వర్షాకాలంలో ఇంటి పరిసరాలతో జాగ్రత్త...!

Improvement

oi-Saraswathi

By Sindhu

Published: Monday, July 23, 2012, 17:21 [IST]

వర్షాకాలంలో శారీరకంగా, వ్యక్తిగతంగా జాగ్రత్తలు తీసుకోవడమే కాదు. ఇంటి పరిశరాల గురించి కూడా జాగ్రత్తలు తీసుకోవాలి. అప్పుడే ఆరోగ్యంగా ఉండగలుగుతారు. ముఖ్యంగా వర్షాకాలంలో ఎడతెరిపి లేకుండా వర్షాలు పడటంతో తేమకు ఇంట్లో కొన్ని వస్తువులు తేమ ఉంటాయి. వాటితో ఇల్లంతా ఒకలాంటి ముగ్గిన వాసనలు మిగతా గదులకు కూడా ప్రవేశిస్తుంది. ఇంట్లో వారికే కాకుండా.. వచ్చే అతిథులకు కూడా ఇబ్బంది కలిగిస్తుంది. కాబట్టి వానకాలంలో ఏ మాత్రం ఎండ పడినా వెంటనే ఆ ఇంటికి తలుపులు, కిటికీలు పూర్తిగా తెరచి ఉంచడం వల్ల ఎండ తగిలి, కొంత వరకూ వాసనలు పోగొట్టవచ్చు.

వానాకాలంలో మనం ఆరోగ్యంగా వుండాలీ అంటే దోమలు, ఈగలను దరిచేరనివ్వకూడదు. కొన్ని రకాల జ్వరాలు, అంటువ్యాధుల వ్యాప్తికి అవే కారణం కాబట్టి ... మనం వున్న పరిసరాల్లో అవి వాలకుండా చూసుకోగలిగితే మరీ మంచిది. ఇంట్లోగానీ, ఇంటి పరిసరాల్లోగానీ దోమ కనిపించకుండా జాగ్రత్తలు పాటించాలి. తుమ్మినప్పుడు, దగ్గినప్పుడు ముక్కు, నోటికి చేతిరుమాలుగానీ చెయ్యిగానీ అడ్డుపెట్టుకోవా

ఇంటి చుట్టుపక్కల గుంటలు ఏవైనా వున్నాయేమో చూసి వాటిని వానలు పడకముందరే పూడ్చేయాలి. మరుగుదొడ్లు సైతం శుభ్రంగా వుంచుకోవాలి.

వానాకాలం కుళాయి నీరు కూడా కలుషితమయ్యే అవకాశం వుంది. అందుకే కాచి వడపోసిన నీటినే తాగాలి. కాచిన నీటిని 24 గంటలలోపు తాగాలి.

రిఫ్రిజిరేటర్‌లో నిల్వ వుంచిన పదార్థాలను సాధ్యమైనంత తక్కువగా తీసుకోవాలి. తాజాగా వండిన ఆహారం తీసుకోవడం మంచిది.

ఇంటి పరిసరాలను పరిశుభ్రంగా వుంచుకోవాలి. మనకు దోమలు, ఈగల వల్ల వచ్చే జబ్బులు తక్కువవేం కాదు కదా! నీళ్లు నిలబడి దోమలు మకాం పెట్టకుండా చూసుకోవాలి. ఇంటి లోపల కూడా పొడిగా వుంచుకోవాలి. కనీసం ఒకసారైనా ఇంటిని డెట్టాల్‌ కలిపిన నీళ్లతో తుడుచుకోవాలి.

ఎండాకాలంలో చల్లగా వుండడానికి వాడిని కూలర్లను వానాకాలం రాగానే మూలకు నెట్టేస్తాం. అంతటితో వాటి పని పూర్తయిందనుకుంటాం. కానీ అందులో నిల్వ చేసే నీటిని వంపేయడం మాత్రం మర్చిపోతాం. నీళ్లు నిండిన కూలర్లు దోమలకు అడ్డాల్లాంటివి. అక్కడే హాయిగా కుటుంబ సమేతంగా వృద్ధి చెందుతూ మన పని పడుతుంటాయి. అందుకే ముందు కూలర్లలో నీటిని వంపేద్దాం.

అదేవిధంగా ఎండల్లో వాడిన కుండలు, తాగిన కొబ్బరిబొండాలు, పిల్లలు ఆడిన సైకిల్‌ టైర్లు... అన్నిటినీ మిద్దెమీదో, గోడపక్కనో పడేస్తాం. మొక్కలు ఎండిపోయిన పూల కుండీల పరిస్థితీ అంతే. కానీ వాటిలో కూడా ప్రమాదం పొంచి వుందనుకోం. వానలు పడినప్పుడు కుండలు, కొబ్బరిబొండాలు, టైర్లు నీళ్లతో నిండిపోతాయి. ఆ తర్వాత చెప్పేదేముంది. దోమలు చేరిపోతాయి. వాటిని రానిచ్చామూ అంటే జ్వరాలను ఆహ్వానిస్తూ తలుపులు తెరిచినట్టే. కాబట్టి ఇంటి పరిసరాలను ఎంత జాగ్రత్తగా పెట్టుకొంటే అంతమంచిది.