోఫా సెట్ కొనే ముందు ఎంపిక చేసుకున్న సోఫాసెట్‌పైన కనీసం పది నిమిషాలపాటు కూర్చోవాలి. అలా చేయడంవల్ల అది సౌకర్యంగా ఉన్నదీ, లేనిదీ తెలుస్తుంది. చేతులు పెట్టుకునే చోట, కింద, వెనక వైపున అంతా సమంగా... మెత్తగా ఉందా లేక ఎక్కడైనా గట్టిగా ఫ్రేమ్ తగులుతోందా అన్న విషయాలను గమనించండి.
2. ఇక సోఫా‌పై ఊరికే కూర్చోక కాసేపు అటూ, ఇటూ కదలాలి. ఇలా చేయడంవల్ల మనం కదలినప్పుడు సోఫా కీచుమనే శబ్దం లాంటిదేదైనా చేస్తుందేమో తెలిసిపోతుంది. అప్పుడు మంచివాటిని ఎంపిక చేసుకోవచ్చు.
3. అలాగే సోఫా వెనుక వైపున ఉండే బ్యాక్‌రెస్ట్.. మీ నడుం కింది భాగానికి దన్నుగా, హాయినిచ్చేదిగా ఉండాలి. కాళ్ళు నేలమీద ఆని సౌకర్యంగా కూర్చున్నట్లు... కూర్చున్నవారికీ, చూస్తున్నవారికీ అనిపించాలి. కూర్చున్నప్పుడు సోఫా సీటు లోపలికి వెళ్తుంది కదా...! అలా వెళ్ళడం పది సెంటీమీటర్ల కన్నా ఎక్కువగా ఉండకూడదన్న విషయాన్ని గమనించాలి.
4. అతుకుల్లాంటివి ఉన్నచోట కాస్త జాగ్రత్తగా గమనించాలి. కుట్లు పటిష్ఠంగా ఉందీ లేనిదీ చూసుకోవాలి. ఇకపోతే ముఖ్యంగా సోఫా‌సెట్ వాడకంలో ఎలాంటి జాగ్రత్తలు తీసుకోవాలో తెలిపే బ్రోచర్‌ను తీసుకోవడం మాత్రం మరువవద్దు.
5. ఒక సోఫా సెలక్ట్ చేసే ముందు ఇంటి థీమ్ ముందే నిర్ణయించుకోవాలి. దాన్ని బట్టి ఎలాంటి ఫర్నీచర్ ఎంచుకోవాలో ఒక స్పష్టత వస్తుంది.
6. ఒకవేళ ఇంటి ఇంటీరియరంతా వుడెన్ ఎంచుకుంటుంటే ఫర్నీచర్ కూడా వుడెన్‌దే ఎంచుకోవాలి. అయితే వీటికి మంచి కుషన్లు వేస్తే బాగుంటుంది.
7. హాలు చిన్నగా ఉంటే.. తక్కువ ఎత్తులో ఉన్న సోఫాలను సెలక్ట్ చేసుకోవాలి. దానివల్ల గది చిన్నగా ఉన్నట్లు అనిపించదు. ఎత్తుగా ఉన్న వాటిని ఎంచుకుంటే గది నిండా సోఫానే ఉన్నట్లు కనిపిస్తుంది.
8. ఇంటి రంగును బట్టి, సోఫా రంగును ఎంచుకోవాలి. ఇంటి రంగు డార్క్ అయితే సోఫా లైట్ కలర్, ఒక వేళ ఇంటి రంగు లైట్ అయితే సోఫా డార్క్ కలర్ తీసుకుంటే బాగుంటుంది. గది రంగు ఉన్న సోఫాలను ఎంచుకుంటే రిచ్ లుక్ వస్తుంది.
9. మామూలుగా అయితే ఇద్దరు లేక ముగ్గురు కూర్చునేట్లుగా సోఫా ఉండి ఒక కుర్చీ సపరేట్‌గా వస్తుంది. అలా నచ్చకపోతే ‘ఎల్’షేప్‌తో ఇప్పుడు సరికొత్త సోఫాలు మార్కెట్‌లో ఉన్నాయి. వీటివల్ల న్యూలుక్ రావడమే కాదు, స్థలమూ వృథా అవదు.
10. సోఫాలు పాతగా అయిపోయనట్లుంటే.. అప్‌హోల్‌స్ట్రీ మారిస్తే సరిపోతుంది. దీనికి లెదర్, కాటన్, జెకార్డ్, సిల్క్, వెల్ షెనిల్ అనే మెటీరియల్‌లు దొరుకుతాయి. వాటితో కొత్త దాలను తేవచ్చు. అదే చెక్క సోఫాలకయితే కుషన్లు మార్చేస్తే సరిపోతుంది.