పెంపుడు కుక్క - కొత్తగా పుట్టిన బిడ్డ!

By B N Sharma

Published: Wednesday, November 2, 2011, 16:34 [IST]

కొత్తగా పుట్టిన బిడ్డను ఇంటి పెంపుడు కుక్కకు అతిమెల్లగా పరిచయం చేయండి. వాటికి పోటీ లేదా చెడుభావనలు కలుగకుండా కొద్దిపాటి శిక్షణ నివ్వండి. ఇరువురి మధ్య కలసి పెరగే స్నేహాన్ని కల్పించండి. బేబీ పుట్టగానే....ఇంటికి తీసుకు రాకుండానే, మీ ఇంటి కుక్కకు ఆరోగ్య పరీక్షలు చేయించండి. కుక్క కారణంగా కుటుంబ సభ్యులకు బాక్టీరియా హాని కలుగకుండా వుంటుంది. హాస్పిటల్ లో బేబీకి వేసిన గౌను లేదా దుప్పటి వంటివి ముందుగా ఇంటికి పంపండి. గుడ్డను వాసన చూసిన కుక్క బేబీ వాసన గ్రహిస్తుంది. తల్లి, బిడ్డ ఇంటికి రాగానే ముందుగా తల్లి బిడ్డను చూపకుండా కుక్కను పలకరించాలి. బిడ్డ వేరే వారి వద్ద సురక్షితంగా వుండాలి. లేకుంటే, తల్లి, బిడ్డలపై ఒకేసారి కుక్క జంప్ చేసే అవకాశం వుంది.

కుక్క బిడ్డ వాసనలకు, ధ్వనులకు కొద్దిపాటిగా అలవాటు పడిన తర్వాత బేబీని దూరం నుండే కుక్కకు చూపుతూ పరిచయం చేయండి. బేబీని వాసన చూడటానికి ప్రయత్నించే కుక్కను తరిమేయకండి. ప్రశాంతంగా ఒక గదిలో చూపాలి. కుక్క తినే స్ధలం లేదా నిద్రించే స్ధలంలో ఈ చర్యలు చేయకండి. బేబీ దాని పరిసరాలలో వుండగా కుక్కనే ప్రశంసించండి. బేబీ రాక తనకు మంచిదని కుక్క భావిస్తుంది. బేబీ చుట్టుపక్కల కుక్క బాగానే తిరుగుతూ వుంటే, కుక్కను పొగుడుతుండడం, బిస్కట్లు పెడుతూండడం వంటివి చేయాలి. మొదటి కొద్ది నెలల పాటు బిడ్డ మీ చేతుల్లో వుండగా బిడ్డతో కుక్క నియంత్రణలో వుండి వాసనలు చూడటానికి అనుమతించండి. కుక్క కొద్దిసేపు ఆసక్తిగాను మరి కొంత సేపు ఆసక్తి లేకుండాను వుంటుంది. అది వెనక్కు తగ్గే కొద్ది మీరు దానిని ప్రశంసించాలి.

కుక్కను పరిశుభ్రంగా వుంచండి. దానిని శుభ్రపరచిన తర్వాత మీ చేతులకు యాంటీ బాక్టీరియల్ సబ్బులు వాడండి. కుక్కను ఎపుడూ శిక్షించకండి. అది బేబీపై ద్వేషం పెంచుకుంటుంది. ఎవరూ లేకుండా ఎపుడూ బేబీని కుక్క వద్ద ఒక్క క్షణం కూడా వదలకండి. ఎంత మంచి కుక్కకైనా సరే ఈ నిబంధన వర్తిస్తుంది. బిడ్డ పాకేటపుడు కుక్కకు మరిన్ని జాగ్రత్తలు తీసుకోవాలి. బిడ్డ పాకుతూంటే దానికి చాలా భయంగా వుంటుంది. ఒక పురుగు పాకుతోందని భావిస్తుంది. ఒక వైపు బిడ్డను, మరోవైపు కుక్కను జాగ్రత్తగా సాకటం మొదట్లో మీకు కష్టం గా వున్నప్పటికి, ఇద్దరూ కలసి కొంతకాలం పెరిగితే, తర్వాత వారిది విడదీయరాని బంధమే అవుతుంది.

Comments

Story first published: Wednesday, November 2, 2011, 16:34 [IST]

Latest Updates

Prepare Dog For New Baby! | అలవాటు పడేంతవరకు కష్టమే!