టెర్రస్ తోట..అలసిన మనసుకు ఎంతో ఊరట..!

టెర్రస్ పై ఏ కొద్ది స్థలం దొరికినా దాన్ని ఉపయోగించుకోవాలి. టెర్రస్ అంచుల్లో అడుగున్నర ఎత్తున ఎర్రమట్టితో, సేంద్రియ ఎరువులతో తోటలా తయారు చేసుకొని ఆ తోటలో సొర, కాకరకాయ, అలసంద, నిమ్మ, మిరప, చేమ, అరటి, పాలకూర, మెంతి, పుదీనా, కరివేపాకుతో పాటు అనేక పూల మొక్కలు, ఔషధ మొక్కలు కూడా పెంచుకోవచ్చు.

సొర తదితర తీగ జాతి మొక్కలను ఇనుప తీగలను పందిరిగా కట్టి పాకించి వదిలేస్తే చాలు చాలా అందంగా అల్లుకొంటూ కాయలు కాస్తాయి. టెర్రస్ మధ్యలో లాన్‌ ను కూడా ఏర్పాటుచేయడంతో చాలా ఆహ్లాదకరంగా ఉంటుంది. మొక్కలకు ఎటువంటి రసాయనిక ఎరువులు వాడకూడదు. బయోగ్యాస్ ప్లాంటు నుంచి వెలువడే 'స్లర్రీ'ని తీసుకొచ్చి అందులో పది రెట్లు నీటిని కలిపి మొక్కలకు పోస్తే మొక్కలు ఏపుగా పెరగడంతోపాటు క్రిమి కీటకాలు దరిచేరకుండా చేస్తుంది.

పట్టణాలు, నగరాల్లో నివసించే వారు టెర్రస్ పై ఓ చిన్న తోటను ఏర్పాటుచేస్తే.. నగర కాలుష్యాన్ని అరికట్టడంతోపాటు ఇంటికి అవసరమయ్యే కూరగాయలను పండించవచ్చు. ఉదయం, సాయంత్రం పక్షుల కిలకిలారావాలతో టెర్రస్ సందడిగా ఉంటుంది. తోటలో కాసేపు కూర్చుంటే చాలు.. అలసిన మనసుకు ఎంతో ఊరటనిస్తుంది టెర్రస్.!