చెమట మరక పడిందా...! చేత్తో తీసేయండిలా!

By B N Sharma

Published: Wednesday, October 19, 2011, 10:24 [IST]

కొంతమందికి భరించలేని చెమట, దుర్వాసన, వేసుకున్న దుస్తులకు చెమట మరకలు. నలుగురిలోకి వాటితో వెళ్ళాలంటే తలవంపులే. కనుక మీ దుస్తులు మరకలు లేకుండా స్వచ్ఛంగా వుండాలంటే ఆ మరకలను ఎలా తీసేయాలో కొన్ని సూచనలిస్తున్నాం .. పరిశీలించండి. మరకలు పోవాలంటూ గట్టిగా వాష్ చేయటం, బ్రష్ చేయటం చేస్తే బట్టలోని పటుత్వం దెబ్బతింటుంది. దానితోపాటు రంగు కూడా పోతుంది. గట్టిగా రుద్దిన చోట దళసరి తనం తగ్గి పోగులు చుట్టుకుంటాయి.

కనుక, చేయండి ఈ విధంగా....
1. గుడ్డలు నిమ్మరసం లేదా సోడా నీటిలో 10 నిమిషాలపాటు వుంచండి. ఈ చర్య మరకలను తీసేయటమే కాక, బట్టలు మంచి వాసన కొట్టేలా చేస్తాయి.

2. చెమట మరకలను తీయాలంటే బ్రష్ చేయటం కంటే చేతితో రుద్దటమే మంచిది. చెమటలోవుండే రసాయనాలు, ఉప్పు గుడ్డను పటుత్వంపోయేలా చేస్తాయి. చివరకు దుస్తులు చినిగేలా కూడా చేస్తాయి.

3. కడుగకుండా చర్మంపై వుండే చెమట మరకులు చర్మానికి హాని చేస్తాయి. దురదలు, మంటలు ఏర్పడతాయి. చంకలు నల్లగా వున్నాయంటే అది ఫంగస్, లేదా బాక్టీరియా వలన అని గ్రహించండి. చెమట బట్టలను ఎపుడూ ఎండలో వేస్తే ఫంగస్ చేరకుండా వుంటుంది.

4. బట్టలు ఉతికిన తర్వాత సువాసనలనిచ్చే ఫేబ్రిక్ కండిషనర్లు వాడితే దుస్తులు బాగుంటాయి.

5. దుస్తులు మంచి రంగు వుండి వాష్ లో కోల్పోతుంటే, వాటిని రాక్ సాల్ట్ నీటిలో వుంచితే రాక్ సాల్ట్ రంగులను కాపాడుతుంది.

6. ఖరీదైన సిల్కు, వూలు దుస్తులు డ్రై వాష్ చేస్తే రంగులు వెలవటం, కొత్తదనం పోవటం వుండవు.

7. గుడ్డ చెమట చేర్చుకోకుండా వుండాలంటే, దుస్తుల అడుగుభాగంలో చెమటను పీల్చే ప్యాడ్ లు లైనింగ్ గా వేస్తే చెమట దుస్తులకు చేరకుండా వుంటుంది.