మాస్టర్ బెడ్ రూం ఎలా ఉండాలి...?

ముందుగా బెడ్ రూంలో అనవసరంగా పేరుకు పోయిన పాత పుస్తకాలు, చెప్పులు, ఉపయోగపడని ఇతర సామాగ్రిని తొలగించాలి. పాతబట్టలు, మాసిన బట్టలు బెడ్ మీద బెడ్ క్రింద వేయకుండా, బెడ్ రూంను, స్టోర్ రూం చేయకూడదు. పడక గదిలో సాధ్యమైనంత వరకు తక్కువ వస్తువులతో, ఖాళీ స్థలం ఎక్కువగా ఉండేలా చూసుకోవాలి. ఒకవేళ ఏవేని వస్తువులు ఉన్నా, వాటిని చిందరవందరగా పడవేయకుండా, గదికి శోభనిచ్చేలా సర్దుకుంటే సరిపోతుంది. రెండు మంచాల స్థానంలో ఒకే డబుల్‌కాట్ మంచంతో స్థలం కలసివస్తుంది. అదికూడా ఈ మంచాన్ని ఓ మూలకు విసిరేసినట్లుగా కాకుండా, గదిలో మధ్యలో ఉండేలా వేయాలి. మూడువైపుల నుంచీ.. అటూ, ఇటూ తిరిగేందుకు వీలుగా ఉండేలా చూసుకోవాలి.

బెడ్‌రూంలోకి అడుగుపెట్టగానే ప్రభావితం చేసేవి బెడ్‌షీట్లు. పిల్లో కవర్స్, వీటిని కాటన్‌లో ఎంపిక చేసుకుంటే అందంగా ఉండటంతో పాటు నిర్వహణ సులభం. చిన్న గదుల్లో డిజైన్‌ రూపంలో ఉన్న వాటిని ఎంపిక చేసుకోవచ్చు. సిల్క్‌ వస్త్రాలు కూడా బాగానే నప్పుతాయి. గదిలో ఎంత స్థలం ఉన్నా ఫర్నిచర్‌ ఆక్రమించేస్తుంది కాబట్టి, మరీ తప్పనిసరి అయితే ఫర్నీచర్‌ను బెడ్‌రూం ఉంచకపోవడం ఉత్తమం. ఒకవేళ తప్పనిసరి అనుకుంటే, గోడవారగా ఏర్పాటు చేయటం మంచిది.

సహజ సిద్ధమైన వెలుతురు గదిలో ప్రసరించేలా జాగ్రత్త పడితే... ఎంత చిన్న గదైనా విశాలంగా కనిపిస్తుంది. ఇలా కనిపించేలా చేసేవి కిటికీలు కాబట్టి, సాధ్యమైనంతవరకూ వీటిని తెరిచే ఉంచాలి, కర్టెన్లు కిటికీకంటే కిందగా ఉండేలా చూడాలి. అవి కూడా లేత రంగుల్లో ఉంటే, గది మరింత విశాలంగా కనిపిస్తుంది.

ఇక చివరగా... బెడ్‌రూమ్‌లో లైటింగ్‌ కూడా కీలకమైనదే. సాప్ట్‌ అండ్‌ జెంటిల్‌ లైట్లనే ఎంపిక చేసుకోవాలి. కీలకమైన ఒకటి రెండుచోట్ల డిమ్మర్లు ఏర్పాటు చేసుకుంటే సరిపోతుంది.