రూమ్ ఫ్రెషనర్స్ కు ప్రత్యామ్నాయాలు!

By B N Sharma

Published: Thursday, November 10, 2011, 16:15 [IST]

ఇంట్లో ప్రతిరోజూ కొన్ని రకాల వాసనలు వస్తూంటాయి. వంట చేసేటపుడు, మాసిన బట్టలున్నా, లేదా ఇంటికి తాళం వేసిన కొద్దిరోజులకు ఒక రకమైన వాసనలు వస్తాయి. వీటిని పోగొట్టాలంటే సొమ్ము ఖర్చు చేసి ప్రత్యేకంగా రూమ్ ఫ్రెషనర్లు కొనాల్సిన పని లేదు. వంటింట్లోని పోపుల పెట్టెలో అందుబాటులో వుండే సుగంధ ద్రవ్యాలతోనే వాసనలను అరికట్టవచ్చు.

మాంసం, చేప లాంటివి వండితే వంటగదే కాకా ఇల్లంతా వాసనే. అది ఓ పట్టాన వదలదు కూడాను. అలాంటపుడు ఓ కప్పు నిమ్మరం వంటగదిలో ఓ మూలన వుంచితే వాసన మాయం అవుతుంది. అదేరకంగా చేతులకు పట్టిన ఉల్లి, వెల్లుల్లి వాసనలు కూడా నిమ్మరసం రాసి కడిగేస్తే చాలా తేలికగా వాసన పోయి మంచి సువాసన కూడా వస్తుంది.

లివింగ్ రూమ్ లో ఫ్రెష్ ఎయిర్ కావాలంటే, వెనిలా ఎసెన్స్ లో కొద్దిపాటి దూదిని ముంచి, దాన్ని ఓ చిన్న గిన్నెలో పెట్టి గదిలో ఓ మూలగా వుంచితే ఫ్రెష్ ఎయిర్ అనుభూతి కలుగుతుంది. లేదా కాసిని లవంగాలు, దాల్చిన చెక్కలు ఒక గిన్నెడు నీటిలో మరిగించండి. అవి ఉడికేటపుడు వచ్చే ఆవిరితో ఇల్లంతా సువాసనల మయం అయిపోతుంది.