పువ్వులను అలంకరించడంలో మెలుకువులు

1. పుష్పాలంకరణలో భాగంగా పువ్వులు, ఆకుల్ని కొద్దిగా మెలితిప్పాల్సి వచ్చినా కూడా ఆ అలంకరణ మాత్రం పైకి చూస్తున్నట్లే ఉండాలి. ఫ్లవర్ వాజుల్లో ఉన్న నీటిని ప్రతిరోజూ మార్చినట్లయితే, పువ్వులు ఎక్కువ రోజులు తాజాగా ఉంటాయి. పూవుల అమరికలో భాగంగా పండ్లూ వాడుతున్నట్టయితే.. అవి కిందికి ఒంగి ఉండే కొమ్మల్నే ఎంచుకోవాలి.

2 పుష్పాలంకరణ అనగానే కేవలం కొన్ని పువ్వులు, ఆకులు, కొమ్మలను హడావుడిగా పిన్‌ హోల్డర్లకు గుచ్చేసి ఓ మూల అమర్చేయడం కానేకాదు. ఎంత సాధారణంగా చేసినప్పటికీ పూవుల అమరికకు ఓ ప్రత్యేకమైన డిజైనుండాలి. రంగు, సమతూకం.. రిథమ్‌, దిశ లాంటివన్నీ తప్పనిసరి. అప్పుడే అది అసలైన అలంకరణ అనిపించుకుంటుంది.

3. అలంకరణలో ఓ మొక్కకు సంబంధించిన జీవప్రక్రియ మొత్తం కనిపించాలి. అంటే.. కొమ్మలు, ఆకులు, పువ్వులు మాత్రమే కాదు, సంబంధిత మొక్కకు చెందిన మొగ్గల్ని కూడా అలంకరణలో వాడడం తప్పనిసరి. అలంకరణ చేస్తున్నప్పుడు హడావుడి పడకూడదు. నిదానంగా చేయాలి. లేదంటే మీరు పడిన శ్రమ మొత్తం వృథా అవుతుంది

4. ముఖ్యంగా తెలుసుకోవాల్సిందేమిటంటే పుష్పాలంకరణ చేయగానే సరిపోదు. గదుల విస్తీర్ణం, ఏ స్థలంలో అలంకరణ చేయాలనుకుంటున్నారు, అది అందరికీ కనిపిస్తుందా, బ్యాక్‌ గ్రౌండ్‌ ఎలా ఉంది... లాంటి విషయాలన్నీ బాగా ఆలోచించి ఆ తర్వాతే ఓ నిర్ణయానికి రావాలి.