అందరూ ఆనందించే గోల్డెన్ రిట్రీవర్!

By B N Sharma

Published: Thursday, September 8, 2011, 15:58 [IST]

Tips To Reduce Golden Retriever Hair Shedding

గోల్డెన్ రిట్రీవర్ లు ఎంతో ప్రేమించదగిన కుక్కలు. అయితే ఈ కుక్కకు అధికంగా జుట్టు ఊడిపోతూ వుండటమే పెద్ద సమస్య. ఈ జాతి కుక్కలకు బొచ్చు రెండు సార్లు వస్తుంది. శీతాకాలంలో చలినుండి రక్షించుకోటానికి కొంచెం అధికంగా ఏర్పడి ఆ కాలం ముగియగానే అది వూడిపోతూంటుంది. కొందరు వీటి బొచ్చును కత్తిరంచేస్తారు. కాని అది సరికాదు. చలినుండి రక్షించుకోటానికి ఈ బొచ్చు సహజంగా ఏర్పడుతుంది. ఈ సమస్యకు పరిష్కారంగా ఏం చేయాలనేది చూద్దాం.

కుక్క బొచ్చును వారానికి మూడు రోజులు ప్రతిసారి ఒక అయిదు నిమిషాలు చక్కటి దువ్వెనతో దువ్వండి. లూజుగా వున్న బొచ్చు పడిపోతుంది. తరచుగా దువ్వుతూ వుంటే జుట్టు ఇంట్లో ఎక్కడపడితే అక్కడ రాలకుండా వుంటుంది. బాగా దువ్విన తర్వాత కుక్కలకొరకు తయారు చేసే మంచి షాంపూతో కుక్కకు స్నానం చేయిస్తే బొచ్చు రాలటం బాగా తగ్గుతుంది. బొచ్చు పూర్తిగా షేవ్ చేసేయకండి. సాధ్యమైనంత ట్రిమ్మింగ్ చేయాలి. బొచ్చు రాలకుండా వుండాలంటే కుక్కకు ఇచ్చే ఆహారంలో రెండు చుక్కలు ఆలివ్ నూనె వేయవచ్చు. కుక్క కనుక వాక్యూమ్ క్లనర్ కు భయపడకపోతే, మెత్తటి బ్రష్ క్లీనర్ కు తగిలించి దాని శరీరంనుండి లాగేయవచ్చు.

బొచ్చు రాలుతోందంటే సరైన పోషణ కూడా కలిగి లేదని అనుకోవచ్చు. మంచి నాణ్యత గల ఆహారం ఇవ్వటమే కాక, దానికి చేపనూనె, ఒమెగా 3, ఒమేగా 6 ఫ్యాటీ యాసిడ్లు ఇచ్చి బొచ్చు రాలటాన్ని అరికట్టవచ్చు. గోల్డన్ రిట్రీవర్ జాతి కుక్కలకు బొచ్చు రాలటం సహజం. కాని ఈ బొచ్చు ఇంటిలో ఎక్కడపడితే అక్కడ కనపడుతూంటే చికాకుగా వుండగలదు. అందుకని పైన చెప్పిన చర్యలు పాటించి, మీ పెంపుడు కుక్కనేస్తంలో గల ఆనందాన్ని అధికం చేసుకోండి.