ప్రమాదాలకు చెక్ పెట్టె వంటగది పరిసరాలు ఎలా ఉండాలి..

Published: Monday, January 2, 2012, 15:21 [IST]

గదుల అలంకరణ విషయంలో తీసుకునే జాగ్రత్తలే గృహకళను ఇనుమడింపజేస్తుంది. సాధారణంగా ప్రతి ఇంటి నిర్మాణంలో వంటగదికి తక్కువ స్థలం కేటాయించి హాల్‌ కు ఎక్కువ స్థలం కేటాయిస్తున్నారు. దీని వలన డైనింగ్‌ టేబుల్‌ హాల్లోనే ఏర్పాటు చేసుకుని టీవీ చూస్తూ భోజనం చేయడం అలవరుచుకుంటున్నారు. అయితే కొత్తగా ఇళ్ళు నిర్మించాలనుకునేవారు వంటగదికి సైతం సాధ్యమై నంత ఎక్కువ స్థలం కేటాయించి డైనింగ్‌ టేబుల్‌ ను అక్కడే ఏర్పాటు చేసుకోండి. నిజానికి టీవి చూస్తూ తినడం వలన అధిక ఆహారం తీసుకోవడం జరుగుతుంది.

కాబట్టీ డైనింగ్‌ టేబుల్‌ వంటగదిలో ఉండటం వలన త్వరగా ఊబకాయం బారినపడే ప్రమాదం నుంచి తప్పించుకోవడమేగాక అన్ని వస్తువులు అందుబాటులో ఉంటాయి. వంటగదిలో అల్మారాలను సాధ్యమైనంత ఎక్కు వగా ఏర్పాటు చేయడం కూడా అవసరమన్న విషయం గుర్తుంచుకోవాలి.వంటగదిలో తగినంత వెలుతురుతోపాటు వెంటిలేషన్ తప్పకుండా ఉండాలి. అలాగే ఎగ్జాస్ట్ ఫ్యాన్ కూడా తప్పనిసరిగా అమర్చుకోవాలి. వంట చేసేటప్పుడు గదిలో వ్యాపించే వివిధ రకాల వాసనలు, వేడిగాలులను బయటికి పంపించి, తాజా గాలిని గదిలోకి తెచ్చేందుకు ఎగ్జాస్ట్ ఫ్యాన్ ఎంతగానో ఉపయోగపడతాయి. దీంతో గదిలో చల్లటి వాతావరణం నెలకొంటుంది.

కిచెన్‌లో వస్తువులను ఎంత తక్కువగా ఉంచుకుంటే అంత మంచిది. కిచెన్‌ లో అల్మారాలు పెట్టుకుంటే వంట సామాన్లన్నింటినీ అన్నింటినీ అందులో సర్దేయవచ్చు. దీనివల్ల దుమ్ము, ధూళి నుండి పాత్రలను రక్షించుకోవచ్చు. అలాగే కిచెన్‌కు బయట భోజనాల గదిలో ఫ్రిజ్‌ ను అమర్చుకుంటే సౌకర్యంగా ఉంటుంది. ఫ్రిజ్‌ లోని వస్తువులు అందుకునేందుకు వీలుగా వంటగదికి, భోజనాల గదికి మధ్యలో ఉండేలా ఏర్పాటు చేసుకోవడం మంచిది. హాలు సైజుకు సరిపోయే విధంగా డైనింగ్ టేబుల్‌ ను ఎంపిక చేసుకోవటం మర్చిపోకూడదు. దీనివల్ల హాలు అందం ద్విగుణీకృతం కూడా అవుతుంది.

ఫ్రిజ్‌ లు, గ్రైండర్, ఎలక్ట్రిక్ హీటర్లు లాంటివి వంటగదిలో గ్యాస్ సిలిండర్లకు దగ్గరగా పెట్టుకోకూడదు. స్విచ్ ఆఫ్, ఆన్ చేసే సందర్భాలలో వచ్చే స్పార్క్‌ల వల్ల వంటగ్యాస్ గాలిలో పొరపాటుగా వ్యాపించి ఉన్నప్పుడు అగ్ని ప్రమాదం సంభవించే అవకాశం ఉంటుంది కాబట్టి వీటి విషయంలో జాగ్రత్త వహించాలి.