కళాఖండాలను మురిపించే గోడచిత్రాలు....!

Decor

oi-Saraswathi

By Sindhu

Published: Friday, May 4, 2012, 14:16 [IST]

ప్రస్తుత ఆధునిక యుగంలో ఫర్నిచర్‌కు ఎక్కువ ప్రాధాన్యత ఇస్తున్నారు. వాటితో పాటు సమానంగా ఇంటీరియర్స్‌కు, ఫర్నిషింగ్‌లకు కూడా అంతే ప్రాముఖ్యత వుందంటే అది అతిశయోక్తి కాదు. ఇలా ఇంటి అందాలను తీర్చిదిద్దడానికి ఎన్నుకున్న ప్రతి అలంకరణ ఇంటి సొగసును, కళాత్మక అభిరుచులను ఆవిష్కరిస్తుంది. దేశ విదేశాలలో ‘టాపెస్ట్రీ’లుగా సుపరిచితమైన ఈ పట్టుజలతారు అద్దకపు తెరలు అందాలకు సృజనాత్మక కళకు దర్పణాలు. అలంకారాలు లేకపోతే గోడలు కళాకాంతి లేనట్లు వుంటాయి. గోడలకు వేలాడదీసే ఈ టాపెస్ట్రీ ఏ గదికైనా, హాలుకైనా కొత్త సొగసులు అద్దుతాయి. ఎంతో ఘన చారిత్రక నేపథ్యంతోపాటు సృజనాత్మక కళానైపుణ్యం సంతరించుకున సొగసు కల నేతలు ఈ పట్టు జలతారు తెరలు. సాంకేతికంగా.. ఇదో అపురూపమైన టెక్స్‌టైల్‌ ఆర్ట్‌.

వాల్‌ టాపెస్ట్రీ : గదికి అందాన్ని ఇవ్వడమే కాదు. ఎంతో మానసికానందాన్ని కూడా ఇస్తుంది. ఫొటో ఫ్రేమ్‌లు, పెయింటింగ్‌లు, గది గోడలకు పరిమితమైన అందాలనే ఇవ్వగలవు. అవి కంటికి నదురుగా కనిపించవచ్చు. అదే వాల్‌ టాపెస్ట్రీ అయితే ఇంటి లోపల సొగసుల అలంకరణలో అంతర్భా గమవుతుంది. మామూలుగా కాన్వాసు బదులు ఫ్యాబ్రిక్‌ వాడితే ఆ టాపెస్ట్రీపై చిత్రించిన ప్రతి రూపం కనువిందు చేస్తుంది. ఒక ప్రత్యేక అనుభూతినిస్తుంది. ఎనలేని అందాన్ని ఆవిష్కరిస్తుంది. ఇవి చాలా వరకు బంగారు, వెండి దారాలతో ఇటాలియన్‌ సిల్క్‌తో చేసినవే అయివుంటాయి.

ప్రకృతి దృశ్యాలు, వివిధ దేవతా మూర్తుల రూపాలు, ఉరికే లేడి కూనలు, ప్రకృతి అందాలు, ఎగసిపడే అలలు, జాలువారే జలపాతాలు... వీటి ప్రతిరూపాలు. ఎంతో అందంగా ఈ తెరలలో ఒదిగిపోతాయి. యూరోపియన్‌ ఆర్ట్‌ టాపెస్ట్రీలు కొనేప్పుడు వాటి అల్లికలు నేతల తీరు, సంప్రదాయ సొగసులు ఇలా ఎన్నో అంశాలు పరిగణలోనికి తీసుకోవలసి వుంటుంది.

జాగ్రత్తలు: ఇవి సుదీర్ఘకాలం చెక్కు చెదరకుండా వుండాలంటే వీటిని జాగ్రత్త చేయడంలో కొంత శ్రద్ధ అవసరం. ఈ టాపెస్ట్రీలు ఫ్యాబ్రిక్‌తో తయారవుతాయి కాబట్టి వీటిని జాగ్రత్త చేయడంలో కొన్ని మెళకువలు పాటించాలి. మరెంతో శ్రద్ధ వహించాలి. అవి మాసిపోయినట్లు దుమ్ము ధూళి చేరినట్లు వుంటే మధ్య మధ్య ఒకసారి వాటిని డ్రైక్లీనింగ్‌కు ఇవ్వడం మంచిది. అందువల్ల దాని మీద పేరుకుపోయిన దుమ్ము, ధూళికణాలన్నీ పోయి మళ్ళీ చూడచక్కని రూపాన్ని సంతరించుకుంటాయి.

మీరు కొనాలనుకున్న టాపెస్ట్రీ దాన్ని వుంచాలన్న గది గోడలకు తగ్గట్లు వుంటుందో లేదో ముందే ఒకసారి చూసుకోవడం మంచిది. సరైన టాపెస్ట్రీని ఎంచుకోకపోయినా, దాన్ని సరైన స్థానంలో వుంచకపోయినా, ఎంత అందమైన కళాఖండమైనా సాదాసీదాగా కనిపిస్తుంది. మీరు ఆశించినట్లుగా గది గోడకు తగ్గ అలంకారం కాలేదు. అన్నింటికన్నా ముఖ్యమైన విషయం ఏమిటంటే మీరు ఎంచుకునే టాపెస్ట్రీ మీ వ్యక్తిత్వాన్ని అభివ్యక్తీకరించాలి.