కుక్కల పెంపకంలో ఎటువంటి జాగ్రత్తలు తీసుకోవాలి..

Published: Tuesday, December 27, 2011, 14:50 [IST]

కుక్కల పెంపకంలోనూ కొన్ని జాగ్రత్తలు అవసరం: కుక్క పిల్లలు పుట్టిన దగ్గర నుంచి మూడో నెల వచ్చే వరకూ రోజుకు కనీసం ఆరు సార్లు అయినా, పాలు పట్టించాలి. మూడు నెలల దాటితే ఉదయం పాలు రెండు సార్లు, మధ్యాహ్నం పప్పు, నెయ్యితో అన్నం, సాయంత్రం పెరుగు అన్నం లేదా పెడిగ్రీ పెట్టాలి. డాబర్‌ మేన్‌, ఆల్‌ సేషన్‌ తదితర జాతులు రాత్రి వేళల్లో కాపలా ఉండాలి. కనుక రాత్రి సమయంలో భోజనం పెట్టకూడదు.

వారానికి మూడు సార్లు మాంసాహారంతో కూడిన భోజనం పెట్టాలి. పెద్ద కుక్కలకు 200 గ్రాముల మాంసం, చిన్న కుక్కలకు 100 గ్రాముల మాంసం ఇవ్వాలి. ప్రతీ రోజూ ఉడకబెట్టిన కోడిగ్రుడ్లు వేయాలి. సాధారణంగా పుట్టిన దగ్గర నుంచి కుక్క పిల్లలకు నెలకు ఒకసారైనా ఏలుక పాములు, పరాన్నజీవుల నివారణకు మందులు వాడాలి. ఆరు నెలలకు మందు మార్పిడి చేయాలి. అలా చేస్తే, కుక్కలు ఆరోగ్యంగా ఉంటాయని ఆరోగ్య నిపుణులు చెబుతున్నారు.

కుక్కల ఆహారంలో తీపి, కారం, పులుపు,మసాలాలు లేకుండా జాగ్రత్తతీసుకోవాలి. కుక్కల శరీర నిర్మాణంలో స్వేదగ్రంధులు ఉండవు కనుక ఇలాంటి పదార్ధాలు తినడం వలన చర్మవ్యాధులు వచ్చి జూలు ఊడిపోతుంది. ఇటీవల కాలంలో కుక్కలకు కూడా షుగర్‌ వ్యాధి సోకి మృతిచెందుతున్నాయి. ఎక్కువశాతం షుగర్‌ వ్యాధితో కుక్కలు చనిపోతున్నాయని వైద్యులు పేర్కొంటున్నారు.

పరిశుభ్రమైన నీటిని కుక్కలకు అందుబాటులో ఉంచాలి. నెలకు 1, 2సార్లు షాంపులతో స్నానం చేయించాలి. ఉదయం, సాయంత్రం తప్పనిసరిగా కొంతదూరం నడిపిస్తే వ్యాయామం లబించడంతో పాటు నిర్ణీత సమయంలో కాలకృత్యాలు తీర్చుకునే అలవాటు చేసుకుంటాయి. పెంపుడు కుక్కల శరీరాన్ని (వెంట్రుకలు) ప్రతీరోజు ఒకసారి దువ్వాలి. యజమానులు తమ పెంపుడు కుక్కలు మట్టి తినకుండా జాగ్రత్త పడాలి.

నెలరోజుల వయస్సులో పదిరోజులకోసారి తొలి ఆరుమాసాల వయస్సులో 15రోజులకోసారి, ప్రతీనెలకోసారి కడుపులో నులుపురుగుల నివారణకు పైపర్‌ జిన్‌, ఆల్‌ బెన్‌ జోల్‌ మందులను తాగించాలి. పేలు నివారించేందుకు బ్యూటాచ్‌ గా టిక్కాల్‌ ద్రవాన్ని శరీరంపై 1శాతం మందు పిచికారీ చేయాలి. 45రోజులవయస్సులో వ్యాధినోరోధక టీకా, 75రోజులకు బూస్టర్‌ టీకా వేయించాలి. మూడుమాసాలవయస్సులో యాంటిరాబిస్‌ టీకాను వేయించడం ద్వారా కుక్కకాటునుంచి మనుషులు రక్షణ పొందవచ్చు.