వంటగదిలో ముఖ్యంగా గుర్తించుకోవాల్సింది...

వంటగదిలో ముఖ్యంగా స్టౌ దగ్గర వండేటప్పుటు వండే పదార్థాలు వాటి మరకలు స్టౌ మెనుక గోడ మీద పడుతుంటాయి. వాటిని వెంటనే శుభ్రం చేయకపోతే చూడటానికి ఇబ్బందిగా ఉంటుంది. అందుకోసం నిమ్మరసంలో ఉప్పు కలిపి మరకల మీద రుద్దాలి. లేదంటే గోడకు ఆయిల్ పేపర్లు అంటిస్తే ఎప్పటికప్పుడు మార్చుకోవచ్చు. ఇదీ కాదంటే వాటర్ ఫ్రూప్ పెయింటింగ్ వేసినా శుభ్రం చేసుకోవడానికి సులభంగా ఉంటుంది.

ఇంట్లోని వంటగదికున్న కిటికీలోని ఇనుప మెష్‌ కు దుమ్ము, మురికి పట్టుకొని చేతులకు, దుస్తులకు నల్లటి మరకలు పడతుంటాయి. అలాంటప్పుడు తలకు రంగు వేసుకునే బ్రష్‌ ను సబ్బుద్రావణంలో ముంచి మెష్‌ ను శుభ్రపరచండి. కిరోసిన్‌ లో ముంచిన వస్త్రంతో ఇనుప తీగలను తుడిస్తే తప్పు వదులుతుంది.

వంట గది మూలల్లో కీటకాలు గూడుకట్టుకొని బూజు పేరుకుంటుంది, పొడవాటి కర్రకు పెద్ద స్పాంజ్‌ ను కట్టి డిటర్జెంట్ కలిపిన గోరువెచ్చటి నీటిలో ముంచి వంట గది సీలింగుకు తుడవండి. ఇలా కనీసం పది రోజులకోసారైనా చేస్తుంటే వంటగది చూడటానికి శుభ్రంగా ఉంటుంది.

వంటగదిలో ఉన్న సింక్, డ్రైనేజీ పైపులను శుభ్రపరచడం వీలుకాని పని. అందుకే వెనిగర్, బేకింగ్ సోడాను కప్పు చొప్పున కలిపి నాలుగు మగ్గుల నీళ్లలో బాగా మరిగించండి. ఈ మిశ్రమాన్ని రాత్రిపూట పైపుల్లో పోస్తే మధ్యలోనున్న అడ్డంకులన్నీ నీళ్లతోపాటు కొట్టుకుపోతాయి. వెనిగర్, సోడా క్రిములను హరించి వేస్తుంది.

ముఖ్యంగా వంట గదిలోని చెత్త బుట్టలను ఏ రోజుకారోజు తీయకపోతే దోమలు, క్రిములు ఇంట్లోకి చేరిపోతాయి. అందుకే కనీసం వారానికోసారి నీళ్లతో కడగాలి. లీటరు నీటిలో అమోనియాను కలిపి లోపల బయట స్క్రబ్బర్‌ తో రుద్ది శుభ్రం చేయాలి. తర్వాత బోరిక్ పొడిని, తేమ ఆరాక బేకింగ్ సోడాను చల్లండి, ఇవి దుర్వాసనలు పోగొడుతాయి.